Delehacyi na pieramovach uznačalać premjer-ministry Biełarusi i Rasii Andrej Kabiakoŭ i Dźmitryj Miadźviedzieŭ. Na paradku dnia pasiadžeńnia — 27 pytańniaŭ.
Płanujecca, u pryvatnaści, razhledzieć płan mierapryjemstvaŭ pa stvareńni dadatkovych umoŭ dla raźvićcia handlova-ekanamičnaha supracoŭnictva, uchvaleny na pasiadžeńni Vyšejšaha dziaržsavieta SD 3 sakavika 2015 hoda, a taksama padrychtoŭku siarednieterminovaha prahnozu sacyjalna-ekanamičnaha raźvićcia Sajuznaj dziaržavy. Akramia taho, płanujecca razhledzieć prahnoznyja bałansy popytu i prapanovy pa najvažniejšych vidach pradukcyi na 2016 hod i prajekty kancepcyj šerahu sajuznych prahram.
U miežach mierapryjemstva projduć dvuchbakovyja pieramovy Andreja Kabiakova i Dźmitryja Miadźviedzieva, na jakich płanujecca abmierkavać aktualnyja pytańni dvuchbakovaha supracoŭnictva.
U liku takich pytańniaŭ — košt rasijskaha hazu, jaki pastaŭlajecca ŭ Biełaruś. Pieramovy na hetuju temu viaducca sa studzienia. Pradstaŭniki Rasii nieadnarazova zajaŭlali pra niemetazhodnaść źnižać canu na haz dla Biełarusi. Biełaruski bok ličyć, što maje prava raźličvać na źnižeńnie koštu da 80 dołaraŭ za tysiaču kubamietraŭ zamiest ciapierašnich 142.
U krasaviku dziaržsakratar SD Ryhor Rapota zajaviŭ, što Sajuznaja dziaržava hatova pry nieabchodnaści ŭmiašacca ŭ situacyju. «My hatovyja pravieści analiz. Hatovyja pahladzieć na heta razam ź fiederalnymi orhanami ŭłady, ale pakul idzie toje, što my nazyvajem «handal», — skazaŭ jon. Pry hetym Rapota nahadaŭ, što damova pamiž «Hazpromam» i Biełaruśsiu praduhledžvaje roŭnyja ŭmovy dla subjektaŭ haspadarki. «Heta, napeŭna, i jość asnoŭny matyŭ u abmierkavańniach cenavych paramietraŭ: ci parušajecca hety pryncyp abo nie parušajecca», — adznačyŭ dziaržsakratar.
U pačatku maja stała viadoma, što biełaruskaje daččynaje pradpryjemstva «Hazproma» — AAT «Hazprom transhaz Biełaruś» padało ŭ mižnarodny arbitražny sud pry Biełaruskaj handlova-pramysłovaj pałacie isk na biełaruskija hazazabieśpiačalnyja arhanizacyi ŭ suviazi z najaŭnaściu ŭ ich zapazyčanaści pa apłacie pastaŭlenaha pryrodnaha hazu.
Kamientujučy situacyju, vice-premjer Biełarusi Uładzimir Siamaška zajaviŭ žurnalistam: biełaruskija arhanizacyi płaciać za haz «absalutna pravilna i karektna», na padstavie dziejnych biełaruska-rasijskich mižuradavych pahadnieńniaŭ ab dostupie da pasłuh peŭnych manapolij ad 2011 hoda. Akramia taho, dadaŭ Siamaška, paradak farmiravańnia cen pry pastaŭkach pryrodnaha hazu ŭ Biełaruś vyznačany i pahadnieńniem ad 29 maja 2014 hoda ab Jeŭrazijskim ekanamičnym sajuzie.
«Hłavnoje»: chto staić za najbolšaj sietkaj rehijanalnych telehram-kanałaŭ Biełarusi. Jaje ślady viaduć u Rasiju4
Kamientary