«Admiena dekreta ab darmajedach budzie nie prajavaj słabaści, a mudraści»
Piša Źmicier Pankaviec.
Ludzi vyjšli na vulicy. Ad 2011 hoda nie vychodzili, a ciapier vyjšli. Čaho jany chočuć? Doli lepšaj. Vielmi prosta tłumačyć pratesty kanca zimy 2017 hoda tolki pastanovaj ab dekrecie №3. Ale heta viarchuška, na spravie ž ludzi aburajucca sacyjalnym i ekanamičnym stanam krainy.
Mnie zdajecca, što dekret ab darmajedach u svajoj pieršapačatkovaj idei nios pasył spraviadlivaści. Atrymlivaješ šery zarobak, jeździš na zarobki za miažu — zapłaci za biaspłatnuju miedycyny i adukacyju, jakimi karystajucca tvaje dzieci. Ale, jak časta byvaje, vykanańnie padviało. Pryčym padviało katastrafična.
Padatak, jaki pavinien byŭ być nakiravany na bahatych, staŭ kasić usich zapar. I kasych, i kulhavych, i chvorych. Asabliva heta vostra adčuvałasia ŭ małych haradach, dzie i tak raboty niama, a tabie jašče prosiać zapłacić 180 dalaraŭ. Naturalna, što ludzi zakipali ad takoj situacyi.
Praź niejki čas dekret pasprabavali kryšačku adkrucić nazad. Maŭlaŭ, samym biednym płacić jaho nie treba było. Adnak hetaje rašeńnie było pryniataje ŭžo vielmi pozna. Siońnia pytańnie pavinna stajać tolki tak: poŭnaja admiena dekreta №3.
Ludzi vyjšli na vulicy na hetym tydni. I demanstrujuć svajo žadańnie vychodzić i nadalej. I budzie ich nie prosta 3 tysiačy, a našmat bolej. I nie tolki ŭ Minsku, pratestavy patencyjał majecca pa ŭsioj krainie.
Kaniečnie, ułada moža znoŭ uklučyć zvykły dla siabie miechanizm represij. Milicyja chutka ŭcichamiryć pratestoŭcaŭ, u hetym niama čaho sumniavacca. Što-što, a takija scenary ŭ nas advučanyja hadami. Ale kamu ad hetaha budzie karyść? Hronki hnievu praciahnuć nabuchać. Ludzi buduć iści na indyvidualnyja pratesty, i tady žančyna na vierchatury budaŭničaha krana padasca prosta kvietačkami.
Druhi momant, čamu dekret pavinien być admienieny — heta faktar Rasii. Mahčyma, niekatoryja ŭžo stamilisia bačyć va ŭsim našu ŭschodniuju susiedku, ale mienavita Kreml najbolš u stanie vykarystać pratestnuju situacyju ŭ krainie ŭ svaich metach. Razhojdvańnie abstanoŭki, mahčymyja pravakacyi, moža być, što zaŭhodna.
Taksama pastavim ptušačku, što hetym razam na vulicy vychodziać nie nacyjanalistyčnaja apazicyja, jak na Dzień Voli, nie staličnyja chipstary, jak padčas maŭklivych pratestaŭ, i navat nie pradprymalniki. Heta ludzi, što siadziać u Adnakłaśnikach. Ich dastali małyja zarobki i vialikija ceny. A jašče jany adčuvajuć santymient da Rasii. Dla ich heta nie «impieryja zła», a kraina, dzie ludzi atrymlivajuć bolš, čym jany.
Cudoŭna razumieju, što admianić dekret — heta nie nadta ŭ duchu Łukašenki. Mahčyma, jon ličyć prajavaj słabaści paddacca na ludski pratest. Ale kiraŭnik dziaržavy pavinien pajści na hety krok, kab źbić sacyjalnuju napružanaść unutry krainy. Pakazać, što jon zdolny adčuvać patreby ludziej.
Kali kazać prosta, to admiena dekretu №3 vyhadnaja ŭsim. I aviečki buduć sytyja, i vaŭki cełyja.
Ciapier čytajuć
Ryta Dakota nabyła dom za niekalki miljonaŭ dalaraŭ kala Halivuda15
Ryta Dakota nabyła dom za niekalki miljonaŭ dalaraŭ kala Halivuda
Topavy pierakładčyk pajechaŭ u Biełaruś mianiać pašpart — i sieŭ za danaty. «KDB pahladzieŭ na sumu i vyrašyŭ, što nichto ŭ zdarovym rozumie nie moža vydatkavać stolki ŭłasnych hrošaj»1515
Kamientary