Ci vypadkova padzieńnie ahulnačałaviečaha ŭzroŭniu intelektu supała z raspaŭsiudžvańniem internetu?
Zdajecca, na našych vačach pamiraje adna spradviečnaja viera — u vyklučna pazityŭnuju rolu novych technałohijaŭ, piša ŭ fejsbuku žurnalist Vital Cyhankoŭ.
Vopyt usiaho čałaviectva pakazvaje, što lubaja novaja technałohija niejki čas źjaŭlajecca zdabytkam elity — ale potym stanovicca ahulnapryniataj, uvachodzić u šyrokija narodnyja masy, adpaviedna vałodańnie joj pierastaje davać pieravahi, pierastaje być znakam niejkaj abranaści. Tak było z radyjo, telefonam, televizaram, — a paźniej i internetam.
Zaraz navat zabaŭna ŭspaminać, jakija spadziavańni ŭskładalisia na raźvićcio internetu. Usurjoz ličyłasia, što dałučeńnie šyrokich narodnych masaŭ da suśvietnaj infarmacyjnaj sietki aŭtamatyčna padšturchnie ich da demakratyčnych i libieralnych kaštoŭnaściaŭ. Ličyłasia, što «niedaraźvityja» ludzi siadziać u televizary, a «raźvityja» — u internecie. I voś kali apošniaja babula narešcie vyjdzie ŭ Sieciva — to budzie nam demakratyčnaje ščaście. Nie vyjšła.
Uražvała, nakolki tut błytalisia pryčyny i nastupstva. Prosta prademakratyčnyja i prazachodnija biełarusy (taja samaja elita na pieršym etapie technałohii) pieršymi pryjšli ŭ internet i stvaryli sabie ŭražańnie, što tut «usie takija». Ale potym u internet pryjšli ŭsie astatnija, — i nie źmianilisia. Bo internet nie mianiaje ludziej, jak nie mianiaje ich telefon.
Hadoŭ z 10 tamu ja prydumaŭ i napisaŭ u FB žart: «Ličyć, što ludzi, jakija siadziać u internecie, bolš prahresiŭnyja — heta ŭsio roŭna, što ličyć, što ludzi, jakija jeździać u ekałahičnych tralejbusach, bolš prahresiŭnyja za tych, chto jeździć u aŭtobusach».
Bolš za toje, daŭno ŭžo paŭstaje zakanamiernaje pytańnie, jakuju škodu prynosiać novyja technałohii dla raźvićcia čałavieka. Šviecyja, nakolki ja čytaŭ, pryznała pamyłkovym ekśpierymient ličbavaha navučańnia ŭ škołach i viarnułasia da knihaŭ — bo elektronnyja nośbity «niehatyŭna ŭpłyvajuć na raźvićcio školnikaŭ».
Sfarmavałasia razumieńnie, što toj, chto čytaje knihi, značna bolš raźvity za taho, chto hartaje stužku instahrama ci tyktoka. Ja ŭžo nie kažu pra toje, što sacsietki mohuć stanavicca katalizataram peŭnych psichałahičnych prablem ludziej, što my štodnia nazirajem u fejsbuku.
Ja kaliści ŭžo raskazvaŭ pra ahulnapryznanuju statystyku, pavodle jakoj z kanca 1990-ch upieršyniu ŭ historyi nazirańniaŭ (z 1930-ch hadoŭ) IQ čałaviectva staŭ paśladoŭna źnižacca, i heta źnižeńnie praciahvajecca ŭžo 25 hadoŭ.
A ciapier zadumajemsia, ci vypadkova tak supała, što hetaje padzieńnie ahulnačałaviečaha ŭzroŭniu intelektu pačałosia mienavita razam z masavaj kampjutaryzacyjaj i raspaŭsiudžvańniem internetu.
I ci nie źjaŭlajucca palityčnyja i sacyjalnyja pracesy, vyniki hałasavańniaŭ u mnohich krainach jarkim śviedčańniem taho samaha siaredniestatystyčnaha źnižeńnia ŭzroŭniu intelektu? I jaki ŭpłyŭ na kalektyŭny rozum ludziej akaža masavaje raspaŭsiudžvańnie štučnaha intelektu, kali jahony spažyviec užo nie pavinien sam ničoha dumać i pamiatać, a prosta zadać pytańnie, i vieryć atrymanamu adkazu?
Stała viadoma, dzie pracuje favarytka Łukašenki Uładlena Zajcava19
Kamientary
druhoje: biez EVM i hłabalnaj pavuciny šmat jakich dasiahnieńniaŭ prosta nie było b, da prykładu ŭ toj žie farmateŭtycy ci lekavańni rakavych puchlin.
łuddyzm - projhryšnaja ideałohija, spadar Cyhankoŭ.
Kampjutar, internet, štučny intelekt dapamahajuć ludziam tupieć tolki ŭ adnoj prościeńkaj umoŭnaj madeli:
kali jany vyrašajuć častku zadač, jakija raniej vyrašaŭ čałaviek, i z-za taho častka ŭmieńniaŭ čałavieka pryncypova źnikaje.
Takoje spraviadliva tolki na davoli śpiecyfičnych prykładach: naprykład, aryfmietyka biez kalkulatara.
A ŭvohule čałaviek pačynaje vyrašać inšyja zadačy, nie mienš składanyja: jak zaprahramavać toj kampjutar abo chacia b prosta pracavać na im.
Heta ŭsio ž trochi składaniej za čytańnie haziety i buchhałtarski ŭlik na papierkach.
Adnak nie nastolki, jak nam žadajecca - kab čałaviek pierajšoŭ na niejki novy ŭzrovień na 2 hałavy vyšej. Mabyć, adsiul i rasčaravańnie.
2) Siońnia dostup da luboj knihi śvietu ŭ kožnaha ŭ kišeni.
3) Čałaviek nie parazumnieje, kali pračytaje nie tuju knihu, a inšaja budzie niedastupnaj. Narodžanamu ŭ SSSR varta pamiatać pra takuju pahrozu.
4) "Paśla hetaha" i "razam z hetym" nie značyć "z pryčyny hetaha".
5) Chto skazaŭ, što čałaviectva durnieje?
Pakažycie mnie hetaha razumnika.
6) Niežadańnie vučycca karystacca dasiahnieńniami cyvilizacyi nie padstava źniščać cyvilizacyju.
7) U Šviecyi "elektronnyja nośbity nie tak upłyvajuć"? Hł. p. 6.
Urešcie možna zhasić śviatło i vučycca pry śviečkach, bo niapravilnaje aśviatleńnie psuje zrok.
Badaj samaja lepšaja školnaja adukacyja ŭ śviecie finskaja, dzie admovilisia ad piśma rukami, a francuzy, zdaŭna i siońnia samyja lepšyja u śviecie matematyki, ad pieršaje klasy karystajucca kalkulatarami biez adviečnaha savieckaha "ustnoho sčieta".
Paasobnyja frahmienty erudycyi nie bolš jak frahmienty erudycyi, nie varta rabić ich kultam ci arhumientam "ad usiaho".
8) "Ja dzieści čytaŭ" nie značyć "voś vam recept".