Rychtujecca prodaž «Palimiru» i «Naftanu»

Razhladajecca varyjant prodažu akcyjaŭ samych prybytkovych i samych pryvabnych pradpryjemstvaŭ adzinym haspadarčym kompleksam, zajaviŭ 20 traŭnia namieśnik staršyni kancernu Michaił Asipienka.

Da kanca hodu kancern planuje padać na razhlad uradu prapanovy pa pryvatyzacyi pradpryjemstvaŭ «Palimir» i «Naftan». «Razhladajecca varyjant prodažu akcyjaŭ pradpryjemstvaŭ adzinym haspadarčym kompleksam», ‑‑ zajaviŭ 20 traŭnia namieśnik staršyni kancernu Michaił Asipienka.

Na siońnia «Biełnaftachim» viadzie pieramovy z dvuma patencyjnymi investarami. «Chutčej za ŭsio, dola investara budzie roŭnaj ź dziaržaŭnaj dolaj, my planujem 50 na 50, razumieńnie patencyjnych pakupnikoŭ u hetym jość», — paviedamiŭ M. Asipienka. Pavodle jaho infarmacyi, acenku pradpryjemstvaŭ praviaduć mižnarodnyja eksperty. Zhodna prahramaŭ u raźvićcia ŭ «Palimir» nieabchodna investavać $1,8 młrd, a ŭ «Naftan» — zvyš $600 młn.

Pavodle BiełaPAN

Taciana Manionak: «Palimir» i «Naftan» najchutčej nabudzie «Łukojł»

Ahladalnica hazety «Biełorusy i rynok» kamentuje zajavu namieśnika staršyni kancernu Michaiła Asipienki pra prodaž akcyjaŭ pradpryjemstvaŭ stratehičnamu investaru adzinym haspadarčym kompleksam.

Najpierš adznaču, što heta absalutna narmalny praces. Čatyry hady tamu taki varyjant razhladaŭsia i ŭžo pakupniki znajšlisia, adnak ich spałochali prapanavanyja ŭradam Biełarusi ŭmovy. U 2006 hodzie taksama mierkavali abjadnać «Palimir» i «Naftan» u adno pradpryjemstva. Tady na toj vierajemny kompleks pretendavali rasiejskija «Słaŭnafta» i «Łukojł», jakija damovilisia nabyć jaho paroŭnu. Iznoŭ nie atrymałasia. Siońnia, zvažajučy na los ułaśnika «Słaŭnafty» Michaiła Hucaryjeva, zastaŭsia «Łukojł». Jon i budzie, na maju dumku, najbolš imaviernym stratehičnym pakupnikom. Dyj jak ža inakš, bo ŭjavicie sytuacyju, kali «Biełnaftachim» pradaje abjadnańnie zachodniamu investaru: na zaŭtra ž nam adklučać pastaŭki nafty. Našaja naftapierapracoŭka mocna zaležyć ad syraviny. U vypadku prodažu pradpryjemstvaŭ rasiejcam, možna budzie raźličvać na lepšyja ŭmovy z pastaŭkaj syraviny. I «Naftan», i «Palimir», zvažajučy na vielizarnyja srodki, zakładzienyja ŭ prahramy raźvićcia, majuć vostruju patrebu ŭ stratehičnym investary. Bo dziaržava zabiraje sabie zvyšprybytki ad pierapracoŭki nafty. Vytvorčaści «Naftanu» byli madernizavanyja, što spryjaje popytu na jaho pradukcyju na Zachadzie. Ale takaja madernizacyja musić być stałaj, kab nie adstavać ad technalohijaŭ. I tut samim nia spravicca.

Nia dumaju, što praces akcyjanavańnia pradpryjemstvaŭ «Biełnaftachimu» budzie chutkim. Varta čakać handlu z abodvuch bakoŭ. Na pradpryjemstvach lažać ciažkim hruzam nievytvorčyja aktyvy, sacyjalnyja abjekty. Ale praces hety niezvarotny. Nam zastajecca tolki spadziavacca, što ŭrad zrobić heta prafesijna, biaz strataŭ dla našaha biudžetu.

Zapisaŭ Siamion Piečanko

• 0
• 0
• 0
• 0
• 0
• 0
• 0
• 0