«Pierśpiektyŭ nul»: u Litvie zrabili vysnovu paśla kantaktaŭ Łukašenki z ZŠA
Litva nie bačyć pieradumoŭ dla zbližeńnia ź Biełaruśsiu i praciahvaje prytrymlivacca sankcyjnaj palityki, zajaŭlajuć litoŭskija palityki. Pavodle słoŭ jeŭraparłamientaryja Piatrasa Aŭštravičusa, lubyja kantakty varta razhladać u hieapalityčnym kantekście z ulikam upłyvu Rasii, tady jak u Siejmie adznačajuć, što biahučaja situacyja, u tym liku hibrydnyja ataki i ščylnyja suviazi Minska z Maskvoj, nie stvaraje ŭmoŭ dla palityčnaha dyjałohu, piša LRT.
Paśla sustrečy Alaksandra Łukašenki sa śpiecyjalnym pradstaŭnikom ZŠA pa pytańniach Biełarusi Džonam Koŭłam litoŭskija palityki acanili pierśpiektyvy dyjałohu ź Biełaruśsiu i ŭpłyŭ źniešnich hulcoŭ na hety praces.
Jeŭraparłamientaryj Piatras Aŭštravičus ličyć, što zbližeńnie Litvy i Biełarusi, jakoje abmiarkoŭvajecca apošnim časam, varta aceńvać nie praz pryzmu asobnych ekanamičnych prajektaŭ, a ŭ bolš šyrokim hieapalityčnym kantekście.
Pavodle jaho słoŭ, udzieł ZŠA ŭ hetych pracesach nie varta pieraaceńvać.
«Ja aceńvaju heta jak častkova kamiercyjny prajekt realizacyi peŭnych damoŭlenaściej, jakija, vierahodna, majuć značeńnie dla asobnych asob i kampanij, ale dla litoŭskaj dziaržavy ci, skažam tak, dla nacyjanalnych intaresaŭ Litvy heta maje mienšaje značeńnie», — adznačyŭ palityk.
Jon padkreśliŭ, što Litvie važna zychodzić z ułasnych intaresaŭ i nie padmianiać stratehičny padychod karotkaterminovymi vyhodami. «Nie varta, jak toj kazaŭ, mianiać darohu na ściežku. Tamu nieabchodna bačyć bolš šyrokuju karcinu — pierš za ŭsio hieapalityčnuju, a nie zasiarodžvacca na intaresach asobnych pradpryjemstvaŭ», — skazaŭ Aŭštravičus.
Havoračy pra charaktar adnosin ź Minskam, jeŭraparłamientaryj zajaviŭ, što vyrašalnym faktaram zastajecca ŭpłyŭ Rasii.
«Heta było i zastajecca, davajcie nie budziem siabie padmanvać. Hetyja kantakty sistematyčna ažyćciaŭlajucca, pravodziacca kansultacyi, dasiahajucca damoŭlenaści i hetak dalej», — padkreśliŭ jon.
Pavodle jaho acenki, zaležnaść Biełarusi ad Maskvy značna abmiažoŭvaje jaje samastojnaść. U hetym kantekście lubyja sproby narmalizacyi adnosin jon prapanuje razhladać jak častku bolš šyrokaj stratehii.
«Jość razumieńnie, što heta, pa sutnaści, scenaryj, jaki idzie z Maskvy», — adznačyŭ palityk, dadaŭšy, što «takija dziejańni adbyvalisia i buduć adbyvacca dalej, bo heta svajho rodu sproba vyjści z błakady, z sankcyjnaha režymu».
Kamientujučy dyskusii ŭnutry Jeŭraparłamienta, Aŭštravičus pryznaŭ, što asobnyja palityki vystupajuć za adnaŭleńnie kantaktaŭ z rasijskimi strukturami, adnak nazvaŭ ich marhinalnymi.
Asobna jon spyniŭsia na intaresach biźniesu, adznačyŭšy, što častka kampanij praciahvaje šukać mahčymaści supracoŭnictva ź Biełaruśsiu, niahledziačy na ryzyki.
«Treba razumieć, što ŭsie hetyja tak zvanyja kamiercyjnyja intaresy ź biełaruskim bokam źviazanyja z vysokim uzroŭniem ryzyki i značnaj niavyznačanaściu. Siońnia ty možaš być u pašanie, a zaŭtra — apynucca ŭ turmie, i tvoj biznes moža pierajści pad kantrol inšych asob», — zajaviŭ jeŭraparłamientaryj.
Na jaho dumku, u biahučych umovach razumniej zaniać pazicyju čakańnia. «Faktar niavyznačanaści zachavajecca na peŭny čas. Mahčyma, było b razumniej ustrymacca ad padobnych damoŭlenaściej abo ŭhod ź biełaruskim bokam, pačakać i zatym užo dziejničać u bolš jasnych umovach», — adznačyŭ jon.
Aŭštravičus taksama źviarnuŭ uvahu na toje, što ekanamičnyja kantakty mohuć pierarastać u palityčnuju prablemu.
«Kali biznes ažyćciaŭlajecca, jon padajecca jak pryvatny, a kali ŭźnikajuć prablemy — jon niečakana stanovicca pradmietam dziaržaŭnaj adkaznaści. Heta niapravilna… U hetym, mahčyma, i zaklučajecca peŭnaja chitraść Minska», — skazaŭ jon.
Havoračy pra sankcyjnuju palityku Jeŭrasajuza, palityk padkreśliŭ, što na hety momant adzinstva zachoŭvajecca, adnak papiaredziŭ pra mahčymyja sproby jaho asłabić.
«Raschistvańnie hetaj salidarnaj pazicyi budzie adbyvacca pad roznymi padstavami — kulturnymi, histaryčnymi i inšymi», — adznačyŭ Aŭštravičus.
Pavodle jaho słoŭ, u hetaj situacyi asablivaja rola naležyć krainam rehijona. «U hetym, napeŭna, zaklučajecca asablivaja rola Vilni i Varšavy — tłumačyć i paśladoŭna adstojvać uzvažanuju palityku ŭ dačynieńni da Minska», — padkreśliŭ jon.
Jeŭraparłamientaryj dadaŭ, što pytańnie adnosin ź Biełaruśsiu vychodzić za miežy dvuchbakovaha paradku dnia. «Minsk siońnia źjaŭlajecca častkaj ahresii suprać Ukrainy, a heta ŭžo ahulnajeŭrapiejskaja prablema», — zajaviŭ Aŭštravičus.
Motuzas: kantakty ź Biełaruśsiu niemahčymyja praz ryzyki, jakija zastajucca
Pra toje, što pieradumoŭ dla palapšeńnia adnosin ź Minskam pakul niama, kaža i staršynia kamiteta Siejma pa zamiežnych spravach Remihijus Motuzas. Kamientujučy niadaŭnija sustrečy z udziełam amierykanskaha boku, jon adznačyŭ, što asnoŭny akcent pieramoŭ byŭ zrobleny mienavita na biełaruskim kirunku.
«Kali spadar Koŭł byŭ u Litvie i sustrakaŭsia z kiraŭnikami našaj dziaržavy, asnoŭnaj temaj razmovy byli adnosiny ź Biełaruśsiu», — skazaŭ palityk.
Pavodle jaho słoŭ, litoŭski bok jasna akreśliŭ svaju pazicyju: «My vykazali mierkavańnie, što praciahvajucca hibrydnyja ataki — mihracyjny cisk i inšyja pytańni».
Adnak, jak padkreślivaje Motuzas, sihnały ź biełaruskaha boku nie dajuć padstaŭ dla aptymizmu. «Paśla vizitu Koŭła, jak my bačym, u piatnicu ŭviečary znoŭ źjavilisia mihranty, źjavilisia šary, što parušyła pracu našaha aeraporta», — adznačyŭ jon, dadaŭšy: «My nie bačym pierśpiektyŭ».
Asobnaj prablemaj zastajucca litoŭskija pieravozčyki, čyje hruzaviki dahetul znachodziacca na terytoryi Biełarusi. Pavodle słoŭ palityka, situacyja zastajecca niavyznačanaj: «Siońnia pieravozčyki kažuć pra toje, što kali suma apyniecca vyšejšaj za košt transpartnaha srodku, to płacić niemetazhodna».
Pry hetym jon źviartaje ŭvahu na pryncypovy momant: «Na naša mierkavańnie, hetyja hruzaviki byli niezakonna zatrymanyja i pakinutyja na terytoryi Biełarusi, a ciapier havorka idzie pra apłatu».
Na jaho dumku, pry najaŭnaści dobraj voli pytańnie mahło b być vyrašana inakš. «Kali b była dobraja vola i narmalnyja adnosiny, jany byli b prosta vyzvalenyja», — adznačyŭ jon.
Havoračy ŭ cełym pra palityčny dyjałoh, Motuzas padkreślivaje, što pakul dla jaho niama źmiastoŭnaj asnovy. «My pakul nie bačym pierśpiektyŭ, bo pra što nam havaryć? Usie hetyja prablemy zachoŭvajucca, i situacyja ŭ Biełarusi nie źmianiłasia», — skazaŭ jon.
Dadatkovym faktaram jon nazyvaje ščylnyja suviazi Minska z Maskvoj. «My bačym, što hetyja adnosiny sapraŭdy vielmi blizkija», — dadaŭ palityk.
Kamientujučy mahčymuju rolu ZŠA, Motuzas adznačyŭ, što Vašynhton užo ŭciahnuty ŭ praces, adnak jaho palityka zastajecca ciažkaprahnazujemaj.
«Siońnia ZŠA ŭžo ŭciahnutyja ŭ hety praces. Pry hetym źniešniuju palityku Złučanych Štataŭ sapraŭdy składana prahnazavać», — skazaŭ jon.
U toj ža čas jon dapuskaje, što ZŠA mohuć adyhrać rolu pasiarednika. «Jany vystupajuć u roli svojeasablivaha miratvorca. Administracyja Trampa spadziajecca, što zmoža zaachvocić Łukašenku da dyjałohu ź Litvoj i inšymi krainami», — adznačyŭ jon.
Pry hetym litoŭski bok stanoŭča aceńvaje namahańni ZŠA pa vyzvaleńni palityčnych źniavolenych.
Adnak, niahledziačy na dypłamatyčnuju aktyŭnaść, Litva maje namier prytrymlivacca dziejnaj sankcyjnaj palityki. «Litva budzie prytrymlivacca palityki sankcyj, pakolki jany pryniatyja sumiesna z krainami Jeŭrapiejskaha sajuza», — padkreśliŭ Motuzas, dadaŭšy, što
«my nie bačym mahčymaści vieści pieramovy abo padtrymlivać kantakty ź biełaruskim bokam na palityčnym uzroŭni».
Ciapier čytajuć
Jak Ksiuša z SMA apynułasia ŭ Domie dziciaci pry žyvoj mamie? Voś što kaža sama maci5
Kamientary