Łukašenka: Biełaruś mnohaje zrabiła dla pieraadoleńnia nastupstvaŭ katastrofy na ČAES

Biełaruś mnohaje zrabiła dla pieraadoleńnia nastupstvaŭ katastrofy na ČAES. Ab hetym zajaviŭ Prezident Biełarusi Alaksandr Łukašenka siońnia ŭ čas sustrečy z namieśnikam Hienieralnaha sakratara AAN, administrataram Prahramy raźvićcia AAN (PRAAN) Chielen Kłark.

«Vy adzin z tych redkich suśvietnych słužačych, jakija pabyvali ŭ rehijonach, što byli zabrudžany paśla avaryi na ČAES. Mnie z vami lohka razmaŭlać, tamu što vy, hetak ža jak i ja, bačyli ŭsio, što tam było. Vy bačycie, kolki my prykładajem namahańniaŭ na pieraadoleńnie hetych nastupstvaŭ», - skazaŭ jon.

Alaksandr Łukašenka padziakavaŭ Chielen Kłark i pamočniku Hienieralnaha sakratara, dyrektaru rehijanalnaha biuro pa krainach Jeŭropy i SND Džychan Sułtanahłu za ich układ u spravu pieraadoleńnia nastupstvaŭ čarnobylskaj katastrofy.

«Jość šmat u śviecie dobrych ludziej. Takich, jak vy, jak AAN, jakija dapamahajuć nam u pieraadoleńni hetaj katastrofy. Ale, zhadziciesia, heta niemahčyma suvymierać z tym, što zrabiła Biełaruś, - adznačyŭ kiraŭnik dziaržavy. - Składanaść usia ŭ tym, što čarnobylskaja katastrofa lahła na našy plečy paśla raspadu SSSR. My nie budavali hetu stancyju, nie ekspłuatavali, a biada ŭ asnoŭnym prypała na našu terytoryju. I raźličvać nam nie było na kaho».

Pavodle słoŭ Alaksandra Łukašenki, na adnaŭleńnie paciarpiełych terytoryj patračana suma, roŭnaja dziasiatkam hadavych biudžetaŭ Biełarusi. «My źbirali hetyja srodki i ŭkładvali ŭ pieraadoleńnie hetaj katastrofy. Siońnia nam užo nie zdajecca, što hetyja ziemli nazaŭsiody stračany, jak heta bačyłasia 30 hadoŭ tamu», - adznačyŭ biełaruski lidar.

Kiraŭnik dziaržavy padkreśliŭ, što Biełaruś nabyła ŭnikalnyja viedy i vopyt pa pieraadoleńni takich katastrof. «Niachaj heta budzie našym układam u raźvićcio čałaviectva. Vy pavinny viedać: kali, nie daj boh, niedzie zdarycca biada, našy vučonyja, śpiecyjalisty hatovy pracavać pa pieraadoleńni hetych nastupstvaŭ. Tak było zusim niadaŭna na «Fukusimie», dzie byli zadziejničany našy vopyt, viedy, prybory», - skazaŭ Prezident.

Alaksandr Łukašenka taksama ŭručyŭ Chielen Kłark i Džychan Sułtanahłu ordeny Francyska Skaryny za značny asabisty ŭkład u raźvićcio supracoŭnictva pamiž Biełaruśsiu i AAN pa praviadzieńni kompleksnaj reabilitacyi i zabieśpiačeńni ŭstojlivaha raźvićcia rajonaŭ, jakija paciarpieli ŭ vyniku katastrofy na Čarnobylskaj AES.

«My prymajem hetyja ŭznaharody ad asoby ŭsiaho piersanału AAN, tych, chto prymaŭ udzieł u prahramie reabilitacyi paciarpiełych ziamiel na terytoryi Biełarusi. My zaŭsiody adčuvali ćviorduju padtrymku kiraŭnictva Biełarusi ŭ spravie adnaŭleńnia hetych ziamiel», - skazała Chielen Kłark.

• 0
• 0
• 0
• 0
• 0
• 0
• 0
• 0