Skazaŭšy "ej", musiš kazać i "bi"
Aperetkavaja vajna adnoj maleńkaj, ale hordaj respubliki suprać zvyšdziaržavy nia moža doŭžycca da biaskoncaści. Ale pakul što my nazirajem eskalacyju: amerykanskija dyplamaty abvieščany personami non hrata. Piša ŭ svaim błohu Alaksandar Kłaskoŭski.
Biełaruski MZS vyrašyŭ dapamahčy amerykancam vyznačycca. Pakolki tyja nie śpiašalisia na patrabavańńnie Miensku skaračać štat ambasady da piaci čałaviek, siońnia časovamu pavieranamu Muru ŭručany śpis dyplamataŭ, abvieščanych personami non hrata. Takim čynam, my majem eskalacyju dyplamatyčnaje vajny.
Tut užo dziejničaje lohika kanfliktu, miarkuje palityčny analityk Andrej Fiodaraŭ. Skazaŭšy "a", biełaruskaje kiraŭnictva musić kazać i "b", bo inačaj elektarat moža zasumniavacca ŭ mocy dy niepachisnaści pravadyra.
Na dumku palitolaha Valera Karbaleviča, tut adrazu niekalki syhnałaŭ. Amerykancam — kab nie nadumali ŭvodzić novyja sankcyi. Eŭraźviazu — kab nia ŭłaziŭ u "razborku" miž Mienskam dy Vašynhtonam. I narešcie — Maskvie, jakaja sama zahrazaje ŭ kanfrantacyi z Zachadam praz ruch Hruzii dy Ŭkrainy ŭ NATO: hladziecie, my taksama antyzachodniki, my — svaje, tak što nie łupicie siem skuraŭ za haz i h.d.!
Maskoŭski čyńnik u hetym kanflikcie z Amerykaj ci nie vyznačalny. Pad rasiejskim jadziernym parasonam možna nie bajacca juhasłaŭskaha ci irackaha varyjantu. A pakolki bambić nia buduć, to j mora pa kalena. Handal sa Štatami i tak byŭ nievialiki, a ciapier užo usio adno katu pad chvost. Eŭraźviaz nia strašny, bo da ekanamičnych sankcyj dałučacca vidavočna nie źbirajecca.
Tak što ryzyki nievialikija, a voś karyść dla ŭładaŭ moža być istotnaja. Pa-pieršaje, jość šaniec umacavać aljans z Maskvoj na pryncypie "pierniki za hatovaść lehčy pad tanki". Pa-druhoje, pierad vybarami na tle kanfrantacyi z ZŠA možna dadatkova prycisnuć apazycyju. Tym bolej što mienavita amerykanskaja ambasada ci najbolej spryjała palityčnym apanentam režymu.
Razam z tym, na dumku Valera Karbaleviča, u hetym abvastreńni jość taksama iracyjanalny składnik. Nadta ž chočacca adpomścić za kryŭdy. Uskosna hetaja chvaravitaja reakcyja moža śviedčyć pra toje, što Vašynhton usio ž patrapiŭ nastupić na balučy mazol.
Aperetkavaja vajna adnoj maleńkaj, ale hordaj respubliki suprać zvyšdziaržavy nia moža doŭžycca da biaskoncaści, i rana ci pozna sytuacyju daviadziecca ŭłahodžvać. I čym bolej krutuju kašu zavarać ajčynnyja stratehi zaraz, tym ciažej jaje budzie kaŭtać potym.
ZY. Zaraz ža, najchutčej, budzie naziracca toje, što psycholahi nazyvajuć zakonam eskalacyi kanfliktahienaŭ. Dla Ameryki ŭ niejkim sensie spravaju honaru stanovicca adkazać udaram na ŭdar. Čakajma novych sankcyj?
Kamientary