U Varšavie prajšli try bujnyja manifiestacyi z nahody Dnia Niezaležnaści FOTAREPARTAŽ
U piatnicu, 11 listapada, z nahody Dnia Niezaležnaści Polščy ŭ Varšavie adbyłosia bolš za 15 masavych mierapryjemstvaŭ. 11 listapada 1918 hoda Polšča stała suvierennaj krainaj paśla 123 hadoŭ isnavańnia pad panavańniem troch impieryj, jakija padzialili jaje terytoryju.
Pa vulicach polskaj stalicy prajšli try bujnyja manifiestacyi: «Marš niezaležnaści», arhanizavanaja apazicyjaj demanstracyja i antyfašyscki marš.
«Marš niezaležnaści» arhanizavali polskija nacyjanalisty. U hetym hodzie jon prajšoŭ pad łozunham «Polšča — bastyjon Jeŭropy».
Manifiestacyju pravioŭ taksama apazicyjny Kamitet abarony demakratyi — hramadskaja struktura, jakaja paŭstała hady tamu paśla taho, jak da ŭłady ŭ Polščy pryjšła kansiervatyŭnaja partyja «Prava i spraviadlivaść».
U Dzień Niezaležnaści prajšoŭ taksama antyfašyscki marš. Jon pačaŭsia z centralnaj Zamkavaj płoščy. Siarod udzielnikaŭ hučali łozunhi suprać fašyzmu, niealiberalizmu i dyskryminacyi.
U masavych mierapryjemstvach u polskaj stalicy ŭziali ŭdzieł dziasiatki tysiač čałaviek. Niahledziačy na značnyja zbory ludziej, staličnaja palicyja paviedamlaje, što nijakich surjoznych incydentaŭ zafiksavana nie było. Za biaśpiekaj u Varšavie sačyli kala siami tysiač supracoŭnikaŭ pravaachoŭnych orhanaŭ.
Kamientary