Džon Kienedzi i Robiert Kienedzi zhulajuć na kłubnym čempijanacie śvietu pa futbole ŭ ZŠA. Pryčym u adnoj kamandzie
Mieksikanskaja «Pačuka» nazvała skład na kłubny čempijanat śvietu pa futbole, jaki startuje ŭ noč na hetu niadzielu, i tam niekalki cikavych imionaŭ, piša Sports.ru.
Naprykład, paŭabaronca Sanćjaha Chamienčanka — uruhvajec z ukrainska-italjanskimi karaniami, jaki ŭ 2023 hodzie vyjhraŭ čempijanat śvietu siarod moładzi.
A jašče dva amal adnolkavyja pa proźviščy brazilcy z roźnicaj u adnu litaru ŭ anhlijskaj movie: Džon Kienedzi i Robiert Kienedzi (John Kennedy, Robert Kenedy).
Robierta Kienedzi nazvali ŭ honar amierykanskaha prakurora, brata prezidenta Džona Kienedzi.
Heta toj samy Kienedzi, jakoha ŭ 2015 hodzie «Čełsi» kupiŭ za 8 młn jeŭra ŭ «Fłuminiensie». Brazilski vinhier tak i nie «streliŭ» — jeździŭ pa arendach va «Uotfard», «Ńjukasł», «Chietafe», «Hranadu», «Fłamienha», a ŭ 2022 hodzie ŭžo za 500 tysiač jeŭra pierajšoŭ u «Valjadalid».
Ciapier Kienedzi 29 hadoŭ — i jakraz pierad kłubnym ČS «Pačuka» arandavała jaho z pravam vykupu.
U brazilca jość dośvied pieramohi na KČS — u pačatku 2022 hoda jon nienadoŭha viartaŭsia ŭ «Čełsi» i paśpieŭ začapić hety trafiej. Ciapier jon zhulaje suprać «Reała», «Al-Chilala» i «Red Buł Zalcburha».
Ale vierniemsia da imia. Poŭnaje imia futbalista — Robiert Kienedzi Nunies du Nasimientu — i baćki nazvali jaho mienavita ŭ honar viadomaha sienatara i hienieralnaha prakurora ZŠA Robierta Kienedzi, małodšaha brata 35-ha prezidenta Džona Kienedzi.
«Los znoŭ zvodzić ich razam, kab pierapisać historyju ŭ Złučanych Štatach», — tak «Pačuka» pradstaviła navička ŭ videaanonsie.
️ | El destino los vuelve a unir para reescribir la historia en Estados Unidos
¡Bienvenido al Club de Futbol Pachuca! #PachucaSomosTodos pic.twitter.com/S7cJjjYAaq
Futbalista Džona Kienedzi nazvali ŭ honar prezidenta Džona Kienedzi. Plamieńnik prezidenta zapisaŭ jamu videazvarot pierad finałam.
Džon Kienedzi na papiarednim płanie śviatkuje hoł u składzie «Pačuki». Fota: Oscar Fuentes/Jam Media/Getty Images
Džon Kienedzi Batista de Soŭza — taksama vychavaniec «Fłuminiensie». Bolš za toje, forvard da hetaha času naležyć kłubu z Rya, a «Pačuka» aranduje jaho z studzienia.
Džon maładziejšy za Robierta na šeść hadoŭ, ale jany nie svajaki.
U brazilskaj Sieryi A Kienedzi debiutavaŭ u studzieni 2021 hoda. Džona Kienedzi nazvaŭ tak baćka — jon maryŭ, kab jaho syn byŭ takim ža viadomym, jak prezident ZŠA. I prynamsi adnojčy hulec atrymaŭ pryznańnie, paśla jakoha da jaho i źjaviŭsia intares ź Jeŭropy. U listapadzie 2023 hoda Kienedzi prynios «Fłuminiensie» pieršy ŭ historyi Kubak Libiertadores.
Darečy, pierad finałam Džonu zapisaŭ videazvarot z pažadańniami pośpiechu unučaty plamieńnik taho samaha prezidenta.
The great nephew of John Kennedy (USA president) wished good luck to
Fluminense footballer, John Kennedy in the Copa Libertadores final pic.twitter.com/ojzm6bSW6t
Mienavita hetaja pieramoha dazvoliła «Fłuminiensie» taksama ŭdzielničać u KČS-2025.
Ale Kienedzi pajechaŭ na turnir užo ŭ składzie inšaj kamandy. Najchutčej, z-za prablem z dyscyplinaj. Padčas taho rozyhryšu Libiertadores trenier Fiernanda Dyniz znajšoŭ da jaho padychod, ale ŭ cełym charaktar u chłopca prablemny. Jaho rehularna adchilali ad trenirovak z asnoŭnym składam za spaźnieńni, propuski i skandalnyja viečarynki, a adnojčy palicyja kanfiskavała jaho aŭtamabil — u im znajšli marychuanu.
U finale Libiertadores durnoje vydaleńnie zabyłasia praź pieramožny hoł. Adnak u finale Rekopy (anałah Supierkubka UEFA) Džon znoŭ atrymaŭ čyrvonuju pry liku 1:1 pa sumie dźviuch sustreč — pašancavała, što brazilcy ŭ vyniku ŭziali trafiej i bieź jaho. Tak u 23 hady Kienedzi apynuŭsia ŭ Mieksicy, dzie ŭžo nabraŭ 9+2 u 20 matčach čempijanatu. Ciapier źjaviŭsia šaniec prajavić siabie ŭ Štatach.
***
Kłubny čempijanat śvietu pa futbole — spabornictva, u jakim biaruć udzieł pieramožcy jeŭrapiejskaj Lihi čempijonaŭ, paŭdniovaamierykanskaha Kubka Libiertadores, anałahaŭ u Paŭnočnaj Amierycy, Afrycy i Azii, a taksama niekatoryja kłuby z najlepšym rejtynham.
Upieršyniu ŭ turniry, što projdzie ŭ ZŠA z 14 červienia pa 13 lipienia voźmuć udzieł 32 kamandy i pieramožcy takich turniraŭ z 2021 hoda. 32 kłuby buduć raźbityja na vosiem hrupaŭ.
Ad Jeŭropy biaruć udzieł «Mančester Sici», «Čełsi», «Reał», «Atletyka», PSŽ, «Bavaryja», «Barusija», «Juvientus», «Miłan», «Portu», «Bienfika», «Red Buł Zalcburh».
Turnir pačniecca ŭ noč na zaŭtra matčam «Inter Majami» — «Al Achli». «Pačuka» pieršy matč praviadzie ŭ noč na 19 červienia suprać «Red Buł Zalcburh»
Kamientary