Ceły dzień źbivali, hvałtavali karnizam — va Uździe sudziać traich za žorstkaje zabojstva
Troje žycharoŭ Uzdy 9 hadzin źbivali svajho znajomaha. Jany nanieśli achviary bolš za sotniu ŭdaraŭ rukami, nahami i mietaličnaj truboj. Siońnia hetaja trojca na łavie padsudnych — mužčynam pahražaje śmiarotnaje pakarańnie.
Samahonny baron
Minski abłasny sud pačaŭ razhlad hetaj spravy 9 studzienia na vyjaznym pasiedžańni va Uździe.
Abvinavačanyja — uździency Fiodar Adamovič, Maksim Čarnavus i Dźmitryj Chałupka. U mai 2016 jany vypivali razam sa svaim 47-hadovym znajomym Ivanam Machnačom. A paśla — žorstka zabili jaho.
Usich — i abvinavačanych, i achviaru — u pieršuju čarhu jadnaje ałkahol. A taksama jaho pradaviec i vytvorca Fiodar Adamovič.
Fiodaru Adamoviču 41 hod. Adukacyju maje bazavuju. Da zatrymańnia žyŭ z sužycielkaj, maje 12-hadovaha syna.
Na sudzie Adamovič trymaŭsia ŭpeŭniena. Jon adziny, chto nie advaročvaŭsia i nie zakryvaŭ tvar.
Raniej Adamovič užo byŭ asudžany — u 2006 hodzie jaho sudzili za złosnaje chulihanstva. Jon atrymaŭ 240 hadzin hramadskaj pracy.
Adamovič ličyŭsia indyvidualnym pradprymalnikam, ale, pa słovach inšaha abvinavačanaha, Čarnavusa, nidzie nie pracavaŭ: «Jon jak škołu skončyŭ, ničym nikoli nie zajmaŭsia».
Zatoje mieŭ šmat znajomych — da jaho niaredka chadzili pa parady, naprykład, pry vyrašeńni žyllovych pytańniaŭ. Nie za prosta tak, samo saboj.
Akramia taho, dobry prybytak Adamoviču prynosiŭ handal samahonam. Jon jaho nie tolki pradavaŭ, ale i davaŭ «na vieksiel». Pra pazyki nikoli nie zabyvaŭsia — zapisvaŭ usio. Časta daŭhi ciahnulisia za «klijentami» pa niekalki hadoŭ i dasiahali nie adnoj sotni rubloŭ.
Pry hetym mietady viartańnia hrošaj u Adamoviča byli svojeasablivyja. Jon prymušaŭ ludziej kapać sabie mahiły, pałochaŭ piłoj i pahražaŭ adrezać nohi. Inšamu daŭžniku pahražaŭ vyrazać i zabrać novy škłopakiet.
Kali ŭ čałavieka hrošaj nie było, doŭh možna było adpracavać na adamovičskaj haspadarcy.
Darečy, Fiodar Adamovič adziny, kaho vinavaciać nie tolki ŭ zabojstvie. U dačynieńni da jaho zaviedzienyja jašče dźvie spravy — za «prymus u vykanańni abaviazkaŭ» (jašče raniej, u 2014 hodzie, jon patrabavaŭ u znajomaha 2 miljony «starych» rubloŭ za pradadzieny raniej samahon. Paśla — jakraz vaziŭ taho kapać mahiłu) i kradziež (u 2016 hodzie jon iznoŭ źbivaŭ taho ž mužčynu, znoŭ ža za nieapłačany samahon. Zatym — zabraŭ u jaho 3 miljony rubloŭ).
Mieŭ Adamovič i «zaklataha voraha» — miascovaha pradprymalnika Hienadzia Sudnika. Kab nie zabojstva Machnača, pamiž mužčynami pavinien byŭ by być sud — Adamovič zajaŭlaŭ, što nibyta pa zamovie Sudnika jaho źbivali i taksama vyvozili kapać sabie jamu.
Fiodaru Adamoviču byŭ vinien za toj samahon i adzin z abvinavačanych — 35-hadovy Maksim Čarnavus. Čarnavus taksama maje sudzimaści, za naniasieńnie cialesnych paškodžańniaŭ. U 2006 hodzie jon byŭ prysudžany da vypraŭlenčych rabot, u 2009 hodzie atrymaŭ 2 hady chimii.
Zabity 47-hadovy Ivan Machnač i sam nie raz adbyvaŭ pakarańnie. Mužčyna žyŭ faktyčna napaŭžabrakom. «Siam-tam chadziŭ, prasiŭ hrošaj», — pa vyrazach abvinavačanych.
U Machnača była svaja kvatera — trochpakajoŭka. Ale na joj visieŭ vialiki doŭh za kamunalnyja pasłuhi, plus «samahonnyja» daŭhi za niekalki hadoŭ pierad Adamovičam… U vyniku Machnač vyrašyŭ pradać žyllo. Dapamahčy ŭ hetym vyzvaŭsia toj ža Fiodar Adamovič.
«Raptam uźnikli asabistyja niepryjaznyja adnosiny»
Apisańnie traŭmaŭ zahinułaha zajmaje niekalki staronak: pierałomy, rany, kryvapadcioki, krovaźlićci…
Ale kavałkam truby achviaru nie tolki źbivali.
«Nie mienš za dva razy ŭvodzili tarcavuju častku pradmieta ŭ vobłaść zadniaha prachodu paciarpiełaha», — začytaŭ prakuror.
Ad šeraha traŭmaŭ mužčyna skanaŭ na miescy.
U abvinavačańni ŭ jakaści pryčyny źbićcia ahučvajecca takaja farmuloŭka: «pamiž mužčynami raptam uźnikli asabistyja niepryjaznyja adnosiny».
Svaju vinu pryznaŭ tolki adzin z abvinavačanych — 25-hadovy Dźmitry Chałupka. I toje častkova.
«Udary nanosiŭ. Ale namieru zabivać u mianie nie było», — skazaŭ jon.
«Nu što, Maksim, zabiŭ?»
Padrabiaznyja pakazańni daŭ Maksim Čarnavus.
Spačatku prakuror paprasiŭ jaho raspavieści pra svajo žyćcio.
Apovied atrymaŭsia karotkim: naradziŭsia i pražyŭ usio žyćcio va Uździe, skončyŭ 9 kłasaŭ, advučyŭsia ŭ PTV na elektrahazazvarščyka. Potym — armija, niaŭdałaja sproba pastupić u vajskovuju akademiju.
«Potym pačaŭ sustrakacca ź dziaŭčynaj. Syn, šlub…» — pacisnuŭ plačyma Čarnavus.
Siońnia mužčyna ŭžo raźviedzieny. 13-hadovy syn žyvie z byłoj žonkaj.
Sam Čarnavus pracavaŭ to tut, to tam: apošnim časam nieaficyjna padpracoŭvaŭ zvarščykam. Byŭ aformleny jak apiakun svajoj staroj babuli. Kaža, što «zhubiŭ 20% zdaroŭja» — atrymaŭ traŭmu, byli prablemy z rukoj. Adnu apieracyju zrabili, treba było rabić jašče adnu.
Žyŭ z sužycielkaj Taćcianaj. Žančyna taksama piła. Praz heta raźviałasia z byłym mužam, zhubiła pracu.
Ranicaj 19 maja 2016 hoda da Čarnavusa zajechaŭ na mašynie Fiodar Adamovič razam ź Dźmitryjem Chałupkam. Prapanavaŭ dapamahčy pa haspadarcy, paśla abiacaŭ «prastavicca» samahonkaj.
Raniej Čarnavus užo dapamahaŭ Adamoviču i jaho znajomym, naprykład, rabiŭ kaśmietyčny ramont u kvatery Dźmitryja Chałupki. Praź jaho i paznajomiŭsia z Adamovičam u lutym. A Chałupka byŭ siabram dziacinstva sužycielki Čarnavusa.
Razam z sužycielkaj i siabroŭkaj, što haściavała ŭ ich, Čarnavus pryjechaŭ damoŭ da Adamoviča. Apošni vynies brahi, adrazu vypili.
Uvohule, raskazaŭ Čarnavus, Adamovič, faktyčna, vałodaŭ dvuma damami pa vulicy Kamsamolskaj. U adnym, domie numar 16, jon žyŭ z žančynaj i dziciom, a druhi, numar 15, što stajaŭ na druhim baku vulicy, užo hadoŭ ź dziesiać «dahladaŭ».
Dom №15 raniej naležaŭ niejkaj babuli, paśla jaje śmierci svajaki staroj paprasili Adamoviča pryhladvać za chataj. Toj rasparadžaŭsia majomaściu jak chacieŭ. Na toj momant tam užo niekalki miesiacaŭ žyli — i pili — Chałupka i Machnač. Adamovič nabyvaŭ im ježu, davaŭ ałkahol. Abodva mužčyny čakali, pakul ich ułasnyja kvatery buduć adramantavanyja pierad prodažam.
«Jon chacieŭ nibyta pradać kvateru Ivana Machnača, a taho pasialić u hety dom, nibyta pradać jaho jamu. Kupić Machnaču trochi vopratki, a jaho kvateru zabrać sabie», — śćviardžaje Maksim Čarnavus.
U toj dzień, kaža Čarnavus, Adamovič prymušaŭ Machnača niejkuju raśpisku pisać — a toj nie moh. Ruki mocna treślisia, a Adamovič pachmialicca jamu nie davaŭ.
Paśla mužčyny adjechali. Kali viarnulisia, to Čarnavus uziaŭsia za pracu. Treba było kasić travu, i jon pajšoŭ u dom №15 pieraapranucca.
«Ja ŭbačyŭ, tam Fiodar Adamovič źbivaŭ Machnača, — śćviardžaje mužčyna. — Kazaŭ štości nakštałt: 4 hady jaho karmiŭ, a Machnač nibyta chacieŭ pierapradać kvateru Sudniku».
Paźniej, pa słovach Čarnavusa, Adamovič jašče raz źbiŭ Machnača — biŭ kalenam u hałavu.
I pieršy, i druhi raz, śćviardžaje Čarnavus, mienavita jon supakojvaŭ Adamoviča, i toj spyniaŭ źbićcio.
Paśla jon trochi pakasiŭ. Jaho sužycielka zvaryła sup. Usie razam pajeli.
Machnač paprasiŭ cyharetu. Čarnavus dazvoliŭ uziać tolki adnu, bo było mała. Toj naadvarot — zabraŭ niekalki, pakinuŭ tolki adnu.
«Nu i ja daŭ jamu pa iłbie, i pa patylicy», — pryznaje Čarnavus. Ale śćviardžaje — paškodžańniaŭ nanieści nie chacieŭ, tak, trochi pravučyŭ.
Paśla abiedu Maksim rabiŭ kletku dla trusoŭ. Ale nieŭzabavie pačuŭ kryki i viarnuŭsia ŭ dom.
«Machnač lažaŭ na padłozie. Štany byli spuščanyja… užo byŭ uviedzieny toj… mietaličny pradmiet u zadni prachod. I Adamovič rabiŭ ruchi tudy-siudy pradmietam i kazaŭ: «Budzieš viedać, jak leźci Sudniku ŭ takoje ž miesca», — uzhadvaje Čarnavus. — Nie kožny dzień takoje ŭbačyš… dumaju, heta była častka karniza. Mietaličnaja truba».
Čarnavus nibyta adšturchnuŭ Adamoviča. Toj pačaŭ łupcavać svaju achviaru truboj. Machnač kryčaŭ: «Fiedzia, chopić!».
Machnač byŭ uvieś u kryvi. Jaho padniali, pasadzili na łožak. Čarnavus prapanavaŭ źbitamu vyklikać chutkuju. Toj nibyta admoviŭsia.
Vypili jašče. Adamovič iznoŭ prynios brahi.
Čarnavus na karotki čas adłučyŭsia. A kali viarnuŭsia, to znoŭ ubačyŭ, jak Machnač staić na kaleniach sa spuščanymi štanami. Adamovič iznoŭ trymaŭ u ruce pałku i ŭvodziŭ jaje ŭ zadni prachod svajoj achviary. Pobač stajaŭ Chałupka. Machnač kryknuŭ jamu štości, i Chałupka pačaŭ jaho źbivać, uzhadvaje Maksim Čarnavus.
Jon nibyta spyniŭ źbićcio, śćviardžaje Čarnavus, znoŭ pakłaŭ Machnača na łožak. Toj dychaŭ, čas ad času stahnaŭ.
Čarnavus viarnuŭsia da svaich astatnich pryjacielaŭ, vypiŭ. Nieŭzabavie jamu stała drenna — jon paprasiŭ sužycielku pryhladzieć za padziejami. A sam loh na kanapu i zasnuŭ. Adkryŭ vočy, kali jaho budzili dvoje milicyjantaŭ.
«Nu što Maksim, zabiŭ?» — spytali jany.
«Źbivaŭ, ale nie zabivaŭ»
Dźmitryj Chałupka spačatku admoviŭsia, ale paźniej usio ž daŭ pakazańni. Ź blizkich svajakoŭ u jaho tolki dziadźka, maci była pazbaŭlenaja baćkoŭskich pravoŭ. Sam jon skončyŭ 11 kłasaŭ u miascovaj himnazii — 3 hady ź ich pravioŭ u Suvoraŭskaj vučelni, ale syšoŭ. Paśla pracavaŭ na budoŭlach u Rasii.
Ź Fiodaram Adamovičam jaho paznajomiŭ Ivan Machnač. Adamovič daviedaŭsia, što chłopiec choča pamianiać svaju kvateru na mienšuju, prapanavaŭ tamu zrabić kaśmietyčny ramont za svoj košt. Pakul idzie ramont, jon zaprasiŭ Chałupku pažyć u jaho domie, u jakim užo žyŭ Ivan Machnač. Uvohule, paźniej razmova ŭžo išła ab tym, kab pierasialić Chałupku ŭ dom cieščy Adamoviča — praŭda, detali tak i nie abhavorvalisia.
Dźmitryj Chałupka paćvierdziŭ — u dzień zabojstva Ivana Machnača ŭsie jany razam ź dźviuma žančynami vypivali. Ciaham dnia Adamovič niekalki razoŭ biŭ Machnača, kryčaŭ, što toj «pracuje na Sudnika». Adamoviča supakojvali, ale toj potym zavodziŭsia i iznoŭ pačynaŭ łupcavać pryjaciela. Paćvierdziŭ Chałupka i epizod z pałkaj — jon taksama bačyŭ, jak Adamovič zasoŭvaŭ jaje ŭ zadni prachod niaščasnaha Machnača.
Sam jon taksama dvojčy źbivaŭ Machnača — spačatku toj štości nie toje jamu skazaŭ, paśla — udaryŭ mietaličnym saŭkom pa ruce. Ale, nastojvaje Chałupka, u žyćciova važnyja orhany ci pa hałavie nie biŭ, jaho ŭdary nie mahli pryvieści da śmierci.
Paśla jon jašče vypiŭ, paspaŭ. Pračnuŭsia, kali Machnač užo lažaŭ miortvy.
Adamovič zahadaŭ vycierci ślady kryvi i prytrymlivacca viersii, nibyta Machnač pryjšoŭ užo źbitym da ich.
Vyklikali chutkuju. Daktary pieraviarnuli cieła, ubačyli jaho stan i vyklikali milicyju.
Ničoha nie čuŭ, nie viedaŭ, nie bačyŭ
Narešcie vysłuchali i Fiodara Adamoviča. Jon koratka raspavioŭ pra siabie: paśla škoły padpracoŭvaŭ na zavodzie, zajmaŭsia viasielnym biznesam: arhanizoŭvaŭ viasielli, videazdymku. Vyrablaŭ samahon — u pryvatnych metach. IP u jaho było adkryta na videazdymku, ale apošnim časam Adamovič, pa jaho słovach, vyrašyŭ zaniacca fiermierstvam — vyroščvać trusoŭ.
Usie abvinavačvańni ŭ pahrozach, źbićci «klijentaŭ» i prymusach kapać mahiły Adamovič nie pryznaŭ.
«Nikoha ja nie vyvoziŭ nikudy. Paciarpiełaha viedaju daŭno, jon byŭ mnie vinien 5 miljonaŭ: prychodziŭ, braŭ samahon, hrošy nie davaŭ… I tak apošnija 5 hadoŭ. Ale ja jaho nikudy nie vaziŭ, nie biŭ, piłoj nie pahražaŭ, navat dumak takich nie było», — zajaviŭ jon.
A Machnač, pa jaho słovach, płanavaŭ padaryć jamu svaju kvateru za toje, što Adamovič hladzieŭ za im 4 hady.
«Ale ja dumaŭ kupić jamu niejki domik u vioscy, navat jeździli hladzieć», — zapeŭniŭ Adamovič.
A ŭviečary 19 maja Adamovič, pa jaho słovach, byŭ u svajoj chacie. Tolki kala 10 viečara jon nibyta zajšoŭ u dom №15 i pabačyŭ, što Machnač lažyć na padłozie, a nad im stajać Čarnavus i Chałupka.
«Ja spytaŭ, što zdaryłasia, ale mnie nichto ničoha nie skazaŭ. Ja dastaŭ telefon i adrazu pazvaniŭ pa chutkuju dapamohu», — skazaŭ Adamovič.
Ciapier čytajuć
Jak u halečy śpivałasia radnia Łukašenki? Małaviadomyja fakty49
Kamientary