Z Čačni prahučali pahrozy na adras rasijskaj apazicyjnaj «Novoj haziety». Jaje supracoŭniki bajacca za žyćcio

1 krasavika rasijskaja «Novaja hazieta» paviedamiła ab masavych zatrymańniach i katavańniach žycharoŭ Čačni, jakija padazrajucca ŭ nietradycyjnaj sieksualnaj aryjentacyi. Stali viadomyja imiony troch zahinułych, i taksama zrazumieła, što zabitych ludziej značna bolš. Pazasudovyja raspravy, tak zvanyja «zabojstvy honaru», čyniać i svajaki achviar…

Reakcyja, jakaja rušyła na publikacyi ab pieraśledzie čačenskich homaseksuałaŭ, vyklikaje ŭ redakcyi surjoznyja apasieńni za biaśpieku ŭžo nie tolki peŭnych žurnalistaŭ, ale i ŭsich biez vyklučeńnia supracoŭnikaŭ «Novaj haziety». 

3 krasavika, praz try dni paśla pieršaj publikacyi, u centralnaj miačeci Hroznaha adbyŭsia ekstrany schod pradstaŭnikoŭ 24 čačenskich virdaŭ, isłamskich bahasłovaŭ i lidaraŭ hramadskaj dumki Čačni. Pa aficyjnych dadzienych, u schodzie ŭziali ŭdzieł 15 tysiač čałaviek. Na hetym schodzie Adam Šachidaŭ, savietnik kiraŭnika Čačni Ramzana Kadyrava, publična abvinavaciŭ kalektyŭ «Novaj haziety» ŭ paklopie i vyrazna paznačyŭ «vorahaŭ našaj viery i našaj radzimy». Vystup Šachidava, a taksama inšych čačenskich bahasłovaŭ tranślavaŭsia miascovym telebačańniem i šyroka razyšoŭsia ŭ internecie, spravakavaŭšy chvalu nieciarpimaści vykazvańniaŭ u sacyjalnych sietkach.

Pavialičyć

Pavialičyć

Pa vynikach hetaha schodu była pryniataja rezalucyja. Druhi punkt hetaj rezalucyi adkryta i naŭprost zaklikaje da hvałtu:

«Z pryčyny taho, što naniesiena abraza viekavym ustojam čačenskaha hramadstva i hodnaści mužčyn-čačencaŭ, a taksama našaj viery, my abiacajem, što adpłata napatkaje praŭdzivych padbuchtorščykaŭ, dzie b i kim by jany ni byli, biez terminu daŭniny».

Na dumku supracoŭnikaŭ «Novaj haziety», vidavočna, što hetaja rezalucyja padšturchoŭvaje relihijnych fanatykaŭ da raspraŭ nad žurnalistami.

U suviazi ź infarmacyjaj, jakaja pryjšła z Čačni, redakcyja «Novaj haziety» zrabiła zajavu:

«Maŭčańnie i biaździejnaść u takoj situacyi robiać usich, chto zdolny choć niešta raspačać, saŭdzielnikami. Mienavita tamu «Novaja hazieta» praciahvaje pracavać u Čačni. Ale my vielmi dobra razumiejem, jakuju vysokuju canu možam zapłacić. Nierasśledavanyja zabojstvy našych kalehaŭ — Hanny Palitkoŭskaj i Natalli Estemiravaj — vidavočny dokaz.

My nastojvajem: reakcyja na žurnalisckuju pracu, ahučanaja na sustrečy ŭ centralnaj miačeci, nieprymalnaja ŭ cyvilizavanym hramadstvie i pavinna być acenienaja z punktu hledžańnia rasijskaha prava.

My zaklikajem rasiejskija ŭłady zrabić usio mahčymaje, kab spynić dziejańni, nakiravanyja na raspalvańnie nianaviści i varožaści da žurnalistaŭ, jakija vykonvajuć svaje prafiesijnyja abaviazki».

8 krasavika hałoŭny redaktar «Novaj haziety» Dźmitryj Murataŭ aficyjna źviarnuŭsia da Hienieralnaha prakurora RF Juryja Čajki z patrabavańniem abaviazvać Śledčy kamitet Rasii da niaŭchilnaha vykanańnia rasijskich zakonaŭ, a mienavita — da praviadzieńnia pravierki ŭ paradku 144—145 artykułaŭ KPK RF pa faktach, jaki śviedčyć pra ździajśnieńnie ciažkich złačynstvaŭ.

Taksama hałoŭny redaktar «Novaj haziety» Dźmitryj Murataŭ napisaŭ list hałoŭnamu muftyju Čačni, u jakim pierakonvaje: «My nie abražali i nie mieli najmienšaha namieru abrazić čačenski narod. My jaho hłyboka i ščyra pavažajem. My byli pobač u trahičnyja hady vajny: dapamahali vyvozić paciarpiełych, dastaŭlali humanitarnuju dapamohu, vyzvalali zakładnikaŭ. Sotni čačenskich siemjaŭ z udziačnaściu pamiatajuć humanitarnuju dziejnaść našaha ahladalnika Hanny Ściapanaŭny Palitkoŭskaj.

U našych tekstach niemahčyma adšukać nijakich prykmiet abrazy čačenskaha naroda i jaho viery pa adnoj pryčynie — hetych prykmiet tam niama.

My abaraniali ŭ suviazi sa zvarotam u redakcyju pravy kankretnych ludziej, jakija padvierhlisia pieraśledam. Hetyja ludzi nie rabili nijakich złačynstvaŭ. Da ich možna stavicca pa-roznamu — ale tolki ŭ ramkach zakona. I hazieta praciahnie sačyć za parušeńniami pravoŭ čałavieka i ŭ Čačni, i ŭ roznych rehijonach našaj krainy». 

• 0
• 0
• 0
• 0
• 0
• 0
• 0
• 0