Mikołka-paravoz

I jak praŭ byŭ Mikołkaŭ baćka, kali kazaŭ jamu na paravozie
My nie možam nie pieramahčy!
Pieramahli!
Michaś Łyńkoŭ, «Mikołka-paravoz».

Prezident Łukašenka pradstaviŭ publicy svajho spadkajemcu na pasadzie kiraŭnika krainy – 4-hadovaha syna Mikołku. Takim čynam, faktyčna, Biełaruś ustupiła ŭ pieryjad manarchii.

Heta ŭžo druhaja źmiena palityčnaj sistemy našaj krainy paśla 1996 hodu, kali Biełaruś z maładoj demakratyi była pieratvorana ŭ aŭtakratyčnuju dziaržavu. Tady źmiena adbyłasia z hrubymi parušeńniami Kanstytucyi. Za 17 antykanstytucyjnych dziejańniaŭ Viarchoŭny Saviet pryznačyŭ Łukašenku praceduru impičmientu, u adkaz na što prezident z dapamohaj vysokich čynoŭnikaŭ z Maskvy razahnaŭ i Viarchoŭny Saviet i Kanstytucyjny sud.

Novaja źmiena palityčnaj sistemy taksama adbyvajecca z parušeńniami zakonaŭ i Kanstytucyi. Dastatkova skazać, što ŭ 2005 hodzie Łukašenka nazvaŭ u dekłaracyi ab dachodach tolki dvuch darosłych synoŭ i ni słovam nie zhadaŭ treciaha, małodšaha.

Novaja palityčnaja sistema, jak jaje ni nazyvaj, pa sutnaści źjaŭlajecca siaredniaviečnaj manarchijaj z ułaścivym dla jaje absalutyzmam spadčynnaj ułady kiraŭnika. Dahetul Łukašenka i jaho atačeńnie, mianiajučy palityčnuju sistemu, spasyłalisia najčaściej na prykład respublikanskaj Francyi (kali praciahvali pieršy prezidencki termin da siami hadoŭ i kali stvarali Nacyjanalny schod RB). Ciapier ža abirajecca źniešnie bolš padobny da anhlijskaha varyjant. Niezdarma niekatoryja analityki padkreślivajuć, što Mikołka źjaviŭsia na publicy paśla sustrečaŭ Łukašenki z anhlijskim łordam Bełam, jaki, nibyta, uziaŭsia “padpravić imidž” apošniaha dyktatara Jeŭropy.

Praŭda, u adroźnieńnie ad anhlijskaj manarchii, biełaruskaja maje ŭ rukach usiu paŭnatu ŭłady, šukaje siabroŭ siarod krainaŭ-izhojaŭ i całkam ihnaruje histaryčnyja tradycyi svajoj krainy, addajučy pieravahu vobrazam Stalina i palitycy rusifikacyi.

Pavodle dziejnaj Kanstytucyi Biełarusi 4-ch hadovy Mikołka zmoža ŭstupić na pasadu prezidenta tolki praz 31 hod. Jahonamu baćku, vierahodna, chopić ułasnaj chitraści i jakaści miedyčnaj absłuhi, kab daciahnuć da inaŭhuracyi syna. Jamu tady budzie 85 hadoŭ. Adnak nichto nie viedaje, jakija vichury napatkajuć Biełaruś praz šeść piacihodak, i hłybokamu staromu budzie niaprosta abaranić pierajemnika. Ź inšaha boku, času dastatkova, kab jašče nie adzin raz źmianić Kanstytucyju. Nie vypadkova ideja Łukašenki pra skaračeńnie terminu siaredniaj adukacyi supała z prezientacyjaj na BT jaho małodšaha syna ŭ jakaści nastupnaha prezidenta.

Zaŭvažym, što nichto nie viedaje, jakim vyraście Mikołka. I čym dalejšy termin inaŭhuracyi, tym bolej u jaho šancaŭ prajavić siabie jak z dobraha boku, tak i z kiepskaha. Jakija-niebudź zahuły maładoha bonvivana z prastytutkami dy narkotykami mohuć elemientarna pierakreślić płany Łukašenki na pieradaču ŭsienarodnaj lubovi ad siabie – synu.

Tak ci inakš, a minimalny ŭzrost nastupnaha prezidenta, jaki, vierahodna, prymie biełaruski elektarat – uzrost vajskovaj prysiahi, 18 hadoŭ. Heta značyć, što pry Łukašenku-starejšym nam daviadziecca žyć jašče, jak minimum, stolki ž, kolki my pry im pražyli – 14 hadoŭ. Varta ŭśviadomić sabie hety termin i nastroicca na plonnuju pracu – najpierš dziela budučyni ŭłasnych dziaciej, dabrabytu i zachavańnia nacyjanalnych tradycyj. Adna z hetych tradycyj vučyć: spadziavajsia na lepšaje, a rychtujsia da horšaha.

Usienarodnaja luboŭ – vialikaja źjava. Jana tolki macnieje ŭ vyprabavańniach. Na toje i spadziajecca Łukašenka, što jahonaha synka palubiać hetaksama, jak jaho samoha. Adnak zaŭvažym, što ŭ hetaha miedala jość i advarotny bok. Hadavańnie sabie na źmienu ŭłasnaj kryvinki śviedčyć pra tuju ahromnistuju prorvu niedavieru, što adździalaje praviciela ad ŭsiaho biełaruskaha čynavienstva i ad naroda, dzie ŭ jaho niama ani siabra, ani choć kolki-niebudź vartaha namieśnika. Hety momant moža stać jak absalutnym plusam, tak i absalutnym minusam prezidenta.

Symon Muzyka, hazeta Svaboda

• 0
• 0
• 0
• 0
• 0
• 0
• 0
• 0