Kapsułu z telepuzikam vykapali ŭ Łondanie na 33 hady raniej za termin
«Kapsułu času» z multhierainiaj-telepuzikam Lalaj, dyskam Spice Girls, inhalataram dla źniaćcia prystupaŭ astmy, fatahrafijaj pryncesy Dyjany, insulinam u šprycy, brytanskimi manietami i tamahočy, zakapanuju viadučymi Bi-bi-si ŭ 1998 hodzie, vyniali na 33 hady raniej za termin pry budaŭničych pracach u Łondanie.
Źmieściva «pasłańnia naščadkam» adbirałasia na asnovie hałasavańnia hledačoŭ najpapularnaj dziciačaj teleprahramy Brytanii «Sini Piter», piša VVS.
Pamyłkova adkrytaja ŭ čaćvier kapsuła źmiaščaje ŭ sabie charakternyja prykmiety pop-kultury kanca 1990-ch.
Kali Ryčard Bekan i Keci Chił, jakija byli ŭ tyja hady viadučymi teleprahramy, zakopvali kapsułu ŭ 1998 hodzie pad muzyčna-spartyŭnym kompleksam «Milenium», ciapier viadomym jak «O2 Arena», jany mierkavali, što jana dalažyć da 2050 hoda niekranutaj.
Adnak budaŭničyja pracy na terytoryi krytaha stadyjona źmianili los cylindra.
Rabočyja źlohku paškodzili abałonku, adnak zapeŭnivajuć, što źmieściva nie paciarpieła.
«Kalektyŭ O2 i našy padradčyki ISG šukali kapsułu z samaha pačatku budaŭničych rabot u 2016 hodzie. My znajšli jaje, adnak, na biadu, vypadkova paškodzili, pakul raskopvali», — adznačyli ŭ pres-adździele O2.
Paśla adnaŭleńnia cylindra jon z abnoŭlenym źmieścivam vierniecca pad ziamlu.
«Choć my i adkryli jaje krychu raniej, čym čakali, my chočam padzialicca hetymi prykmietami času z našymi hledačami i dadać novyja pierad tym, jak vierniem jaje ŭ ziamlu da 2050 hoda — jak i mierkavałasia raniej», — paviedamlaje pres-słužba Bi-bi-si.
Kalektyŭ «Siniaha Pitera», jaki vychodzić u teleefir z kastryčnika 1958 hoda, nie ŭpieršyniu zakopvaje kapsułu z prykmietami času: viadučyja šou ŭžo apuskali ŭ ziamlu cylindr u pačatku 1970-ch, kab adkryć jaho praz 30 hadoŭ.
Kamientary