Inśpiektar DAI, jaki paśla avaryi z matacyklistam pravioŭ u komie paŭtara miesiaca, prosić $25 tysiač kampiensacyi
U sudzie Centralnaha rajona Minska 25 kastryčnika pačaŭsia praces pa hučnym DTZ: daišnik pasprabavaŭ zatrymać matacyklista, a toj — vypadkova ci nie — pajechaŭ. U vyniku milicyjant pravioŭ u komie 1,5 miesiaca, a kiroŭca matacykła čakaje prysudu ŭ SIZA.
Što zdaryłasia
Samo DTZ adbyłosia 18 krasavika. Na rahu praśpiekta Niezaležnaści i praśpiekta Mašerava supracoŭnik DAI padyšoŭ da bajkiera na spartovym matacykle, jaki stajaŭ na čyrvonaje śviatło, i zapatrabavaŭ pakazać dakumienty. Nahodaj stała adsutnaść na matacykle rehistracyjnych znakaŭ.
Što adbyłosia dalej, dakładna nieviadoma. Vidavočcy kazali, što matacyklist rezka startanuŭ ź miesca, a inśpiektar schapiŭsia za styrno. Milicyja śćviardžaje, što matacyklist začapiŭ inśpiektara i paciahnuŭ za saboj. Matacyklist zajaŭlaŭ, što daišnik rezka schapiŭ jaho za ruku i jon vypadkova nacisnuŭ na haz.
Tym časam zaharełasia zialonaje śviatło dla aŭtamabilaŭ, jakija jechali pa praśpiekcie Niezaležnaści. Kiroŭca aŭtamabila ź inkasatarami nie bačyŭ matacyklista ź inśpiektaram i pačaŭ ruchacca. Adbyłosia sutyknieńnie, u jakim ciažka paciarpieŭ daišnik.
46-hadovy inśpiektar DAI pieranios niekalki apieracyj, u tym liku i trepanacyju čerapa, paŭtara miesiaca jon byŭ u komie. Dapytać inśpiektara praciahły čas było niemahčyma, jaho stan zdaroŭja nie dazvalaŭ heta zrabić — mužčyna prosta nie moh havaryć.
Padazravany, 31-hadovy ŭradženiec Žłobina, trapiŭ ŭ SIZA. Viadoma, što jon mieŭ 52 parušeńni PDR da zdareńnia. A ciapier jamu pahražaje da 5 hadoŭ źniavoleńnia. Na momant avaryi jon byŭ ćviarozy.
Śledstvam vyśvietlena, što kiroŭca matacykła mieŭ mahčymaść pryniać miery da tarmažeńnia, svoječasova spynicca i nie dapuścić darožna-transpartnaha zdareńnia, ale nie zrabiŭ hetaha.
«Chacieŭ by zastacca na słužbie»
Inśpiektar Taŭpiniec pryjšoŭ na pasiedžańnie ź siamjoj i advakatkaj Irynaj Višniakovaj. Ad kamientaraŭ milicyjant admoviŭsia. Admovilisia i svajaki.
«Nam vielmi ciažka było prajści praz usio heta. Tamu my nie budziem ničoha kazać da prysudu»,— skazała advakatka inśpiektara.
Sudździa Valery Jeśman pačaŭ pasiedžańnie.
Prakuror začytaŭ viersiju śledstva. Zhodna ź joj, Šaŭcoŭ naŭmysna akazvaŭ supraciŭ inśpiektaru, nacisnuŭ na haz śviadoma, jašče i parušyŭšy hetym praviły darožnaha ruchu.
Abvinavačvany Siarhiej Šaŭcoŭ vinu nie pryznaŭ i paprasiŭ dać pakazańni paśla paciarpiełaha i śviedkaŭ (a nie ŭ pačatku pasiedžańnia, jak zvyčajna). Tamu pieršym vysłuchali Uładzimira Taŭpinca.
«Jak siabie adčuvajecie?» — pacikaviŭsia ŭ jaho sudździa Jeśman.
«Pasredna», — koratka adkazaŭ Taŭpiniec.
Heta było zaŭvažna: nie tolki pa hałavie sa šnarami, rasčerčanymi zialonkaju, ale i pa havorcy. Inśpiektar razmaŭlaŭ z paŭzami.
Dzień DTZ inśpiektar nie pamiataje ŭvohule.
«Ja pačaŭ razmaŭlać tolki na trecim miesiacy paśla zdareńnia. Pamiać pačała trochi adnaŭlacca tady ž. Pakul jašče pamiać adnaviłasia častkova», — patłumačyŭ jon.
Usiaho Taŭpiniec pieranios try apieracyi — apošniuju niekalki tydniaŭ tamu. Pra apieracyi raspavieści inśpiektara paprasiła jaho ž advakatka.
«Pieršapačatkova ja nie paznavaŭ siamju i siabroŭ», - raspavioŭ daišnik.
Praŭda, miedkamisiju jon projdzie tolki, kali skončycca lačeńnie. Tamu i hrupu invalidnaści jamu pakul nie pastavili.
«Ale ja b chacieŭ zastacca na słužbie», — skazaŭ Taŭpiniec.
Inśpiektar paprasiŭ dałučyć da spravy jaho pazoŭ. U im Taŭpiniec prosić spahnać z Šaŭcova 50 tysiač «novych» rubloŭ za maralnuju škodu. Plus apłacić vydatki na advakata.
«Jon iznoŭ vučyŭsia jeści, chadzić, havaryć. Ale nakont invalidnaści pakul pytańnie adkrytaje. I ŭ pazovie my spasyłajemsia na fizičnyja i maralnyja pakuty, jakija pieranios paciarpieły», - patłumačyła pazoŭ advakatka Višniakova. — Maralnyja pakuty praciahvajucca i pa siońnia: jak u płanie taho, što nieviadoma, ci budzie mahčymaść viarnucca na słužbu, tak i ŭ płanie žyćcia siamji. Z-za DTZ faktyčna sarvałosia viasielle jaho dački, pryznačanaje na leta».
Abvinavačvany pazoŭ pryznaŭ častkova — jon hatovy vypłacić sumu ŭ 5 tysiač rubloŭ.
«Matacyklist paprasiŭ, kab inśpiektar adyšoŭ u bok»
Zatym vysłuchali śviedkaŭ. Aleh Čystapjan, mancior tramvajnych puciej, raspavioŭ, što ŭ dzień DTZ razam z naparnikam prybiraŭ tramvajny prypynak. I jon bačyŭ, jak na skryžavańni spačatku spyniŭsia matacykł, a paśla — jak da jaho padyšoŭ inśpiektar DAI. Ruchavik matacykła pracavaŭ.
«Ad mianie toje było mietraŭ 5-6, - skazaŭ Čystapjan. — Ja čuŭ razmovu. Inśpiektar paprasiŭ zahłušyć matacykł. Matacyklist paprasiŭ, kab inśpiektar adyšoŭ u bok. Tady supracoŭnik DAI pasprabavaŭ sam zahłušyć — i ŭsio, i ruch pajšoŭ, jany na sustrečnuju pałasu vyjechali… Tam lehkavy aŭtamabil prytarmaziŭ, a z-za jaho inkasatarskaja mašyna vyjechała… Ja bačyŭ mocny ŭdar».
Pa słovach śviedki, inśpiektar sam uziaŭsia za styrno matacykła adnoj rukoj. A druhoj paciahnuŭsia da kluča, kab zahłušyć mator — tady i «pajšoŭ ruch».
Prykładna toje ž raspavioŭ i druhi śviedka, naparnik Čystapjana.
Ale ž, pa jaho słovach, spačatku matacykł šturchanuŭsia napierad — prajechaŭ kala mietra. Heta adbyłosia paśla prośby inśpiektara zahłušyć mator. Pry hetym daišnik prytrymlivaŭ matacykł za styrno, zapeŭniŭ śviedka, i ruka inśpiektara była na pravaj častcy styrna — tam, dzie ručka hazu. Zatym inśpiektar paciahnuŭsia, kab zahłušyć matacykł, a kiroŭca adšturchnuŭ jaho ruku.
«Nu, mnie tak padałosia», - skazaŭ mužčyna.
Praŭda, raniej mužčyna davaŭ pakazańni, zhodna ź jakimi matacyklist «sarvaŭsia ź miesca», a ruki inśpiektara nie šturchaŭ. Advakaty abvinavačvanaha zaŭvažyli, što «niemahčyma zryvacca ź miesca i adnačasova adšturchoŭvać ruku inśpiektara». Paśla doŭhaj paŭzy, śviedka vyrašyŭ, što davieru vartyja minułyja pakazańni.
Zatym vysłuchali jašče adnaho śviedku, jaki znachodziŭsia ŭ svajoj mašynie na śvietłafory padčas DTZ.
«Byŭ pieršy ryvok matacykła, zatym inśpiektar pasprabavaŭ jaho zatrymać, mašynalna uziaŭsia za styrno, praz paru siekundaŭ jany ŭžo «pajechali», - raspavioŭ śviedka Pavieł Biassonaŭ.
Ale, pa jaho słovach, małaimavierna, kab matacykł pajechaŭ vypadkova ad dziejańniaŭ daišnika. Chutčej za ŭsio, kiroŭca i sam źbiraŭsia «startavać».
«Ja niadaŭna jakraz zdaŭ na katehoryju «na matacykł». I kab čałaviek na bajku vycisnuŭ sčapleńnie, pieraklučyŭ pieradaču, i tut jakraz daišnik nacisnuŭ na ručku hazu… Małaimavierna, kab usio heta raptam adbyłosia adnačasova», - padzialiŭsia svaim mierkavańniem Biassonaŭ.
Nastupnaja śviedka, Maryja Kiško (kiroŭca tramvaja) pa vialikim rachunku ničoha novaha nie dadała. Jak i Uładzimir Radzievič, kiroŭca inkasatarskaj mašyny «Bielinviestbanka». Mienavita z hetaj mašynaj sutyknuŭsia matacykł.
Paśla daŭ pakazańni inśpiektar DAI, naparnik Taŭpinca Aleh Łazinski:
«Zaŭvažyli, što matacykł byŭ biez numara. Vova [Taŭpiniec] vyjšaŭ z mašyny i pajšoŭ da matacykła».
Pa słovach inśpiektara, kali Taŭpiniec paciahnuŭsia da kluča, kab zahłušyć mator, matacyklist adkaciŭsia nazad, rezka vykruciŭ styrno naleva i pajechaŭ. A paciarpieły začapiŭsia za styrno, bo prosta instynktyŭna vystaviŭ ruki napierad.
«Paśla DTZ ja skazaŭ abvinavačanamu: pahladzi, što ty zrabiŭ. Jon adkazaŭ mnie tak: «Čamu vy na mianie pavyšajecie hołas?», - raspavioŭ Łazinski.
Čytajcie taksama: «U tym, što zdaryłasia, vinavaty sam inśpiektar» — abvinavačany ŭ spravie ab DTZ z daišnikam ahučyŭ svaju viersiju
Minsk siońnia viečaram pahruziŭsia ŭ ciemru. Paśla zahadu Łukašenki51
Minsk siońnia viečaram pahruziŭsia ŭ ciemru. Paśla zahadu Łukašenki
Ahientka Kardaš vykarystoŭvała seks, kab źbirać infarmacyju pra kalinoŭcaŭ i zavierbavać ukrainskaha kamandzira. A kurataru KDB pisała pra jaho: «Moj łoch»3535
Ahientka Kardaš vykarystoŭvała seks, kab źbirać infarmacyju pra kalinoŭcaŭ i zavierbavać ukrainskaha kamandzira. A kurataru KDB pisała pra jaho: «Moj łoch»35
U Vieniesuele budzie nie prosta vyzvaleńnie palitviaźniaŭ, a amnistyja, pryčym za ŭsie hady. A miascovuju «amierykanku» pieratvorać u hramadskuju prastoru1717
Kamientary