Čynoŭniki vykraślili Hurkova z usich śpisaŭ i całkam pazbavili finansavańnia

U niadzielu 11 śniežnia «narodny čempijon» pravioŭ prafiesijny boj u Kitai. Na abviaščeńnie sudziejskaha rašeńnia Hurkoŭ vyjšaŭ ź bieł-čyrvona-biełym ściaham na plačach. Heta pieršy za 20 hadoŭ vypadak, kali dziejny biełaruski top-spartsmien publična ŭźniaŭ nacyjanalny ściah padčas spabornictvaŭ.

Pavialičyć

«Ja zaŭždy maryŭ heta zrabić. Ale kali byŭ u zbornaj Biełarusi, nie moh na takoje pajści, kab u dačynieńni da maich siabroŭ-spartsmienaŭ nie zdaryłasia represij. Paśla pieramohi na čempijanacie śvietu sioleta ŭ traŭni mnie nie tolki nie viarnuli staŭku ŭ Minsportu Biełarusi, mianie vykraślili z usich mahčymych śpisaŭ. Navat sa SDIUŠAR-7. U majho treniera zrezali zarpłatu. Tamu siońnia ja mahu nie chvalavacca, što niekaha padstaŭlu».

— Raniej vy kazali, što nie vyrakajeciesia dziaržaŭnaha ściaha. Vaša pazicyja źmianiłasia?

— Nie, ničoha nie źmianiłasia. Kali ŭ Kitai ja vychodziŭ u rynh, na vialikim ekranie areny łunaŭ dziaržaŭny ściah.

Kitajski fanat Hurkova fatahrafujecca na fonie biełaruskaha dziaržaŭnaha ściaha

— Dahetul niemahčyma znajści vaš dvuboj z Mierhienam Bilałavym na youtube. Ci možacie raspavieści, što adbyvałasia ŭ rynhu.

— Heta doŭhaja historyja. Pačnu z taho, što ŭ Kitaj ja trapiŭ vielmi niečakana. Paśla čempijanatu śvietu doŭha nie vystupaŭ. Płanavaŭsia dvuboj u Aŭstralii za tytuł čempijona śvietu ź miascovaj supierzorkaj Tobi Śmitam, jakoha doŭha nichto nie moh pieramahčy. Kali pačałasia padrychtoŭka, to menedžmient aŭstralijca paviedamiŭ: u Śmita depresija, jon nie budzie bicca. Padzieja sarvałasia. Na inšyja turniry mianie nichto nie zaprašaŭ. Tady ja napisaŭ u Adesu svajmu byłomu sapierniku i tavaryšu Piatru Nakaniečnamu. Jon znajšoŭ dla mianie boj u Kitai. Času na hruntoŭnuju padrychtoŭku nie było, ale čakałasia, što apanient budzie nie samy mocny. Kali ŭžo vylataŭ na boj, akazałasia, što mianie čakaje čempijon śvietu pa kikboksinhu Mierhien Bilałaŭ.

— Ci składany byŭ boj?

— Užo va Urumčy padčas treniroŭki ja mocna paškodziŭ nahu. Ale da boju mianie dapuścili. Mierhien vielmi adčuvalny na rukach. Jon čempijon śvietu jašče i pa rukapašnym bai, byŭ u zbornaj Kazachstana pa boksie. Tamu jaho ruk ja aścierahaŭsia, i ź pieršaha raunda pačaŭ bić pa nahach, klinčavać i dadavać kaleni. Pieramoha nie była prostaj. Samomu cikava było b pahladzieć videa. Ale youtube u Kitai nie zapuskajecca, jak znajści turnir u internecie, ja nie viedaju.

Pavialičyć

Pavialičyć

Ci sapraŭdy Hurkovu całkam pierakryli kisłarod u Biełarusi?

«Z 1 vieraśnia Vital sapraŭdy nie źjaŭlajecca našym navučencam, — paćviardžaje infarmacyju Mikałaj Tyčko, dyrektar SDIUŠAR-7. — Prablema ŭźnikła na ŭzroŭni zakanadaŭstva. Kali chodzić pravierka, i čałavieka niama na zaniatkach u zale, a jon znachodzicca za miažoj, to pa zakanadaŭstvie tak dziejničać nie atrymlivajecca».

— Prablema ŭ tym, što čałaviek pieramoh na čempijanacie śvietu, i jaho paśla takoha adusiul vykidvajuć. Navat sa SDIUŠAR. Moža być, Zasłužany majstar sportu lepš za inšych viedaje, jakich płanaŭ jamu prytrymlivacca.

— Z hetym taksama možna pahadzicca. Vitalik — vielmi pavažany spartsmien, majstar najvyšejšaha ŭzroŭniu. Ale jość jašče adzin momant. Jamu 31 hod. I jon u takim uzroście — navučeniec dziciača-junackaj škoły. Čamu b nie pieradać takoha spartsmiena u Respublikanski centr alimpijskaj padrychtoŭki? Tym bolš, što tajski boks pryznany ŭ Mižnarodnym alimpijskim kamitecie. Čamu niekamu miesca ŭ RCAPie jość, a Vitaliku niama. Nasamreč, my pieražyvajem za toje, što ź im adbyvajucca takija rečy. Ale ja nie mahu ŭpłyvać na skład RCAP i na toje, jakija rašeńni prymajucca fiederacyjaj.

Pra cisk na Vitala Hurkova stała viadoma pierad Čempijanatam śvietu—2016. Bajec zajaviŭ, što jaho vymusili admovicca ad staŭki ŭ Minsportu, i hrošaj na jaho adpraŭku na čempijanat niama. Hałoŭny trenier zbornaj Michaił Ściapanaŭ vykazaŭ mierkavańnie, što Hurkoŭ, mahčyma, užo nie toj i jaho muzyčnaja karjera ŭ składzie hurta Brutto zaminaje spartovaj padrychtoŭcy.

U adkaz na heta biełarusy u miežach prajektu «Narodny čempijon» za adzin dzień sabrali hrošy dla bajca na pajezdku na čempijanat śvietu.

Ale na čempijanacie śvietu ŭ šviedskim Jončopinhu Hurkoŭ zdabyŭ zołata. U finale jon «źniščyŭ» zorku prafiesijnaha muaj-taj z Tajłanda. Za heta dziaržava vypłaciła jamu kala 1500 dołaraŭ premii.

Zdavałasia b, čynoŭniki mahli pryznać svaju pamyłku i adnavić sparstmiena na staŭcy ŭ Minsportu. A to i pryznačyć jamu za jakuju-niebudź dadatkovuju stypiendyju. Ale biełaruskija čynoŭniki — nieprabiŭnaja ściana.

• 0
• 0
• 0
• 0
• 0
• 0
• 0
• 0