Čotki Čačotkin

U Biełaruskaj dziaržaŭnaj sielhasakademii (BDSHA) u Horkach administracyja pry kancy krasavika źniščyli tyraž metadyčki dla studentaŭ-zavočnikaŭ. Aŭtarami hetaha šarahovaha dla ŭstanovy navučalnaha dapamožnika pa historyi Biełarusi, adrasavanaha studentam zavočnikam, byli vykładčyki katedry historyi j kulturalohii.

Farmalnaj padstavaj stała toje, što pry druku na apošniaj staroncy vydańnia vypali 20 nazvaŭ knih, rekamendavanych dla vyvučeńnia. Praŭdzivaje ž niezadavalnieńnie administracyi vyklikaŭ źmiest metadyčki — “nieadpaviedny dziaržaŭnaj idealohii”. Nie ŭratavali dadatnyja vodhuki recenzentaŭ i navukova-metadyčnaj rady akademii. Brašura, vydadzienaja na srodki akademii nakładam 500 asobnikaŭ, paśpieła “pražyć” kala tydnia. Častku jaje nakładu addali ŭ metadyčny kabinet katedry, častku mierkavali pradać studentam-zavočnikam. Adnak pradstaŭniki rektaratu zabrali ŭvieś nakład i zapatrabavali ad aŭtaraŭ zdać navat aŭtarskija asobniki.

Pahadzilisia nia ŭsie. Prafesaru historyi Alaksandru Kadańčyku i Valerju Ščerbavu prarektar pa vychavaŭčaj rabocie Alaksandar Čačotkin pahražaŭ kryminalnaj adkaznaściu za kradziež dziaržmajomaści — tak jon nazvaŭ ichnuju admovu addać aŭtarskija asobniki. Abodva vykładčyki zaznačyli, što aŭtarskija asobniki jość ichnaj ułasnaściu pavodle zakonu dy prapanavali: “Kali vam tak chočacca, dyk my možam vykupić svaje brašury za luby košt”.

Što ž vyklikała “idealahičny pieralak” u administracyi BDSHA? A.Kadańčyk, pišučy pra Deklaracyju ab dziaržaŭnym suverenitecie Biełarusi, staviŭ jaje poruč z Treciaj ustaŭnaj hramataj BNR i Manifestam pra abviaščeńnie BSSR. Zhadaŭ, što dzień 27 lipienia niezdarma ličyŭsia dziaržaŭnym śviatam. Aŭtar raździełu pra druhuju suśvietnuju vajnu V.Ščerbaŭ raspaviadaŭ pra roznyja pohlady na prablemu, zhadvaŭ sprečnyja pytańni z historyi partyzanskaha ruchu. Usio heta im pastavili ŭ vinu.

Dla Kadańčyka heta sutyčka z administracyjaj BDSHA nia pieršaja. Aktyvist TBM, u prezydenckuju kampaniju jon uvajšoŭ u inicyjatyŭnuju hrupu Milinkieviča. U studzieni 2006 h. jaho vyklikali ŭ rektarat i patrabavali vyjści z hrupy. Adnak prafesar, jaki dapracoŭvaje apošni hod pierad pensijaj, pahrozaŭ nie spałochaŭsia. Što praŭda, čakać padaŭžeńnia kantraktu paśla ŭsich hetych kanfliktaŭ jamu nie vypadaje.

Arkadź Šanski

• 0
• 0
• 0
• 0
• 0
• 0
• 0
• 0