Rasijskaja «Transnafta» paličyła abhruntavanym rost taryfaŭ pa dvuch vietkach najbujniejšaha mahistralnaha naftapravoda «Družba», jaki prachodzić pa terytoryi Biełarusi, ale pa taryfach značna mienšaha pamieru, čym prapanoŭvaje biełaruski bok, piša BiełaPAN.
«PAT «Transnafta» ličyć ekanamična abhruntavanym pavyšeńnie taryfaŭ na pasłuhi AAT «Homieltransnafta Družba» na 5,8%, a AAT «Połacktransnafta Družba» na 11,76%. Pra heta my siońnia infarmavali našych biełaruskich kaleh», — cytuje TASS aficyjnaha pradstaŭnika kampanii Ihara Dziomina.
Pavodle jaho słoŭ, u «Transnafty» byŭ praviedzieny analiz pradstaŭlenych materyjałaŭ i padrychtavany prapanovy pa vieličyni taryfaŭ u 2017 hodzie. Heta było zroblena ŭ adpaviednaści ź dziejnaj mietodykaj źmieny taryfaŭ na pasłuhi pa transparciroŭcy nafty pa mahistralnych trubapravodach, raźmieščanych na terytoryi Biełarusi, a taksama pa vynikach rabočych sustreč śpiecyjalistaŭ «Transnafty» z pradstaŭnikami «Połacktransnafta Družba» i «Homieltransnafta Družba».
«Nami taksama było nakiravana kožnaj z kampanij ekśpiertnaje zaklučeńnie pa pytańni ŭstanaŭleńnia stavak taryfaŭ na pasłuhi, jakoje ŭklučaje pazicyju «Transnafty» pa dadzienych, vykarystanych u raźlikach biełaruskimi kalehami», — skazaŭ Dziomin.
Pavodle jaho słoŭ, kampanija 23 śniežnia nakiravała biełaruskim trubapravodnym kampanijam svaje prapanovy. Biełaruski bok pavinien adkazać da 25 śniežnia. «My čakajem adkazu ad biełarusaŭ. Kali jany nie pahodziacca z našymi prapanovami, to źvierniemsia ŭ FAS Rasii», — adznačyŭ pradstaŭnik «Transnafty».
Raniej Biełaruś paviedamiła «Transnafty» ab namiery pavysić taryf na transparciroŭku nafty na 20,5%.
U hetym hodzie Biełaruś užo źbirałasia pavysić taryfy na tranzit rasijskaj nafty. Dakumient ab ich pavyšeńni ŭ siarednim na 50% pavinien byŭ nabyć moc 11 kastryčnika, adnak napiaredadni, 10 kastryčnika, vice-prem`ier Biełarusi Uładzimir Siamaška paviedamiŭ ab admienie pavyšeńnia taryfaŭ na tranzit rasijskaj nafty ŭ abmien na adnaŭleńnie ab`iomaŭ pastavak nafty z Rasii.
Zhodna ź biełaruska-rasijskimi damoŭlenaściami pa vyrašeńni naftahazavaha kanfliktu da 20 kastryčnika Minsk pavinien byŭ pieraličyć 281 młn dołaraŭ u jakaści zapazyčanaści za pastaŭleny rasijski pryrodny haz. Adnak hetaha nie adbyłosia.
Čakałasia, što pytańnie budzie ŭrehulavany paśla vizitu ŭ Minsk prem`ier-ministra Rasii Dźmitryja Miadźviedzieva 28 kastryčnika, a taksama paśla sustrečy Alaksandra Łukašenki z Uładzimiram Pucinym 22 listapada ŭ Maskvie.
8 śniežnia Biełaruś ažyćciaviła avansavy płaciež za pastaŭku rasijskaha hazu. Pamier płaciažu, ab`iom i košt apłačanaha hazu nazvanyja nie byli. Adnak vice-prem`ier RF Arkadź Dvarkovič u kancy minułaha tydnia zaviŭ, što Rasija viarnuła hety płaciež, pakolki čakaje poŭnaj apłaty zapazyčanaści za haz.
Ciapier čytajuć
Jak u halečy śpivałasia radnia Łukašenki? Małaviadomyja fakty49
Kamientary