Žycharka Biarozaŭskaha rajona pamierła paśla ŭžyvańnia ŭ ježu śviežapryhatavanych hryboŭ, paviedamiła zahadčyca adździaleńnia hihijeny charčavańnia Bresckaha abłasnoha centra hihijeny, epidemijałohii i hramadskaha zdaroŭja Halina Dul.
U vyniku epidrasśledavannaja vyjaŭlena, što 58-hadovaja žycharka vioski Ździtava 31 lipienia ŭžyvała ŭ ježu papiarednie advaranyja smažanyja čyrvonahałoviki, padbiarozaviki i syraježki. Pa miedycynskuju dapamohu jana źviarnułasia 5 žniŭnia. Z papiarednim dyjahnazam «atručeńnie hrybami» i charakternymi dla charčovaha atručeńnia simptomami (młosnaść, vanity, vadki stuł) paciarpiełaja była dastaŭlenaja ŭ reanimacyjnaje adździaleńnie Biarozaŭskaj centralnaj rajonnaj balnicy, dzie 7 žniŭnia pamierła.
«Jak miarkujecca, žančyna atruciłasia blednaj pahankaj, jakuju mahła zbłytać ź jadomymi hrybami. Atručeńnie blednaj pahankaj asabliva niebiaśpiečna svaim doŭhim inkubacyjny pieryjadam, jaki moža praciahvacca da 40 hadzin. Za hety čas jady, jakija nie źniščajucca ni pry jakoj kulinarnaj apracoŭcy, usmoktvajucca ŭ kroŭ i mohuć pryvieści da niezvarotnych źmien u arhaniźmie čałavieka», — patłumačyła Halina Dul.
Usiaho z pačatku hoda na terytoryi vobłaści zarehistravana 8 vypadkaŭ charčovych atručeńniaŭ hrybami, u tym liku try ŭ Breście i pa adnym — u Baranavičach, Žabinkaŭskim, Kamianieckim, Kobrynskim i Biarozaŭskim rajonach. Apošni ź ich i staŭ śmiarotnym. Siarod paciarpiełych darosłyja ludzi va ŭzroście ad 34 da 88 hadoŭ. Jany ŭžyvali ŭ ježu smaržki, padzialonki, padbiarozaviki i nieviadomyja hryby. Na hetuju ž datu 2015 hoda ŭ Bresckaj vobłaści było zarehistravana dva vypadki atručeńnia hrybami z dvuma paciarpiełymi.
«Drennaje viedańnie nasielnictvam vidavoha składu hryboŭ i ihnaravańnie pravił ich zboru i apracoŭki ciahnuć za saboj niepradkazalnyja nastupstvy — ad vostrych formaŭ atručeńnia da śmiarotnych vynikaŭ. Pryčym vypadki atručeńnia rehistrujucca ŭ rozny čas hoda, a nie tolki ŭ siezon zboru. Kab nie padviarhać siabie i svaich blizkich niebiaśpiecy, nie varta brać u lesie nieviadomyja hryby, kuplać ich u nieŭstanoŭlenych dla handlu miescach. Va ŭsich vypadkach atručeńniaŭ nieabchodna terminova źviartacca pa miedycynskuju dapamohu. Čym raniej špitalizujuć paciarpiełaha, tym bolš budzie šancaŭ na spryjalny zychod», — reziumavała Halina Dul.
Kamientary