79-hadovaha minčuka adpravili na prymusovaje lačeńnie za abrazu prezidenta

79-hadovy Alaksandr Łapicki nie byŭ viadomym hramadskim aktyvistam i da vyraku suda Frunzienskaha rajona stalicy pra jaho mała chto viedaŭ. Ale 12 krasavika jaho pryznali vinavatym u abrazie pradstaŭnikoŭ ułady, sudździaŭ, prezidenta i nakiravali na prymusovaje lačeńnie. Ekśpiertyza pakazała, što ŭ piensijaniera majecca chraničny psichičny razład.

Pavialičyć

Niekatoryja pravaabaroncy ličać, što na samoj spravie Łapickaha pakarali za pryncypovaść i krytyčnyja dumki, i nastojvajuć, što jaho treba pryznać palitviaźniem.

U listach da čynoŭnikaŭ piensijanier vykarystaŭ słova «kazły», «idyjoty» i «admarozki»

Pravaabaronca Aleh Voŭčak raspavioŭ, što Alaksandr Łapicki źjaŭlajecca kandydatam chimičnych navuk, ale ŭžo daŭno na piensii.

«Jon narmalny, razumny čałaviek, — ličyć Vołčak. — Ja bačyŭ listy, jakija jon adpraŭlaŭ čynoŭnikam. Sapraŭdy, tam jość nieadnaznačnyja słovy i vyrazy. Ale ja chaču skazać, što da nas u hramadskuju pryjomnuju časta prychodziać ludzi z padobnymi zvarotami. Pravaachoŭnyja orhany dy i ŭsia vykanaŭčaja ŭłada časam davodziać ludziej da taho, što jany ŭžo nie mohuć strymlivać emocyj u svaich zvarotach».

Listy Łapicki adpraŭlaŭ pa elektronnaj pošcie.

Častka listoŭ tyčyłasia abstavinaŭ kryminalnaj spravy ŭ dačynieńni da syna Łapickaha, jakoha sudzili pa abvinavačvańni ŭ źbićci žonki. Łapicki pradstaŭlaŭ u sudzie intaresy svajho syna.

«Vosiem hadoŭ ciahnułasia raźbiralnictva. Alaksandr Ničyparavič i jaho syn nastojvali na nievinavataści, asprečvali ekśpiertyzy. Ale ŭ vyniku syna Łapickaha ŭsio-tki asudzili », — raskazaŭ Vołčak.

Alaksandr Łapicki krytykavaŭ sudovuju sistemu, adpraŭlaŭ zvaroty ŭ prakuraturu, Administracyju prezidenta i sudy.

U 2011 hodzie piensijanier pačaŭ adsočvać raźbiralnictva z nahody vybuchu ŭ minskim mietro. U svaim błohu jon detalova raśpisvaŭ, što, na jaho dumku, u trahiedyi vinavaty prezident Biełarusi i inšyja słužbovyja asoby.

«Ja papiaredžvaŭ jaho, što z hetaj nahody mohuć uźniknuć prablemy, tamu što takoha rodu abvinavačvańni nie mohuć być hałasłoŭnymi, — adznačaje Aleh Vołčak. — Adnak niezrazumiełym zastajecca, čamu abvinavačvańni jamu pradjavili ŭ 2016 hodzie, bo z momantu vybuchu ŭ mietro prajšło ŭžo piać hadoŭ».

Pravaabaronca taksama adznačaje, što milicyja nieadnarazova admaŭlała ŭ zaviadzieńni kryminalnaj spravy pa fakcie abraz słužbovych asob. Adnak u hetym hodzie sprava ŭsio-tki dajšła da sudu.

Praces, pa słovach vidavočcaŭ, zaniaŭ usiaho dva dni. U prysudzie adznačana, što abrazaj źjaŭlajucca nastupnyja słovy i vyrazy ź pierapiski piensijaniera: «okabanieli», «obnahleli», «kozły», «idioty», «otmorozki», «śvińji», «na vydumku i klevietu sud́ji», «vsia hłubina nravstviennoj diehradacii» i niekatoryja inšyja.

«Chaču źviarnuć uvahu, što ŭ sudzie poŭny tekst listoŭ nie začytvaŭsia, tamu kantekst zastajecca niezrazumiełym, — kaža Vołčak. — U prysudzie idzie pieralik abraz, ale niama dakładnaha vyznačeńnia, kamu mienavita ź biełaruskich aficyjnych asobaŭ jany byli nakiravanyja. Viadoma, Łapicki vykarystaŭ nieprystojnyja vyrazy, ale, na moj pohlad, heta administracyjnaje pravaparušeńnie, a nie złačynstva, za jakoje stałaha čałavieka treba adpravić na prymusovaje lačeńnie ŭ psichijatryčnuju balnicu».

Abraza prezidenta i prostaha hramadzianina ŭ Biełarusi aceńvajecca pa-roznamu

Kali b Łapicki ŭ svaich listach abražaŭ prostych hramadzian Biełarusi, jaho b dla pačatku pryciahnuli da administracyjnaj adkaznaści (štraf ad 4 da 20 bazavych vieličyń), a kali b jon na praciahu hoda znoŭ dazvoliŭ sabie padobnyja pavodziny, dajšło b da kryminalnaj adkaznaści (maksimalnaje pakarańnie — da troch hadoŭ abmiežavańnia voli).

Ale čynoŭniki ŭ kryminalnym zakanadaŭstvie Biełarusi stajać vyšej za prostych hramadzian. Za abrazu pradstaŭnika ŭłady, sudździ abo narodnaha zasiadaciela, a taksama prezidenta kryminalnaja adkaznaść nastupaje adrazu ž. I pakarańnie, viadoma, bolš surovaje. Za abrazu kiraŭnika dziaržavy — da dvuch hadoŭ pazbaŭleńnia voli.

Pravaabarončy centr «Viasna», pazbaŭleny ŭ Biełarusi rehistracyi, na dniach vystupiŭ z zajavaj, u jakoj zaklikaje vyraŭniać u hetym płanie čynoŭnikaŭ z prostymi hramadzianami.

U Biełarusi źjavicca jašče adzin palitviazień?

Aleh Voŭčak i šerah inšych pravaabaroncaŭ ličać, što Alaksandra Łapickaha varta pryznać palitviaźniem, bo prysud suda źjaŭlajecca palityčna matyvavanym.

«Jaho pieraśledujuć za krytyku, za hramadzianskuju pazicyju», — zajaviŭ surazmoŭca.

Kiraŭnik Biełaruskaha doma pravoŭ čałavieka Taćciana Raviaka adznačyła, što zajavy ab pryznańni Łapickaha palitviaźniem pakul zaŭčasnyja — prysud suda nie ŭstupiŭ u zakonnuju siłu, a abvinavačvany ciapier znachodzicca na voli.

«Adnak kali jon usio ž taki budzie nakiravany na prymusovaje lačeńnie, my budziem razhladać pytańnie ab pryznańni jaho palitviaźniem, bo parušany standart svabody vykazvańnia mierkavańnia. Infarmacyju pra spravu Łapickaha my ŭžo nakiravali ŭ mižnarodnyja arhanizacyi, — padkreśliła pravaabaronca. — My nastojvajem na dekryminalizacyi dyfamacyjnych pravaparušeńniaŭ» (za abrazu honaru i hodnaści).

Viadoma, što advakat Łapickaha maje namier abskardzić vyniesieny prysud.

• 0
• 0
• 0
• 0
• 0
• 0
• 0
• 0