Kiraŭnik Dziaržsavieta, Saŭmina i kampartyi Kuby Raul Kastra paabiacaŭ praciahvać spravu svajho brata Fidela, jaki pamior 25 listapada, piša VVS.
«My klaniomsia abaraniać Radzimu i sacyjalizm!» — abviaściŭ jon u subotu na mitynhu na płoščy Antonia Masiea ŭ horadzie Santjaha-de-Kuba, kudy byŭ dastaŭleny z Havany prach Fidela Kastra.
Taksama jon zajaviŭ, što na Kubie nie buduć nazyvać vulicy ŭ honar pamierłaha Fidela Kastra abo stavić jamu pomniki, kab paźbiehnuć prajaŭ kultu asoby. Raul paabiacaŭ, što parłamient u svaju nastupnuju siesiju prymie adpaviedny zakon.
Hety zakon, zajaviŭ brat Fidela Kastra, zabaronić nazyvać u honar niabožčyka vulicy, ustanovy, parki i inšyja hramadskija miescy, a taksama ŭzvodzić u jaho honar pomniki i stavić biusty.
Pryniaćcie takoha zakona było žadańniem samoha lidara revalucyi, jaki pamior na minułym tydni. Jak zajaviŭ Raul, Fidel zabaraniaŭ vykarystoŭvać svajo imia i vobraz i pry žyćci. Mienavita hetym jon patłumačyŭ paraŭnalna redkaje vykarystańnie vobrazu Kastra ŭ kamiercyjnych metach, u adroźnieńnie, naprykład, ad jaho paplečnika Ernesta Če Hievary.
Na raźvitańni ź Fidelem Kastra ŭ horadzie Santjaha-de-Kuba prysutničajuć niekalki byłych i dziejučych lidaraŭ dziaržaŭ — prezident Balivii Eva Marales, lidar Nikarahua Daniel Arteha, vieniesuelski prezident Nikałas Madura i byłyja prezidenty Brazilii Łuła da Silva i Dyłma Rusief.
Kamientary