«Niepaźbiežna miežy postsavieckich dziaržaŭ buduć pierahledžanyja». Što płanujuć dla Biełarusi rasijskija dziaržaŭnyja analityki?

«Nie mohuć pracavać intehracyjnyja struktury na pryncypie roŭnaści. Heta postimpierskaja intehracyja, tut adnaznačnaja pieravaha Rasii, i hetaja pieravaha pavinna być zamacavanaja ŭ lubych intehracyjnych strukturach», — adkryta kaža viadučy navukovy supracoŭnik Rasijskaha instytuta stratehičnych daśledvańniaŭ (RISD) Aleh Niemienski.

Kruhły stoł na temu «SND pierad abliččam novych vyklikaŭ i pahroz: uroki minułaha i pohlad u budučyniu» prajšoŭ u pres-centry dziaržaŭnaj miedyjahrupy «Rasija siońnia».

RISD — dziaržaŭnaja biudžetnaja ŭstanova, jakuju ŭznačalvaje hienierał-lejtenant Słužby źniešniej vyviedki Rasii Leanid Rašetnikaŭ.

Pa mierkavańni supracoŭnikaŭ RISD, Saviecki Sajuz štučna stvaryŭ biełaruskuju nacyju, adnak jaje «treba viarnuć u rasiejski śviet», a Alaksandr Łukašenka — «biełaruski nacyjanalistyčny palityk».

Analityki RISD, toj ža Niemienski, z žalem adznačajuć, što Biełaruś jašče zanadta niezaležnaja i «razmaŭlaje z Rasijaj na movie rusafobii i šantažu». 

Hałoŭny spažyvalnik takoj «analityki» — Administracyja prezidenta Rasiei.

Intehracyja dla Rasiei vyhadna tolki tady, kali jana moža dyktavać svaju volu susiedziam nie tolki faktyčna, ale i jurydyčna, kaža Niemienski, jaki ŭ RISD «adkazvaje» za pytańni, źviazanyja ź Biełaruśsiu.

«My možam pahladzieć na stary prykład sproby intehracyi — Sajuznaja dziaržava Rasii i Biełarusi, u jakim zamacavana roŭnaść udzielnikaŭ, choć heta navat śmiešna ŭjavić… Heta ŭ vyniku niaŭdałaja sproba intehracyi, pierš za ŭsio z-za roŭnaści hałasoŭ udzielnikaŭ», — kaža analityk-prapahandyst.

Praz toje, što Biełaruś takim čynam maje mahčymaść abaraniać svaje intaresy, intehracyja nie idzie, ščyra i cynična kaža Niemienski.

Pavodle mierkavańnia analityka RISD, absalutny impieratyŭ intehracyi na postsavieckaj prastory — «uźjadnańnie rasiejskamoŭnaj prastory».

Jon razhladaje anieksiju Kryma jak najvažniejšy prykład takoj «intehracyi». Takim čynam, taki ž los nie vyklučany i dla rasiejskamoŭnaj Biełarusi.

«Heta pryncypova novaja źjava na postsavieckaj prastory, kali miežy mianiajucca, i adbyvajucca niejkija intehracyjnyja pracesy… užo nie na asnovie miždziaržaŭnych adnosin, a na asnovie pryncypu ŭźjadnańnia rasiejskamoŭnaj prastory».

«Tamu niepaźbiežna miežy postsavieckich dziaržaŭ buduć pierahladacca, jany buduć mianiacca, tamu što hetyja miežy stvaralisia ŭ kabinietach, jany nie źjaŭlalisia vynikam samavyznačeńnia nacyj».

I pierahlad postsavieckich miežaŭ — hałoŭnaje pytańnie budučyni, kaža Niemienski.

«Mižnarodnaje prava patrabuje zachavańnia hetych miežaŭ. I hałoŭnaja kalizija — jak my abminiem patrabavańni mižnarodnaha prava», - dadaje analityk.

Pierš za ŭsio jon čakaje raspadu, dezintehracyi Ukrainy, pa vynikach čaho i buduć «vypracoŭvacca novyja normy» i «novyja miechanizmy intehracyi».

Jakija heta miechanizmy, možna nazirać, vierahodna, na prykładzie anieksii Kryma i ekanamičnaha šantaža Rasii, skiravanaha suprać Ukrainy i Biełarusi za apošnija 10—15 hod.

• 0
• 0
• 0
• 0
• 0
• 0
• 0
• 0