Ekśpierty: Rost zarobkaŭ da $500 pahražaje novaj devalvacyjaj

Dyrektyŭnaje pavyšeńnie zarpłat da 500 dołaraŭ u ekvivalencie moža stvaryć pieradumovy dla čarhovaj devalvacyi biełaruskaha rubla. Takoje mierkavańnie vykazali ekśpierty, kamientujučy apošnija zajavy kiraŭnika dziaržavy.17 listapada na pres-kanfierencyi dla rasijskich rehijanalnych ŚMI Alaksandr Łukašenka ŭžo druhi raz za tydzień zajaviŭ pra nieabchodnaść pavieličeńnia zarpłat u valutnym ekvivalencie da 500 dołaraŭ. «U 2017 hodzie pamierci, ale treba vyjści na 500 dołaraŭ… Ja budu rabić usio dla taho, kab my vyjšli na 500», — padkreśliŭ jon.

Pavialičyć

Na dumku ekanamistaŭ, najaŭnaja siaredniaja zarpłata ŭ krainie (376 dołaraŭ u miesiac) źjaŭlajecca naturalnaj i adlustroŭvaje mahčymaści nacyjanalnaj ekanomiki. «Hety ŭzrovień adpaviadaje stupieni efiektyŭnaści vykarystańnia resursaŭ u ekanomicy. Jak tolki my jaho pieraadolvajem, uźnikajuć prablemy», — kaža Siarhiej Čały.

Jon adznačyŭ, što za apošnija dzieviać hadoŭ siaredniaja zarpłata u dołaravym ekvivalencie ŭ Biełarusi praktyčna nie źmianiłasia, ale dvojčy za hety pieryjad rabiłasia sproba vyvieści dachody nasielnictva na bolš vysoki ŭzrovień (u śniežni 2010-ha siaredniaja zarpłata składała 530 dołaraŭ, u śniežni 2014-ho — 621 dołar).

«Kali administracyjnym čynam zarpłata ŭ Biełarusi dasiahaje 500 i bolš dołaraŭ, uźnikajuć ciažkaści z realizacyjaj pradukcyi, źjaŭlajucca prablemy ŭ handlovym i płaciežnym bałansie, tamu adbyvajecca niepaźbiežnaja devalvacyja i zarpłaty ŭ dołaravym vyrazie viartajucca da ŭzroŭniu, pry jakim biełaruskaja pradukcyja moža być kankurentazdolnaj na źniešnich rynkach», — adznačyŭ Čały.

Kab zabiaśpiečyć 500-dołaravuju zarpłatu ŭ 2017 hodzie rynkavych čynam, patrabujucca vialikija inviestycyi, kažuć ekanamisty. «Kab stvaryć vysokapradukcyjnyja pracoŭnyja miescy i vyjści na rost pradukcyjnaści pracy, jaki dazvolić zabiaśpiečyć 500-dołaravuju zarpłatu ŭ 2017 hodzie, patrabujecca pryciahnuć 10-13 młrd dołaraŭ», — prahnazuje kiraŭnik Navukovaha daśledčaha centra Miziesa Jarasłaŭ Ramančuk.

Adnak, dadaje jon, pakolki takoha rostu inviestycyj u nastupnym hodzie nichto nie čakaje, vykanać zadaču pa pavieličeńni zarpłat da 500 dołaraŭ možna tolki administracyjnym sposabam, ažyćciaviŭšy hrašovuju emisiju.

«Na miescy Nacyjanalnaha banka, jaki imkniecca zabiaśpiečyć stabilnaść kursu nacyjanalnaj valuty i źnižać inflacyju, varta surjozna zakłapacicca ahučanymi płanami prezidenta pa dasiahnieńni 500-dołaravaj zarpłaty», — adznačyŭ Ramančuk.

Anałahičnaha mierkavańnia prytrymlivajucca inšyja naziralniki. «Kali słovy prezidenta lahuć na spravy ŭrada i zarpłaty buduć pavyšacca administracyjnym čynam, u tym liku za košt emisijnaha stanka, to nastupstvy dla ekanamičnaj stabilnaści buduć, chutčej za ŭsio, niehatyŭnymi», — ličyć ekanamist Anton Bołtačka.

• 0
• 0
• 0
• 0
• 0
• 0
• 0
• 0