U Minsku adklučyli ŭsie vuličnyja pitnyja fantančyki «ź mierkavańniaŭ ekanomii»
Adnym ź pieršych adklučyli krynicu artezijanskaj vady na vulicy Sierdziča ŭ Frunzienskim rajonie stalicy, paviedamlaje kp.by.
«U našym rajonie vadu ŭ vadapravod zabirajuć z pavierchnievych vod, tamu hadoŭ dziesiać tamu i adkryli hetu krynicu, — raspaviadaje minčuk Valeryj Paŭłavič. — Jaho ŭklučali ŭ kancy krasavika i da listapada. Vada tam čystaja, smačnaja. Uvieś rajon prychodziŭ da fantančyka z butelkami. Bo tuju, što idzie z krana, pić niemahčyma! Sioleta krynicu ŭklučyli ŭ krasaviku, a 11 maja vyklučyli. Ja telefanavaŭ u «Minskvodakanał». Tam adkazali, što ŭ metach ekanomii elektraenierhii ŭsie dekaratyŭnyja krynicy ŭ stalicy adklučyli. Kali ich znoŭ uklučać, nieviadoma».
«Krynica adklučany ŭ suviazi z adsutnaściu finansavańnia haradskimi ŭładami. Kali nam znoŭ stanuć pastupać hrošy, krynica pačnie pracavać», — patłumačyli ŭ «Minskvodakanale».
U Minharvykankamie ŭdakładnili, što biuviet adklučyli nie tolki ŭ parku 60-hodździa Kastryčnika na vuł. Sierdziča, ale i va ŭsim horadzie. Na ich vyrašyli ekanomić.
Pytańnie ab tym, kab zakryć biuviety, padymałasia i raniej. U «Minskvodakanale» kazali, što jany nie zapatrabavanyja, minčanie aktyŭna karystajucca tolki tryma-čatyrma. Ale da hetaha hoda dalej za razmovy sprava nie išła.
«Krynic vady ŭ Minsku dastatkova, u kožnaha ŭ chacie jość vada narmatyŭnaj jakaści. Usie handlovyja sietki taksama zabiaśpiečanyja vadoj. A krynic, u jakich vada ljecca dniom i nočču, u horadzie nie pavinna być, — prakamientavaŭ načalnik adździeła enierhietyki ŭpraŭleńnia haradskoj haspadarki i enierhietyki Minharvykankama Dźmitryj Płaškoŭ. — Ciapier nie tyja časy, kab tak nieaščadna raschodavać resursy. Usie 12 dekaratyŭnych krynic u stalicy adklučanyja i bolš pracavać nie buduć».
Žychary damoŭ kala lesaparkavaj zony «Miadźviežyna», dzie taksama pierastaŭ pracavać pitny fantančyk, źbirajuć podpisy i buduć padavać u Minharvykankam pietycyju za viartańnie biuvieta.
Miž tym, biaspłatnyja fantančyki ź pitnoj vadoj isnujuć pa ŭsioj Jeŭropie — ad Italii da Finlandyi. Naprykład, u Rymie takich fantančykaŭ kala dźviuch tysiač, šmat jakim ź ich sotni hadoŭ.
Akramia taho, vada ŭ damach minčukoŭ dalokaja ad ideału. Žychary Frunzienskaha, Maskoŭskaha i častki Kastryčnickaha rajonaŭ Minska pjuć chłaravanuju vadu ź Vilejska-Minskaj vodnaj sistemy. Pry hetym pieravod stalicy na padziemnaje vodazabieśpiačeńnie z artezijanskich krynic adkładajecca na nieviadomy termin, choć prablemu abiacali vyrašyć jašče ŭ 2013 hodzie.
Nahadajem taksama, što pa prahnozach ciapierašniaje leta abiacaje być vielmi haračym.
-
Hrodzienski fatohraf pradavaŭ fotasiesii, ale nie rabiŭ ich, a prajhravaŭ usie hrošy ŭ anłajn-kazino. Jon raskazaŭ, jak usio adbyvałasia
-
Łukašenka: Da kanca hetaha hoda my pavinny mieć svaje bojeprypasy da artyleryjskich sistem
-
Urad Cichanoŭskaj pryniaŭ pastanovu «Ab biełaruskim partyzanska-supraciŭnym ruchu»
Kamientary