U Minsku buduć sudzić dobraachvotnika «Pravaha siektara»
U Frunzienskim sudzie Minska 20 krasavika pačnuć sudzić žychara Navapołacka Tarasa Avatarava, dobraachvotnika «Pravaha siektara», jakoha zatrymali ŭ listapadzie 2015 hodu na čyhunačnym vakzale ŭ Minsku paśla pryjezdu z Ukrainy.
Pavodle źviestak Śledčaha kamitetu, u rečach zatrymanaha była samarobnaja hranata i pistalet «Makarava». Pra asobu zatrymanaha adpačatku SK paviedamlaŭ, što jamu 26 hadoŭ, raniej vučyŭsia ŭ Połackim universytecie.
Paźniej stała viadoma imia i proźvišča zatrymanaha. Tarasa Avatarava buduć sudzić pavodle dvuch artykułaŭ Kryminalnaha kodeksu — kantrabanda zbroi i niezakonny abarot zbroi. Jamu pahražaje da 8 hadoŭ źniavoleńnia.
Miž tym u pradstaŭnikoŭ «Pravaha sektaru», da jakich biełaruskija žurnalisty źviarnulisia pa kamentar paśla zatrymańnia Tarasa Avatarava, uźnikli sumnieńni adnosna zbroi, jakuju jon nibyta pravioz praź miažu z Ukrainaj.
«Kali ščyra, fatazdymki zbroi, jakuju ŭ jaho nibyta kanfiskavali, vielmi ździŭlajuć. Pistalet Makarava tut redkaść. Na čornym rynku jon kaštuje bolš za 1000 dalaraŭ. A štuka baksaŭ — durnyja hrošy! AKS-74, naprykład, kaštuje ad 300 da 700 baksaŭ. My ličym, što jaho mahli ŭziać «hołym», ale z dakumentami. A inšaje da spravy ŭžo prykłali», — padzialiŭsia z Eŭraradyjo svaim razvažańniami adzin z bajcoŭ «Pravaha sektaru».
Naziralniki zaŭvažajuć, što Tarasu Avataravu nie inkryminujecca artykuł ab najomnictvie, pavodle jakoha, jak paviedamlali biełaruskija pravaachoŭniki, byli zaviedzienyja dziasiatki kryminalnych spraŭ na biełarusaŭ, jakija na roznych bakach udzielničali ŭ vajennym kanflikcie va Ŭkrainie.
Kamientary