Padatkaviki rajacca z hramadskaściu, jak karać pradaŭcoŭ samahonu i kantrafaktnaha ałkaholu
Ministerstva pa padatkach i zborach vyniesła na hramadskaje abmierkavańnie prajekt źmienaŭ u Administratyŭny kodeks.
Z prapanavanymi dapaŭnieńniami možna aznajomicca na aficyjnym sajcie MPZ. Jany tyčacca administracyjnych pravaparušeńniaŭ pry abarocie tytuniovaj i ałkaholnaj pradukcyi.
U pryvatnaści, padatkaviki prapanujuć kankretyzavać adkaznaść za prodaž kantrafaktnaha ałkaholu, a taksama ałkaholu ŭłasnaha vyrabu.
Pakul što za heta nakładajecca štraf u pamiery da 10 bazavych vieličyniaŭ. Adnak kali parušalnik pryznaje vinu, jamu daviadziecca zapłacić tolki 0,5 bazavaj vieličyni.
Ciapier ža prapanujecca na pieršy raz štrafavać na 5—20 bazavych vieličyniaŭ, a za paŭtornaje parušeńnie — na 10—30 bazavych vieličyniaŭ.
Jak i raniej, zabaronienyja ałkaholnyja napoi buduć kanfiskoŭvacca.
Taksama prapanujecca ŭzmacnić adkaznaść za ŭvoz u Biełaruś kantrafaktnaha ałkaholu.
Zaŭvahi i prapanovy pa prajekcie treba nakiroŭvać u ministerstva da 20 studzienia (uklučna) na elektronny adras: [email protected] z paznakaj «Abmierkavańnie prajekta».
Kamientary