Pra heta paviedamiła pres-aficer adździaleńnia infarmacyi i hramadskich suviaziej UUS Viciebskaha abłvykankama Volha Škuratava.
Rovarny złodziej byŭ zatrymany supracoŭnikami Kastryčnickaha RAUS u chodzie apieratyŭnych mierapryjemstvaŭ. Niepracujučy mužčyna 1993 hoda naradžeńnia, raniej sudzimy za dačnyja kradziažy, pryznaŭsia ŭ tym, što ź viasny 2016 hoda vykraŭ u viciablan 9 rovaraŭ i skutar.
«Kradziažy jon ździajśniaŭ uviečary, vykradaŭ rovary, jakija byli pakinutyja na leśvičnych placoŭkach šmatkvaternych žyłych damoŭ. Złodziej zachodziŭ u padjezd razam z žycharami, jakija viartalisia dadomu. Pravodziŭ raźviedku: prachodziŭ pa leśvicy da apošniaha paviercha i zaŭvažaŭ, dzie možna pažyvicca rovaram. Śpiecyjalnyja trosy, jakimi ŭładalniki prymacoŭvali svoj transpart, nie byli pieraškodaj dla złodzieja — mužčyna pierakusvaŭ abaronu nažnicami pa mietale», — raspaviała Volha Škuratava.
Jak praviła, jon kraŭ darahija rovary, a zatym pradavaŭ ich pa nizkaj canie (litaralna za 1 młn rubloŭ). Apošnija kradziažy byli ździejśnienyja zusim niadaŭna — 28 červienia (dva rovary byli skradzienyja ŭ studentaŭ Viciebskaha dziaržaŭnaha univiersiteta imia Mašerava). Usie rovary kanfiskavanyja i buduć viernutyja ŭładalnikam.
Usiaho z pačatku hoda ŭ Viciebskaj vobłaści zajaŭlena ab kradziažy 219 rovaraŭ. Treciaja častka złačynstvaŭ ździejśnienaja ŭ abłasnym centry. Pravaachoŭniki adznačajuć, što bolšaść vypadkaŭ — heta kradziažy biez uzłomu, a pałova vykradańniaŭ ździejśnienaja ź leśvičnych placovak. Raskryvać takija złačynstvy vielmi ciažka, uładalnikam viartajecca tolki 30% skradzienaj majomaści.
Prablema ŭ tym, što čaściakom u pašpart rovara nie ŭpisvajecca numar, pa jakim transpartny srodak možna identyfikavać. Taksama pravaachoŭniki rekamiendujuć uładalnikam ŭ jakaści zamykalnaj pryłady vykarystać nie tros (jaho lohka pierakusić), a prystasavańni z sucelnaha mietału. Akramia taho, pakidajučy transpart na vulicy, kala kram i inšych abjektaŭ, treba vybirać miesca, jakija traplajuć u pole ahladu kamier nazirańnia.
Va UUS raspaviali i pra kurjozny vypadak z kradziažom rovara, jaki adbyŭsia ŭ Oršy. Tam złodziej pierafarbavaŭ svoj trafiej i pajšoŭ ź im na miascovy plaž, kab pradać kamu-niebudź z adpačyvalnikaŭ. Volaju losu złačyniec prapanavaŭ rovar jaho ŭładalniku, jaki raspaznaŭ svaju majomaść i paviedamiŭ pra heta ŭ milicyju.
Śpiavak Dźmitryj Kałdun pakazaŭ svaju minskuju kvateru niedaloka ad Drazdoŭ ŠMAT FOTA16
Kamientary