«Biełnaftachim»: Biełaruś šukaje novych pastaŭščykoŭ nafty

Biełaruś vyvučaje mahčymaści zamiaščeńnia rasijskaj nafty paśla zaviaršeńnia ŭ Rasii padatkovaha manieŭru, raskazaŭ kiraŭnik kancerna «Biełnaftachim» Ihar Lašenka ŭ intervju TASS. 

«My adpracoŭvajem roznyja režymy, kali skončycca padatkovy manieŭr. Zastajecca adzin hod», — skazaŭ Lašenka.

Lašenka taksama zajaviŭ, što Rasieja pakul nie viarnułasia da pastavak nafty ŭ Biełaruś u raniejšych abjomach, niahledziačy na dasiahnutyja ŭradami krain damoŭlenaści. «Pakul my ŭ režymie čakańnia», — adznačyŭ kiraŭnik «Biełnaftachima».

Nahadajem, što Rasija pryniała rašeńnie ab skaračeńni pastavak nafty ŭ Biełaruś u trecim kvartale da 3,5 młn ton u adpłatu za toje, što Biełaruś nie całkam apłačvała haz. U svaju čarhu, Minsk nazyvaŭ vystaŭlenuju «Hazpromam» canu za haz niespraviadlivaj i nieadpaviednaj ciapierašnim cenam na suśvietnym rynku. Źmianšeńnie pastavak nafty vyklikała dadatkovaje padzieńnie vałavoha ŭnutranaha praduktu Biełarusi na 0,3% u trecim kvartale. Heta pry tym, što VUP i tak skaračaŭsia druhi hod zapar.

Na fonie hetaha stała viadoma, što Biełaruś adnaviła pastaŭki nafty z Azierbajdžana. 19 kastryčnika ŭ Adesie pryšvartavaŭsia pieršy tankier. Naftu majuć pieravozić pa čyhuncy na Mazyrski naftapierapracoŭčy zavod. Heta darahi varyjant, ale jość i patencyjna tańniejšy: reviers naftapravoda Adesa—Brody.

Tak zvany «padatkovy manieŭr» u Rasii pravodzicca z 1 studzienia 2015 hoda. Jaho sutnaść zaklučajecca ŭ tym, što ŭ pieryjad z 2015 pa 2017 hod paetapna skaračajucca ekspartnyja pošliny na naftu (da 1,7 razu) i naftapradukty (da 1,7—5 razoŭ u zaležnaści ad typu). Pry hetym paralelna raście padatak na zdabyču karysnych vykapniaŭ i padatak na zdabyču hazavaha kandensatu (u 1,7 i 6,5 razu adpaviedna). Padatkovy manieŭr byŭ nakiravany na stymulavańnie hłybokaj pierapracoŭki nafty, kab kampanii nakiroŭvali na ekspart nie syruju naftu i mazutu, a śvietłyja naftapradukty.

Biełaruski ŭrad dabiŭsia kampiensacyi za straty, jakija kraina niesła ŭ vyniku manieŭru. Kali raniej pa mižuradavym pahadnieńni Biełaruś viartała ekspartnyja myty za naftapradukty, vyrablenyja z rasijskaj nafty, u rasijski biudžet, to ad 2015 hoda jany zastavalisia ŭ biełaruskim biudžecie.

Takija sukrytyja subsidyi za naftu i haz u apošnija dziesiacihodździ lažali ŭ asnovie biełaruskaj ekanamičnaj madeli. Jany davali kankurentnyja pieravahi biełaruskim pradpryjemstvam pierad pradukcyjaj susiednich uschodniejeŭrapiejskich krain, a zaroblenyja hrošy składali asnovu biełaruskaha biudžetu. Uzamien za heta biełaruskija ŭłady pravodzili palityku rusifikacyi, vasalny kurs na mižnarodnaj arenie i ŭ halinie biaśpieki i davali prefierencyi dla rasijskich tavaraŭ i kapitałaŭ u ramkach Mytnaha sajuza. Hłybokaje padzieńnie rasijskaj ekanomiki ŭ vyniku patańnieńnia nafty i ŭziaty Maskvoj kurs na kanfrantacyju ź Jeŭrasajuzam i ZŠA pryviali i da kryzisu raniejšaj madeli biełaruska-rasijskich adnosin.

• 0
• 0
• 0
• 0
• 0
• 0
• 0
• 0