Ukraina razhladaje mahčymaść arhanizacyi pastavak u Biełaruś nafty na davalnickich umovach. Pra heta paviedamiŭ vice-premjer — ministr rehijanalnaha raźvićcia, budaŭnictva i ŽKH Ukrainy Hienadź Zubko 10 listapada ŭ Minsku na 24-m pasiadžeńni mižuradavaj biełaruska-ŭkrainskaj źmiašanaj kamisii pa pytańniach handlova-ekanamičnaha supracoŭnictva, pieradaje BiełaPAN.
Pavodle jaho słoŭ, da pačatku pasiadžeńnia na pieramovach z namieśnikam premjer-ministra Biełarusi Uładzimiram Siamaškam abmiarkoŭvałasia mahčymaść pastavak nafty jak davalnickaj syraviny dla pierapracoŭki na biełaruskich pradpryjemstvach. «Śvietłyja naftapradukty nie źjaŭlajucca va Ukrainie takim brendam, jak biełaruskija pradukty charčavańnia. Nam treba hladzieć, jak brendavać jakaść, jakaja siońnia jość u biełaruskaj pradukcyi», — dadaŭ Zubko.
Jon taksama paviedamiŭ, što ŭkrainski bok bačyć značny patencyjał u aktyvizacyi supracoŭnictva ź Biełaruśsiu ŭ transpartna-łahistyčnaj śfiery, u pryvatnaści ŭ hruzavym račnym sudnachodstvie, i prapanuje biełaruskamu boku ŭdzielničać u arhanizacyi transpartnaha kalidora ad Bałtyjskaha mora da Čornaha i Kaśpijskaha moraŭ.
Jašče adnym pierśpiektyŭnym napramkam supracoŭnictva Zubko nazvaŭ pavieličeńnie pastavak biełaruskaj sielhastechniki dla fiermierskich haspadarak z vykarystańniem tavarnych kredytaŭ i inšych instrumientaŭ. Abmiarkoŭvajecca pytańnie stvareńnia novych sumiesnych zboračnych vytvorčaściaŭ na terytoryi Ukrainy. «Dla nas vielmi važnaje pytańnie łakalizacyi toj techniki, jakuju my nabyvajem», — dadaŭ ukrainski vice-premjer.
«Niahledziačy na tyja abmiežavańni, jakija ŭ nas uźnikali padčas sumiesnaj dziejnaści, my ich paśpiachova vyrašajem. Niahledziačy na dadatkovaje licenzavańnie i pryniaćcie niejkich abmiežavalnych faktaraŭ, nam sapraŭdy ŭdałosia vyjści na pavieličeńnie tavaraabarotu na 10%», — adznačyŭ Zubko.
Nahadajem, u listapadzie 2015 hoda Ukraina ŭviała śpiecpošlinu na šerah ekspartavanych Biełaruśsiu tavaraŭ u adkaz na «dyskryminacyjnyja dziejańni» z boku Minsku. Mienavita tak Kijeŭ tłumačyŭ ŭviadzieńnie ŭ Biełarusi sanitarna-hihijeničnaj ekśpiertyzy impartavanyj pradukcyi. U vieraśni 2016 hoda paśla niekalkich raŭndaŭ dvuchbakovych pieramoŭ śpiecpošlina była admienienaja.
Kamientary