Mininfarmacyi vyniesła papiaredžańnie «Našaj Nivie» — u toj ža dzień, što i Tut.baju

Ministerstva infarmacyi vyniesła papiaredžańnie sajtu «Našaj Nivy» (nn.by) za «parušeńnie patrabavańniaŭ artykuła 38 zakona «Ab srodkach masavaj infarmacyi».

Atrymańnie dvuch i bolej papiaredžańniaŭ na praciahu hoda pahražaje zakryćciom vydańnia.

List za podpisam ministra Lilii Ananič, jaki atrymała «Naša Niva», datavany 14 sakavika. U adzin dzień z nami było vypisanaje papiaredžańnie i partału Tut.by, tolki što pošta dastaviła naš list paźniej. Farmuloŭka takaja ž — raspaŭsiud infarmacyi, «zdolnaj nanieści škodu nacyjanalnym intaresam Biełarusi».

U liście ź Ministerstva infarmacyi pryvodziacca vosiem vykazvańniaŭ u kamientarach da artykułaŭ na sajcie NN.

Pavialičyć

U adpaviednaści z patrabavańniami zakona my vydalili dadzienyja kamienty z sajta.

Patłumačym, što jany ŭtrymlivali nastupny źmiest.

1. Rezkija vykazvańni na adras uładaŭ.
2. Raskład mierkavanych niesankcyjanavanych akcyj niedarmajedaŭ u rehijonach.
3. Rezkija vykazvańni na adras vykanaŭcaŭ zatrymańniaŭ, u pryvatnaści, zatrymańnia Źmitra Daškieviča.
4. Rezkaja krytyka ŭstanoŭlenaha pomnika haradavomu ŭ centry Minska i padtrymka pierformansu levych aktyvistaŭ suprać pomnika haradavomu ŭ centry Minska.

Nahadajem, na partale nn.by dziejničaje režym premaderacyi. Usie kamienty pierad ich vystaŭleńniem pračytvajucca veb-redaktaram. Jamu davodzicca štodnia aceńvać bolš za 1200 kamientaroŭ, mnohija ź jakich nieadnaznačnyja. Na siońnia, u situacyi mocnaj sacyjalnaj napružanaści, dziejničajuć jašče i boty-pravakatary. U vyniku siaredni pracent adsievu kamientaŭ apošnija hady składaŭ kala dvaccaci.

U suviazi ź ciapierašniaj situacyjaj na «Našaj Nivie» budzie dziejničać režym jašče bolš pilnaj maderacyi. Kali ŭ veb-redaktara choć na siekundu ŭźnikajuć sumnievy, što rabić z kamientam — kamient budzie adrazu ž vydaleny. «Naša Niva» nie musić stać achviaraj čyjojści pravakacyi.

«Naša Niva» — lehiendarnaja biełaruskaja hazieta. Mnohija jaje redaktary nazaŭždy ŭpisanyja ŭ historyju krainy: braty Łuckievičy, Janka Kupała, Vacłaŭ Łastoŭski — śpis možna praciahvać doŭha.

Ciapier «Naša Niva» — samy papularny ŭ śviecie sajt na biełaruskaj movie. Pa vynikach lutaha my stali trecim pa kolkaści prahladaŭ infarmacyjnym internet-partałam u krainie. U lutym naš partał naviedali z 570 tysiač aj-pi adrasoŭ, prahledzieli 7,9 młn staronak.

Davajcie spakajniej stavicca da emocyj siońniašniaha dnia. Źnikła Rasijskaja impieryja, razvaliŭsia i Saviecki Sajuz. A biełaruskaje słova žyvie i budzie žyć. Dziela hetaha pracuje «Naša Niva».

Apytanka

• 0
• 0
• 0
• 0
• 0
• 0
• 0
• 0