29 sakavika brytanski premjer-ministr Tereza Mej abjavić ab zapusku «breksita», vykarystoŭvajučy 50-y artykuł Lisabonskaj damovy. Takim čynam pačniecca vychad Brytanii ź Jeŭrapiejskaha sajuza, piša VVS.
Tereza Mej pavinna budzie źviarnucca da siabroŭ ES z aficyjnym listom, adnak kali mienavita jana zrobić heta, na Daŭninh-stryt nie ŭdakładnili.
14 sakavika pałata łordaŭ pryniała ŭ zychodnym vyhladzie zakonaprajekt, jaki daje ŭradu prava pačać praces vychadu.
Dakumient dazvalaje (choć farmalna nie abaviazvaje) premjer-ministru paviedamić Jeŭrasajuzu ab namiery Złučanaha Karaleŭstva vyjści sa składu ES, za što vykazałasia bolšaść brytanskich vybarščykaŭ na refierendumie ŭ červieni minułaha hoda.
Padpisanaja ŭ 2007 hodzie Damova ab Jeŭrapiejskim sajuzie bolš viadomaja jak Lisabonskaja damova. Jana zamianiła saboj kanstytucyju ES, jakuju ŭ tym hodzie na refierendumach adkinuli vybarščyki dźviuch krain-siabroŭ ES — Niderłandaŭ i Francyi.
Lisabonskaja damova stała pieršym z asnovatvornych dakumientaŭ ES, u jakim dapuskałasia mahčymaść vychadu ź Jeŭrasajuza krain, jakija ŭvachodziać u jaho. Hetamu i pryśviečany artykuł 50 dakumienta.
Kankretna punkt 2 hetaha artykuła, na jaki spasyłajecca zakonaprajekt, abviaščaje, što kraina, jakaja prahnie vyjści ź ES, prymaje hetaje rašeńnie ŭ adpaviednaści sa svajoj kanstytucyjaj, paśla čaho jaje ŭrad padaje aficyjnaje apaviaščeńnie ŭ kirujučyja orhany Jeŭrasajuza. Nieŭzabavie paśla brytanskaha referendumu ŭ Jeŭrasajuzie ŭdakładnili, što hetaje apaviaščeńnie moža być padadzienaje jak piśmova, tak i vusna — z zaniasieńniem u pratakoł pasiadžeńnia Rady ES, u jakim pradstaŭleny kiraŭniki dziaržaŭ i ŭradaŭ usich krain sajuza.
U punkcie 3 taho ž artykuła, adnak, havorycca, što siabroŭstva krainy ŭ ES spyniajecca z momantu ŭstupleńnia ŭ siłu pahadnieńnia ab umovach jaje vychadu albo praz dva hady paśla padačy paviedamleńnia, kali adpaviednaha pahadnieńnia dasiahnuć nie ŭdałosia. Zrešty, baki mohuć pa ŭzajemnaj zhodzie padoŭžyć terminy pieramovaŭ ab umovach vychadu.
I śpiecyjalisty, i sami aŭtary artykuła 50 pryznavali, što nie mierkavali, što hetaje pałažeńnie kali-niebudź pryjdziecca prymianiać na praktycy, i tamu paradak vychadu ź ES prapisany ŭ im vielmi raspłyvista.
Ciapier čytajuć
81‑hadovuju maci aŭtaryteta Skitova z «Babulinaj krynki» kinuli ŭ SIZA KDB, kab jon narešcie zahavaryŭ6
Kamientary