«U RUUS daviedałasia, što mahu źmiaščacca na piaci arkušach papiery A4» — padazravanaja ŭ zakidvańni farbaj BT raspaviała pra svajo zatrymańnie

Aktyvistaŭ anarchičnaha ruchu, jakich 13 červienia zatrymali pa padazreńni va ŭdziele ŭ akcyi suprać prapahandy Biełaruskaha telebačańnia, 16 červienia adpuścili na volu. Ciapier jany znachodziacca ŭ statusie padazravanych pa spravie, zaviedzienaj pa č.2 art.339 Kryminalnaha kodeksa «Chulihanstva, ździejśnienaje paŭtorna, albo hrupaj asobaŭ». Adna z aktyvistak, jakaja prasiła nie nazyvać svajho imia, raspaviała «Našaj Nivie» padrabiaznaści zatrymańnia i svajho znachodžańnia za kratami:

Pavialičyć

«Mianie zatrymali kala stancyi mietro Partyzanskaja. U hety momant ja razmaŭlała z maci i ŭžo padychodziła da pierachodu ŭ mietro, da mianie zzadu padbiehli niekalki čałaviek i schapili pad ruki. Ja pačała supraciŭlacca i kryčać, jany tut ža pakazali mnie milicejskija paśviedčańni i paciahnuli da mašyny. Ludziam, jakija źviartali na nas uvahu, jany taksama pakazvali dakumienty i zahadvali nie ŭmiešvacca. Jak tolki jany mianie pasadzili ŭ aŭtamabil, to pačali pytacca, ź jakoj kvatery ja tolki što vyjšła, i niešta pra narkotyki. Ja skazała, što da nijakich narkotykaŭ ja nie datyčnaja i što jany pamylilisia.

Pavialičyć

Paśla maich słoŭ paviarnuŭsia kiroŭca i skazaŭ svaim naparnikam, kab jany nie razyhryvali kamiedyju i skazali, za što mianie zatrymali. Paśla hetych słoŭ mnie paviedamili, što ja zatrymanaja pa padazreńni ŭ zakidavańni farbaj BT. Zatrymlivali mianie supracoŭniki Hałoŭnaha ŭpraŭleńnia pa baraćbie z arhanizavanaj złačynnaściu (HUBAZ), adzin ź jakich heta apieratyŭny supracoŭnik, jaki vioŭ «spravu hraficistaŭ» i «spravu antyfašystaŭ» Łunievič Ihar Paŭłavič, druhi — Lavonaŭ Dźmitryj Leanidavič. Dadzienyja treciaha čałavieka ja nie viedaju, ale jon prychodziŭ da mianie na Akreścina dla hutarki. Ja prachodžu jak padazravanaja pa artykule 339 častka 2 «Złosnaje chulihanstva, učynienaje hrupaj asob».

Paśla zatrymańnia mianie pavieźli ŭ maju kvateru na pieratrus. Paśla pieratrusu my pajechali ŭ HUBAZ, paśla mianie advieźli ŭ RUUS, dzie ja prabyła sutki.

U RUUS byli samyja žudasnyja ŭmovy, łaŭki tam kamiennyja, i ŭ kalidory zaŭsiody adčynieny dźviery, praź jakuju vyvodziać i zavodziać źniavolenych na etap. Było vielmi choładna ŭ kamiery, ja ratavałasia tym, što padkładała liściki pa svajoj spravie i sprabavała na ich spać. U vyniku, ja daviedałasia, što mahu źmiaščacca na piaci arkušykach papiery A4.

Tam mianie naviedvali tolki adny dumki — chutčej by advieźli na Akreścina, tam ciaplej i jość koŭdra. U RUUS nie karmili, bolš za sutki vypała pabyć hałodnaj. U aŭtorak nočču mianie advieźli na Akreścina, tam daviałosia tyrčeć niekalki hadzin u «šklancy », pakul pryniali ŭsich zatrymanych. Umovy ŭ paraŭnańni ź Pieršamajskim RUUS dobryja.

U sieradu da mianie prychodziŭ pradstaŭniki HUBAZ na razmovu, i ŭžo ŭ čaćvier viečaram mianie adpuścili.

Mianie zatrymlivali da hetaha pa administracyjnych spravach. Maksimum, što było da hetaha, heta praviedzienaja noč na Akreścina padčas prezidenckich vybaraŭ.

Niejkich pramych pahroz nie było. Heta chutčej była hulnia. Takoje ŭražańnie, što apieratyŭnikaŭ zabaŭlaje toje, što jany mohuć pasadzić čałavieka u turmu na niekalki hod. Mnie kazali, što pakul ja tut hulaju ŭ partyzanku, inšyja mianie zdaduć i h.d.

Adzinaja siłavaja forma hvałtu była paśla majoj sproby ŭciokaŭ, kali ja padčas pieratrusu vybiehła z ułasnaj kvatery i paśpieła prabiehčy niekalki pavierchaŭ, pakul mianie nie schapili apieratyŭniki.

Ja była hatovaja, što padoŭžać zatrymańnie i etapujuć u Žodzina. I kali śledčy namiaknuŭ mnie, što siońnia mianie adpuściać, heta była vielmi radasnaja viestka. Ale ja ŭsio ž była ździŭlenaja. U našaj krainie lepš zaŭsiody rychtavacca da horšaha, navat kali ty nie rabiŭ nijakich złačynstvaŭ».

• 0
• 0
• 0
• 0
• 0
• 0
• 0
• 0