Siońnia na elektronnych tarhach była pradadziena staražytnaja syravarnia ŭ ahraharadku Pačajevičy Viciebskaj vobłaści. Pavodle infarmacyi arhanizatara aukcyjonu, u tarhach udzielničali 3 pakupniki, jakija pavialičyli startavuju canu łota ŭ 151 raz, piša Realt.
Syravarnia znachodzicca ŭ ahraharadku Pačajevičy Čašnickaha rajona Viciebskaj vobłaści. Heta — žyvapisnyja miaściny, pobač ź lesam, rakoj i Pačajeŭskim vozieram. Ad Minska siudy — kala 180 kiłamietraŭ.
Kaliści syravarnia była častkaj siadziby Chraptovičaŭ, adnak sam majontak u Pačajevičach nie zachavaŭsia. Paśla revalucyi syravarniu addali miascovamu saŭhasu, jaki pieraabstaloŭvaŭ budynak u kłub. Kulturny centr pracavaŭ u vioscy nie adzin dziasiatak hadoŭ.
Darevalucyjny budynak płoščaj 162 kvadratnyja mietry vystaŭlaŭsia na tarhi nieadnarazova. U apošni raz jaho startavaja cana źniziłasia da 42 rubloŭ.
U tarhach udzielničali 3 patencyjnyja pakupniki (2 fizičnyja asoby i adna jurydyčnaja asoba), jakija pavialičyli startavuju canu ŭ 151 raz. U vyniku, pieramožcam aukcyjonu, jaki doŭžyŭsia bolš za 2 hadziny, stała fizičnaja asoba, jakaja prapanavała 6325 rubloŭ (2160 dołaraŭ).
Razam z budynkam novamu ŭłaśniku dastaniecca ŭčastak płoščaj 17 sotak. Jaho pieradaduć u arendu na 20 hadoŭ. Novy ŭładalnik zmoža vykarystoŭvać ziamielny ŭčastak dla raźmiaščeńnia žyłoj zabudovy, roźničnaha i aptovaha handlu, hramadskaha charčavańnia, achovy zdaroŭja, adukacyi, ahraekaturyzmu i inšych met.
Kamientary