Sudy nad Fińkievičam i Sasimam
4 traŭnia ŭ Pieršamajskim sudzie Miensku pačaŭsia sud nad Arturam Fińkievičam.
19-hadovaha chłopca aryštavali za naniasieńnie palityčnych hrafici. Ale vinavaciać jaho nie ŭ palitycy, a ŭ naniasieńni škody hramadzkaj majomaści na amal 17 tys. dalaraŭ – «u asabliva bujnym pamiery». Chłopcu pahražaje ad 7 da 12 hadoŭ źniavoleńnia.
Dziaciuk trymajecca mužna. Jon pryznaŭ, što nanosiŭ nadpisy «Dostał» i «My chočam novaha» ŭ rajonie vulicaŭ Kazłova j Płatonava ŭ Miensku, ale patłumačyŭ heta žadańniem vykazać svaju palityčnuju pazycyju – što jon nia moh zrabić inšymi sposabami z pryčyny manapalizacyi ŚMI i parušeńnia inšych kanstytucyjnych svabodaŭ u krainie.
Pravaabaroncy ličać absurdnymi abvinavačvańni ŭ naniasieńni škody ŭ «asabliva bujnym pamiery» praź dziasiatak hrafici.
Sud byŭ adkładzieny, bo sudździa zapatrabavaŭ ad pradstaŭnikoŭ kamunalnych słužbaŭ dokazaŭ taho, što ŭron ad dziejańniaŭ Fińkieviča sapraŭdy nastolki vialiki.
Padčas akcyi ŭ abaronu Fińkieviča zatrymanyja Kryścina Šacikava (50 b.v. štrafu), Alaksiej Kazulin, Jury Tałstoj, Alaksandar Reźnikaŭ, Andrej Ihnatčyk, Nadzieja Batura (usich pakarali aryštam na 5 sutak). Zatrymanych žurnalistak Tacianu Śnitko i Natallu Vałakidu vyzvalili paśla prahladu aperatyŭnych zdymak.
Adkłaŭsia j sud nad Mikitam Sasimam u Baranavičach, raspačaty ŭ toj samy dzień. Jon pieraniesieny na 11 traŭnia. Unačy pierad sudom u Baranavičach zatrymali abaroncaŭ namiotavaha miastečka Luboŭ Kačynskuju, Kaciarynu Dziatkoŭskuju i Nastaśsiu Koršun padčas rasklejki nalepak «Svabodu Sasimu»: usim dali štrafy pa 2 b.v.
Fłeš-moby nie zhasajuć
4 traŭnia padčas fłeš-mobu na vystavie «ŚMI ŭ Biełarusi» byli zatrymanyja kala 10 čałaviek: ich zatrymali supracoŭniki AMAPu, jak tolki jany źjavilisia. Staršy inspektar HUUS Mienharvykankamu Siarhiej Siviec papiaredziŭ pra adkaznaść za arhanizacyju fłeš-mobu žurnalistaŭ ahiencyjaŭ Biełapan, Associated Press i Reuters: maŭlaŭ, jany zadavali pytańni, jakija padšturchoŭvali junakoŭ i dziaŭčat da procipraŭnych dziejańniaŭ.
Fotakarespandentaŭ Siarhieja Hryca (Associated Press) i Vasila Fiadosienku (Reuters) zatrymali 4 traŭnia kala čyhunačnaha vakzału, dzie jany mieli fatahrafavać fłeš-mob «Šukajem čałavieka». Pravaachoŭniki zatrymali 21 čałavieka: ź ich byli jak hramadzkija aktyvisty (Dzianis Karnoŭ, Kastuś Usianok, Volha Sakałova, Taciana Šyš, Pavał Procharaŭ, Darja i Volha Hudkovy, Uładzimier Dubovik, Kryścina Šacikava, Jasiniaŭski), tak i vypadkovyja minaki. Niepaŭnaletniaha Jaŭhiena Hrynieviča pry zatrymańni ŭdaryli pa hałavie. U Kastryčnickim RUUS AMAPaŭcy skazali, što mieli plan na 25 zatrymanych.
7 traŭnia kala Nacyjanalnaj biblijateki byli zatrymanyja 12 udzielnikaŭ fłeš-mobu «Hod biez Skaryny» z nahody hadaviny pierajmienavańnia praspektaŭ Skaryny j Mašerava. U razhonie akcyi ŭdzielničali 25 supracoŭnikaŭ u cyvilnym.
Pierad Čarnobylskim šlacham
Alaksandra Ramanoviča, aktyvista štabu Milinkieviča ŭ Pinsku, 21 krasavika asudzili na 7 sutak aryštu, źvinavaciŭšy ŭ niecenzurnaj łajancy.
U Baranavičach 24 krasavika padčas raspaŭsiudu ŭlotak pra Čarnobylski šlach zatrymali abaroncu namiotavaha miastečka Valerja Šyłu. Nastupnaha dnia jaho asudzili na 5 sutak aryštu.
Pierad Čarnobylskim šlacham 25 krasavika nieviadomyja ŭ cyvilnym uziali ŭ abłohu kvateru hramadzkaha aktyvista Alaksieja Manieviča ŭ Kalinkavičach, kali jon nie puściŭ ich da siabie dadomu.
U Babrujsku 25 krasavika zatrymali hramadzkich aktyvistaŭ Mikitu Bycenku, Jurja Śvietłakova, Alaksieja Radomskaha, Jurja Radzimoŭskaha: noč jany praviali ŭ IČU. 3 traŭnia sud ich apraŭdaŭ, bo paličyŭ, što vinu abvinavačanych pavinna dakazvać milicyja, a aktyvisty majuć prezumpcyju nievinavataści.
Napiaredadni 26 krasavika ŭ Łunincy milicyjanty nastojliva patrabavali ad miascovaha aktyvista Vitala Karatyša źjavicca na razmovu.
Na 26 krasavika atrymali pozvy ŭ haradzienski vajenkamat Tadevuš Havin, Eduard Dmuchoŭski (BSDH), Andrej i Stanisłaŭ Pačobuty. U Ščučynie na hety samy dzień atrymaŭ vyklik u milicyju aktyvist BNF Mikoła Chilmanovič. U Voršy ŭ vajenkamat vyklikali moładzievaha aktyvista Ihara Kaźmierčaka, u sieńnienski rajvajenkamat – Vitala Broŭku.
25 krasavika ŭ Biełaruś nie puścili dźvie zdymačnyja hrupy polskaha telekanału TVP: adnu hrupu nie vypuścili z aeraportu, druhuju – nie prapuścili praź miažu na aŭtamabili.
Biełaruskaja ambasada ŭ Litvie biez tłumačeńnia pryčynaŭ admoviła ŭ vizach parlamentaram Skirmantasu Pabiadzinskasu, Alhirdasu Paleckisu, Aŭdronisu Ažubalisu, jakija mielisia pryjechać na Čarnobylski šlach.
U Miensku 26 krasavika preventyŭna zatrymali moładzievych aktyvistaŭ Jaŭhiena Afnahiela, Alaksieja Šydłoŭskaha, Alenu Kopač: ich dapytali jak śviedak u kryminalnaj spravie «Maładoha frontu». U Mahilevie – juryskonsulta Biełaruskaha prafsajuzu radyjoelektronnaj pramysłovaści (REP) Alaksandra Karalova, a ŭ KDB vyklikali aktyvistku REP Halinu Lisicynu.
26 krasavika pierad samym Čarnobylskim šlacham Alaksandra Milinkieviča aficyjna papiaredzili ŭ prakuratury Miensku.
U Horadni 26 krasavika na 3 sutak za «niecenzurnuju łajanku» aryštavali Maksima Hubareviča.
Pa darozie ŭ Miensk zatrymali try aŭtamabili salihorcaŭ, jakija jechali na Čarnobylski šlach: pradprymalnika Alaksandra Cacuru, Łarysu Nasanovič, aktyvista BSDP (NH) Mikałaja Zimina, aktyvista KCHP-BNF Aleha Boryna, abaroncu namiotavaha miastečka Ŭładzimiera Šyłu j inš. Z Žodzina nia dali vyjechać aktyvistu PBNF Alaksieju Łapickamu j jahonaj žoncy Śviatłanie.
Na Čarnobylskim šlachu
Na płoščy Kołasa zatrymanyja 7 aktyvistaŭ niezarehistravanaha ruchu «Volnaja moładź» (Archipienka, Andrej Łyčoŭ, Alaksiej N i inš.). Mikałaja Koršunava zatrymali za toje, što mieŭ džynsovuju stužku na hałavie. Tamsama zatrymali doktara Źmitra Sałoškina, jaki sprabavaŭ abaranić chłopca. Usich adpuścili, parvaŭšy pratakoły.
Kala Akademii Navuk zatrymali aktyvista AHP Alaksandra Ziałka i troch aktyvistaŭ ukrainskaha «Studenckaha bractva». Ukraincaŭ unačy departavali na radzimu, ale adnaho ź ich, Makara Hieraskieviča, źniali ź ciahnika pierad miažoj.
Paśla akcyi zatrymali kiraŭnika PBNF Vincuka Viačorku, nastupnaha dnia aryštavali Alaksandra Milinkieviča, kiraŭnika PKB Siarhieja Kalakina j prafsajuznaha lidera Alaksandra Buchvostava. Usie dastali pa 15 sutak aryštu, tolki Kalakinu dali 14 sutak. Moładzievaha aktyvista Źmitra Daškieviča asudzili na 14 sutak 28 krasavika, aktyvista PBNF Viktara Ivaškieviča – na 15 sutak 4 traŭnia.
Milicyjanty i supracoŭniki ŭ cyvilnym naviedali kvatery moładzievych aktyvistaŭ Mikity Krasnova, Michała Šaramieta, Maćvieja Čyścika, adnak chłopcaŭ nie było doma.
Miensk
Kiraŭnika AHP Anatola Labiedźku aštrafavali 25 krasavika na 2 bazavyja vieličyni za «chulihanstva»: zatrymali palityka jašče 15 sakavika. 26 krasavika Labiedźku zavieźli ŭ KDB, dapytvali ceły dzień, pozna ŭnačy vyvieźli na kraj Miensku j vykinuli z mašyny.
Piacikurśnika jurfaku BDU Alaksandra Kazulina, plamieńnika kandydata na prezydenta, pry kancy krasavika raźmierkavali ŭ Chojniki. Druhoha plamieńnika, Alaksieja, zvolnili z pracy (byŭ achoŭnikam) adrazu paśla 10-sutkavaj adsiedki za ŭdzieł u namiotavym miastečku.
Maskoŭski rajonny sud razhladaŭ 26–28 krasavika spravu Ihara Rynkieviča, advakata Alaksandra Kazulina: praŭnika vinavacili ŭ drobnym chulihanstvie 2 sakavika. Choć suprać jaho śviedčyli supracoŭniki padraździaleńnia «Ałmaz», adnak Rynkieviča apraŭdali, bo suprać jaho nie było dokazaŭ.
2 traŭnia milicyjanty zatrymali Alaksandra Reźnikava, Alaksieja Kazulina, Siarhieja Ilkieviča, Volhu Žuraŭlovu, Dzianisa Rydzieŭskaha, Jaŭhiena Ščarbakova, jakija mieli znački «Za svabodu!» i bieł-čyrvona-biełyja stužki.
U noč na 8 traŭnia padčas rasklejki nalepak u Miensku zatrymali moładzievaha aktyvista Kastusia Vusianka: noč jaho pratrymali na Akreścina, a zranku vyzvalili biez tłumačeńniaŭ.
Horki
24 krasavika ŭ Horacki rajadździeł milicyi pryjšoŭ danos na Eduarda Brokarava, Viktara j Irynu Karalkovych, Siarhieja Dułuba, Andreja Jurkova: ich abvinavačvali ŭ publičnaj abrazie A.Łukašenki. Padpisantaŭ danosu «Husievu j Šadrova» milicyjanty nie znajšli.
Administracyja Biełaruskaj dziaržaŭnaj sielskahaspadarčaj akademii kanfiskavała ŭvieś nakład dapamožnika pa historyi Biełarusi (500 as.), padrychtavany katedraj historyi j kulturalohii, – za nieadpaviednaść dziaržaŭnaj idealohii. Aŭtarskija asobniki pakinuli sabie tolki Valery Ščerbaŭ i Alaksandar Kadańčyk.
Presa
Hałoŭnaha redaktara navapołackaj niedziaržaŭnaj hazety «Chimik» Siarhieja Bałaja 24 krasavika vyklikali ŭ haradzkuju prakuraturu: ź jaho ŭziali tłumačeńni pa skarzie ŭpravy idealohii harvykankamu na imaviernyja parušeńni zakanadaŭstva ŭ vydańni.
Paŭła Mažejku, pres-sakratara A.Milinkieviča, 3 traŭnia nia vypuścili ŭ Polšču, dzie jaho musiła zdymać polskaja televizija: mytny dohlad doŭžyŭsia da času adpraŭleńnia ciahnika.
4 traŭnia administracyjnaja kamisija Čyhunačnaha rajvykankamu Viciebsku apraŭdała Siarhieja Sałodkina, jakoha vinavacili ŭ vydańni j raspaŭsiudzie niezarehistravanaha krajaznaŭčaha biuleteniu «Poklič voli».
NDA
Haspadarčy sud Miensku 26 krasavika nie zadavoliŭ skarhu Inavacyjnaha fondu praŭnych technalohijaŭ na biespadstaŭnuju admovu Ministerstva justycyi ŭ rehistracyi źmienaŭ i dapaŭnieńniaŭ u statucie rearhanizavanaha fondu.
Kryminalnyja spravy
Śledztva ŭ kryminalnaj spravie Siarhieja Laškieviča skončyłasia 25 krasavika, sudovy praces maje pačacca 25 traŭnia. Aktyvista kampanii Milinkieviča vinavaciać u teraryźmie.
3 traŭnia stała viadoma, što kryminalnaja sprava pra vykradańnie žurnalista Źmitra Zavadzkaha znoŭ prypynienaja. Spravu prypynili, jašče 31 sakavika ŭ suviazi z tym, što «asobu, jakaja biaśśledna źnikła, nie znajšli».
Prafsajuznyja aktyvisty
25 krasavika supołka REP na Mienskim aŭtazavodzie atrymała čarhovuju admovu ŭ rehistracyi: administracyja Savieckaha rajonu Miensku paviedamiła, što padadzienyja dakumenty nie adpaviadajuć zakanadaŭstvu. Supołka sprabuje zarehistravacca jašče ź lipienia 2004 h.
Administracyja homielskaha aŭtaparku №1 26 krasavika pastanaviła zvolnić aktyvista prafsajuzu REP Alaksandra Jeŭsiejčuka. 13 krasavika jaho vyklikali ŭ sud u spravie abarony jahonaha honaru i hodnaści suprać dyrektara aŭtaparku Chadakoŭskaha. Jeŭsiajčuk nie paśpieŭ viarnucca z sudu da vychadu ŭ rejs, što paličyli prahułam.
Rabotnika mienskaha metro aktyvista Biełaruskaha niezaležnaha prafsajuzu Aleha Ščerbu zvolnili 4 traŭnia ŭ suviazi z skančeńniem kantraktu. Ščerba adpracavaŭ mašynistam metro 23 hady. U 2004 h. jon daŭ pakazańni Kamisii pa raśśledavańni Mižnarodnaj arhanizacyi pracy.
Śled KDB
Moładzievaha aktyvista ź Miensku Hleba Viazoŭskaha, vyklikanaha 25 krasavika ŭ vajenkamat Maskoŭskaha rajonu Miensku, sprabavali zaverbavać supracoŭniki KDB.
Aktyvistku PKB Śviatłanu Michalčanku 26 krasavika vyklikali ŭ Śvietłahorski adździeł KDB i papiaredzili, što jaje «mohuć zaverbavać zamiežnyja specsłužby».
U Mahilovie ŭ hety ž dzień vyklikali ŭ KDB moładzievaha aktyvista, abaroncu namiotavaha miastečka Alesia Burakova: supracoŭnik specsłužby cikaviŭsia dziejnaściu arhanizacyi «Zubr».
Pry kancy krasavika KDB u Mahilevie raspačaŭ spravu suprać Sieržuka Niahacina: jaho vinavaciać va ŭdziele ŭ niezarehistravanaj arhanizacyi («Małady front»).
Bieraście
26 krasavika pierad čarnobylskaj akcyjaj «Śviečka pamiaci» u Bieraści zatrymali aktyvistaŭ PBNF Jurasia Hubareviča i Jaŭhiena Prakurata. Milicyjanty šukali narkotyki ŭ aŭtamabili Hubareviča.
Bieraściejski abłsud 27 krasavika pakinuŭ biaź źmienaŭ prysud u 5 b.v. aktyvistu z Drahičynskaha rajonu Ŭładzimieru Kazieku: pry kancy 2005 h. jaho aštrafavała administracyjnaja kamisija za znojdzienyja ŭ aŭtamabili 20 paštovak z partretam A.Milinkieviča i 2 biuleteni, dzie raspaviadłasia pra kandydata.
Bieraściejski harvykankam nia daŭ dazvołu BSDP (H) pravieści 1 traŭnia mitynh i šeście.
5 traŭnia administracyjnaja kamisija Maskoŭskaha rajonu Bieraścia aštrafavała studenta Bieraściejskaha dziaržaŭnaha techničnaha ŭniversytetu Andreja Šarendu na 20 tys.rub. za raspaŭsiud niezaležnaj hazety «Brest–praŭda».
26 krasavika Bieraściejski abłasny sud likvidavaŭ moładzievaje hramadzkaje abjadnańnie «Suzorje» za 2 papiaredžańni ad upravy justycyi abłvykankamu: nie davała ŭ naležny čas adkazaŭ na zapyty čynoŭnikaŭ i mieła ŭ liku zasnavalnikaŭ dziaŭčynu, jakoj spoŭniŭsia 31 hod. Arhanizacyja isnavała z kanca 1999 h.
Salihorsk
Na 4 b.v. aštrafavała 27 krasavika administracyjnaja kamisija ŭ spravach niepaŭnaletnich baćkoŭ školnikaŭ Ivana i Illi Šyłaŭ: chłopcaŭ zatrymali padčas razhromu namiotavaha miastečka ŭ Miensku. Ichny baćka Ŭładzimier tady dastaŭ 10 sutak aryštu.
Ivana zatrymali milicyjanty jašče 1 traŭnia, kali jon fatahrafavaŭ raściažku «Nie – kantraktnaj systemie».
Zatrymanyja na fłeš-mobie ŭ abaronu piśmieńnikaŭ
28 krasavika kala Viarchoŭnaha sudu byli zatrymanyja 8 udzielnikaŭ fłeš-mobu ŭ padtrymku Sajuzu biełaruskich piśmieńnikaŭ. Usich adpuścili, pierapisaŭšy pašpartnyja źviestki.
Śviata pracy
1 traŭnia paśla mitynhu ŭ Miensku byŭ zatrymany aktyvist AHP Ihar Šynkaryk: u jaho zabrali pravy i źniali numarnyja znaki z aŭtamabila.
Adrazu paśla mitynhu pozvu ŭ milicyju na 3 traŭnia atrymaŭ kiraŭnik BSDH Stanisłaŭ Šuškievič, adnak u milicyju nie pajšoŭ – pajechaŭ na forum u Vilniu.
Navučenca radyjotechničnaha kaledžu Mikitu Čumiłava zatrymali 1 traŭnia paśla akcyi salidarnaści z palitviaźniami za plakat «Svabodu Milinkieviču». 3 traŭnia sud asudziŭ jaho na sutki aryštu, adnak pravaachoŭnyja orhany nie paviedamlajuć pra termin aryštu.
U Śvietłahorsku 1 traŭnia aktyvistka Natalla Bordak vyjšła na Centralnuju płošču ź bieł-čyrvona-biełym ściaham i plakatam «Rabotu – achviaram systemy!».
1 traŭnia ŭ Homieli milicyjanty zatrymali padčas raspaŭsiudu ŭlotak pra abaronu pravoŭ pracoŭnych Aksanu Sierhijenku, a taksama Andreja Doŭžyka i Jurja Prapačova, jakija pryjšli na dapamohu dziaŭčynie. 6 traŭnia adbylisia sudy: dziaŭčynu asudzili na 15 sutak, chłopcam dali pa 7 sutak aryštu.
Kalinkavičy
Pry kancy krasavika Kalinkavicki rajonny sud asudziŭ na štrafy ŭ 1 młn rub. (kožnamu) žonku i syna hramadzkaha aktyvista ź miastečka Babrovičy Kanstancina Kavaleni: ich źvinavacili ŭ «dačy falšyvych pakazańniaŭ». Samoha Kavaleniu vinavaciać u kradziažy rovara, a žonka i syn kažuć, što ŭ momant kradziažu rovara Kavalenia byŭ doma.
Vuzda
3 traŭnia ŭ Vuździe ź inicyjatyvy prakuratury dapytali aktyvista BSDP (H) Viktara Kryvala za jahonuju zajavu pra falsyfikacyju ŭ hetym rajonie vynikaŭ referendumu j parlamenckich vybaraŭ.
Niaśviž
4 traŭnia śledčy paviedamiŭ moładzievuju aktyvistku ź Niaśvižu Nastu Azarku, što kryminalnaja sprava na jaje nieŭzabavie budzie spynienaja. Dziaŭčynu vinavacili ŭ dziejnaści ad imia niezarehistravanaj arhanizacyi («Małady front»). Śledčy Dźmitry Miechaŭ admysłova pryjechaŭ 4 traŭnia ź Miensku ŭ Niaśviž na apošni dopyt i zarazom paviedamiŭ pra toje, što ŭ sud jejnaja sprava nia pojdzie. Taksama jon uziaŭ z Azarki padpisku, što jana nia budzie ŭdzielničać u dziejnaści «Maładoha frontu».
Horadnia
Anžaliku Borys 5 traŭnia vyklikali ŭ milicyju ŭ źviazku z tym, što ŭ jaje karespandencyi znajšli «Magazyn Polski na uschodztwie». Joj pahražaje razbor na administracyjnaj kamisii za «raspaŭsiud idealahična varožaj presy». A.Borys u pratakole dopytu zaznačyła, što parušanaje jaje prava na tajamnicu listavańnia.
AŠ
Kamientary