STAA «Biełviest» płanuje vykupić dziaržpakiet akcyj, i kancern «Biellehpram», jaki vałodaje 55% akcyj, nie piarečyć, paviedamiŭ 10 červienia na pres-kanfierencyi ŭ Minsku staršynia kancerna Mikałaj Jafimčyk.
«Tam vielmi surjozny mieniedžmient, dosyć paśpiachovaje pradpryjemstva. Navat u vielmi składanych umovach, pryciahvajučy dastatkova surjoznyja inviestycyi, jany ŭmudrajucca ŭsio heta absłuhoŭvać. Prytym što rynak prasieŭ značna, a 90% jany pradajuć na ekspart, i ŭ asnoŭnym u Rasii. Dla pryniaćcia rašeńnia ab prodažy nieabchodnaja, pa mienšaj miery, biźnies-prahrama, biźnies-abhruntavańnie dla taho, kab heta pradpryjemstva vykupiła nie dziela vykupu, a dziela raźvićcia», — adznačyŭ Jafimčyk. Pavodle jaho słoŭ, razhladajecca niekalki varyjantaŭ.
Na pytańnie ab mahčymaści stvareńnia chołdynhu na bazie «Biełviesta» jon adkazaŭ: «Na praciahu mnohich hadoŭ razhladalisia varyjanty abjadnańnia z harbarnym zavodam u Hatavie i ź minskim abutkovym AAT» Pramień», i lidskaje abutkovaje pradpryjemstva, i «Biełkielmie». U «Marka» ŭsio skončyłasia ŭkazam prezidenta i vykanańniem jaho pa stvareńni chołdynhu. Pa «Biełvieście» my taksama spadziajemsia davieści ŭsio da łahičnaha zaviaršeńnia. Što tam budzie, jak budzie nazyvacca, chołdynh ci inšaja struktura, albo z «Pramieniem», albo z Hatavam, heta ŭsio siońnia na stadyi prapracoŭki. Na najbližejšaj sustrečy ŭ Viciebsku z dyrektaram pradpryjemstva my budziem vychodzić na toje, kab vynosić niejkija dakumienty».
Pry hetym Jafimčyk adznačyŭ, što abjadnańnie z «Pramieniem» — davoli składanaja pracedura z-za taho, što im vałodaje šmat ułaśnikaŭ, pa Hatavie taksama jość pytańni. «Prosta tak abjadnać i ničoha ad hetaha nie mieć? Tamu rychtujem surjoznaje biźnies-abhruntavańnie», — zajaviŭ čynoŭnik.
STAA Belwest — biełaruska-rasijskaje pradpryjemstva. Asnoŭnyja kirunki: vytvorčaść abutku, roźničny handal abutkam, roźničny handal aksiesuarami i spadarožnymi tavarami. Pradpryjemstva stvorana ŭ 1988 hodzie. La vytokaŭ jaho zasnavańnia stajali dva vytvorcy abutku — viciebskaja fabryka «Čyrvony Kastryčnik» i niamieckaja kampanija Salamander. Belwest vypuskaje 2 młn. par abutku ŭ hod. Roźničnaja sietka naličvaje 350 firmiennych mahazinaŭ u Biełarusi, Rasii i Łatvii. U kampanii pracuje kala 4000 supracoŭnikaŭ.
Kamientary