KDB pahražaje aktyvistu ruchu «Za svabodu» adličeńniem z kaledža za ŭdzieł u nazirańni
Adličeńniem z kaledžu ŭ vypadku praciahu aktyŭnaha ŭdziełu ŭ ruchu «Za svabodu» pahražaŭ siabru arhanizacyi Vadzimu Babinu supracoŭnik KDB. Razmova prachodziła pad čas zaniatkaŭ u kabiniecie dyrektara.
«Heta ŭsio adbyłosia 25 kastryčnika, la 12 hadzinaŭ. Kali ŭ mianie była infarmatyka, mianie vyklikali ŭ kabiniet dyrektara Mikałaja Cyrelčuka. Tam siadzieli zahadčyca miechanika-techničnaha adździaleńnia Alena Mihura i čałaviek, jaki pradstaviŭsia supracoŭnikam KDB», — raspavioŭ sajtu Pyx.by student treciaha kursu filijału BNTU Minskaha dziaržaŭnaha technałahičnaha kaledža Vadzim Babin.
Pa jahonych słovach, supracoŭnik KDB nazvaŭ siabie, ale nierazborliva, i razmova pačałasia z pytańniaŭ pra marafon u Kijevie, dzie Vadzim z kamandaj pradstaŭlaŭ ruch «Za svabodu». «Jak vystupili, jak prabiehli, čamu tak chutka? Ci pili my, jak pryjechali ci paśla, ci pili ŭ darozie», — pryhadaŭ pytańni aktyvist. Pa jahonych słovach, jon raspavioŭ, što kamanda zaniała 13-je miesca, što jon udzielničaŭ, bo prapanavaŭ ruch, padabajecca ideja, nichto nie piŭ.
«Potym supracoŭnik KDB pačaŭ zapytvacca pra 25 dalaraŭ, jakija zapłacili naziralnikam. «Ja viedaju, što tabie płacili», — skazaŭ. «Jak što kamu płacili, to tolki za prajezd i abied, bolej ničoha nie płacili», — skazaŭ ja», — patłumačyŭ Vadzim Babin. Moładzievy aktyvist patłumačyŭ supracoŭniku śpiecsłužbaŭ, što jamu asabista było cikava daviedacca, jak pravodziacca vybary.
«Ja spytaŭ, čamu jon da mianie pryjšoŭ, bo ja ž ničoha kiepskaha nie rablu. «Heta ciapier nie robiš, možaš potym zrabić», — pačuŭ u adkaz», — pryhadaŭ Vadzim.
Supracoŭnika KDB taksama cikavili pierśpiektyvy aktyvista ŭ ruchu, raspytvaŭ jon i adkul hrošy ŭ arhanizacyi.
«Tabie zastałosia tut da 24 krasavika vučycca, da hetaha času staŭ siabroŭstva ŭ Ruchu na paŭzu i atrymlivaj dypłom. Bo ŭ ciabie buduć prablemy», — skazaŭ supracoŭnik KDB.
«Ja tak razumieju, što mianie adličać?» — spytaŭsia Babin.
«Tak», — skazaŭ supracoŭnik KDB.
«Kali ŭ mianie zapytalisia, ci budu ja niešta rabić u Ruchu ja skazaŭ: «Tak». «Paŭtary hučna», — skazali. «TAK», — pryhadaŭ moładzievy aktyvist.
Jon nazvaŭ hetuju razmovu ciskam z boku KDB, źviazanym z palitykaj i jahonym udziełam u kampanii staršyni Ruchu «Za Svabodu» Jurasia Hubareviča.
«Biezumoŭna, my nazirajem fakt palityčynaha cisku i prymusu da admovy ad udziełu ŭ palityčnym žyćci pad pahrozaj adličeńnia z navučalnaj ustanovy», — prakamientavaŭ situacyju sajtu Pyx.by staršynia ruchu «Za svabodu» Juraś Hubarevič.
Pa jahonych słovach, kiraŭnictva arhanizacyi trymaje situacyju z Vadzimam Babinym na kantroli i vykarystaje ŭsie dastupnyja ryčahi dla abarony siabra ruchu. «Budzie zvarot da administracyi navučalnaj ustanovy, jakim čynam jany dapuskajuć prychodu niejkich ludziej i padobnych razmovaŭ ź ich navučencami pad čas zaniatkaŭ», — padkreśliŭ staršynia ruchu.
Jon padkreśliŭ, što z zaviaršeńniem vybarčaj kampanii «ŭłady viarnulisia da staroj praktyki zapałochvańnia aktyvistaŭ, asabliva moładzi, jakaja ŭpieršyniu dałučajecca da aktyŭnaj palityčnaj dziejnaści». «Represii i zapałochvańni — adzinaje, na čym moža trymacca biełaruski režym, jaki nie znachodzić padtrymki hramadstva», zaklučyŭ staršynia Ruchu.
Kamientary