U sudzie Barysaŭskaha rajona 26 studzienia abvieščany prysud pa spravie ab atručeńni ŭharnym hazam šaści čałaviek. Vinavatymi ŭ pryčynieńni śmierci pa nieaściarožnaści pryznanyja dva ślesary avaryjna-ratavalnaj słužby miascovaha harhaza. Jany pryhavoranyja da čatyroch hadoŭ abmiežavańnia voli ŭ kałonii-pasialeńni.
Trahiedyja adbyłasia 26 studzienia 2016 hoda ŭ domie pa vulicy Dniaproŭskaj. Zahinuła siamja z čatyroch čałaviek, jakija žyli ŭ kvatery № 4, dzie byli prablemy z hazavaj kałonkaj. Uharny haz pajšoŭ pa stajaku, u vyniku čaho śmiarotnaje atručeńnie atrymała taksama siamiejnaja para piensijanieraŭ, jakija žyli pa susiedstvie.
U chodzie śledstva vyśvietliłasia, što žychary kvatery № 4 źviartalisia sa skarhami da hazavikoŭ. Na vyklik za miesiac da trahiedyi pryjazdžali abvinavačvanyja Alaksiej Łukaš i Alaksandr Čyściakoŭ. Pavodle ich słoŭ, na momant ahladu mielisia nieistotnyja niepaładki, pahrozy ŭciečki hazu jany nie vyjavili.
Pazicyja abarony hruntavałasia na dvuch faktarach: pieršy — trahiedyja adbyłasia ŭ vyniku pierakulvańnia ciahi ŭ kvatery № 4; druhi — adsutnaść narmalnaj vientylacyi. Heta pryviało da taho, što ŭharny haz trapiŭ u pamiaškańnie. Akramia taho, pry ramoncie dachu doma, dzie adbyłosia zdareńnie, byli ŭstanoŭleny niapravilnyja vientylacyjnyja kazyrki. Na dumku abvinavačvanych, heta taksama mahło paŭpłyvać na zychod avaryi.
Pavodle viersii śledstva, niaspraŭnaść hazavaj kałonki pryviała da taho, što ŭharny haz raspaŭsiudziŭsia pa kvatery № 4. Niaspraŭnaść zaklučałasia ŭ tym, što na pavierchniach katła było śmiećcie, tłušč i brud — u 30 razoŭ vyšejšaje za normu. Pačyścić pryładu pavinny byli hazaviki. Pakolki jany hetaha nie zrabili, adbyłasia trahiedyja.
Sud paličyŭ pazicyju abvinavačvańnia bolš pierakanaŭčaj i pryhavaryŭ Alaksieja Łukaša i Alaksandra Čyściakova da čatyroch hadoŭ abmiežavańnia voli z nakiravańniem u papraŭčuju ŭstanovu.
Varta adznačyć, što paciarpiełyja nie nastojvali na strohim pakarańni dla fihurantaŭ spravy.
Jak paviedamiła pamočnik staršyni suda Barysaŭskaha rajona Zoja Haravienka, bolš za 120 tysiač rubloŭ spahnana z «Minabłhaza» ŭ jakaści kampiensacyi maralnaj škody paciarpiełym.
Prysud zakonnuju siłu nie nabyŭ i moža być abskardžany.
Kamientary