«Prosta ciarpieńnie łopnuła». Kryčaŭski milicyjant, jaki napisaŭ list Šunieviču
Inicyjatar zvarotu da ministra ŭnutranych spraŭ Ihara Šunieviča — kryčaŭski milicyjant Ihar Vusik nie vyklučaje, što budzie zvolnieny z orhanaŭ unutranych spraŭ «pa admoŭnych matyvach». Toje samaje, na dumku milicejskaha padpałkoŭnika, budzie i ź inšymi padpisantami. Svaje podpisy pad zvarotam pastavili 11 supracoŭnikaŭ rajonnaha adździełu milicyi.
U liście milicyjanty vinavacili načalnika rajadździełu Stanisłava Čupryna i jaho namieśnika Vasila Cichanienku ŭ niezakonnych dziejańniach. Skardzilisia, što kiraŭnictva patrabuje dzialicca premijami, nieabhruntavana pieravodzić na ŭzmocnieny varyjant niasieńnia słužby, źniavažliva pavodzić siabie z padnačalenymi.
«Ja viedaju, što budu zvolnieny «pa admoŭnych matyvach». Padviaduć pad niešta, i budu zvolnieny. Ciapier nie prablema zvolnić. Toje ž samaje budzie i z kalektyvam. Adnaho ŭžo zvolnili (Juryja Dziubanava. — RS). Za toje, što ja jaho adpuściŭ z pracy. Tołku nia budzie, ja dumaju. Nia vieru ŭ heta», — ličyć Ihar Vusik.
Kali prahnoz surazmoŭcy spraŭdzicca, to jamu nia ŭdasca znajści pracu ŭ Kryčavie i navat u Biełarusi.
«Što mnie jašče daviadziecca rabić? U mianie try małyja syny. Kredyt. Ale ja navat i na heta nie pahladzieŭ. Prosta ciarpieńnie łopnuła. Ja ž nie ad siabie pisaŭ, a ad kalektyvu. Ciapier presinh idzie nia tolki na mianie jak na kiraŭnika, ale i na ŭčastkovych supracoŭnikaŭ milicyi», — kaža Ihar Vusik.
Milicyjant nia vieryć, što paśla šyrokaha rozhałasu ŭ mas-medyjach adbuducca pazytyŭnyja źmieny.
Ź jahonych słoŭ, raniej milicyjanty skardzilisia va Ŭpraŭleńnie ŭnutranych spraŭ Mahiloŭskaha abłvykankamu. Plonu ad hetaha zvarotu, kaža Ihar Vusik, nie było. Tady ŭ lutym napisali ministru. Była praviedziena pravierka, jakaja nia vyjaviła padstavaŭ dla kryminalnaj spravy suprać kiraŭnictva RAUS pa faktach złoŭžyvańnia ŭładaj ci słužbovymi paŭnamoctvami.
«My navat nia viedajem vynikaŭ razhladu — tolki na słovach. Z adkazam nas nichto nie aznajomiŭ. U ŚMI my źviarnulisia, kab na sytuacyju źviarnuŭ uvahu kiraŭnik dziaržavy. Ja ničoha lišniaha nie kazaŭ. Toje, što niechta z dapamohaj mianie kišeniu nabivaŭ, to ja i heta skazaŭ. Pryjechali supracoŭniki aparatu MUS — my i im dali pakazańni. My realna kazali praŭdu pra toje, što hrošy ŭ nas krali, i z dapamohaj nas», — kaža surazmoŭca.
«Dva z pałovaj miesiacy hetaja pravierka doŭžycca. I vynikaŭ my nia viedajem, — dadaje jon. — A termin słužbovaj pravierki — dva miesiacy. Kali ŭ chodzie pravierki vyjaŭlajucca fakty supraćpraŭnych dziejańniaŭ, niejkich złačynstvaŭ, imhnienna reahujuć. A tut usio narmalna».
39-hadovy Ihar Vusik prasłužyŭ u milicyi bolš za 20 hadoŭ.
«U mianie inšaj prafesii niama. Ja bolš za pałovu žyćcia milicyjant, to bok, akramia jak «pałkaj humovaj machać», bolš ničoha, pa sutnaści, nia ŭmieju. Adukacyja ŭ mianie tolki milicejskaja. Išoŭ u milicyju śviadoma. Prafesija hetaja padabajecca. Ale nadyšoŭ momant, i ciarpieńnie ŭ mianie łopnuła».
Adkaz na paŭtorny zvarot kryčaŭskich milicyjantaŭ padpisaŭ ministar Šunievič. U adkazie havorycca, što padstavaŭ nie daviarać vynikam pravierki, jakuju pravodzili supracoŭniki Ŭpraŭleńnia ŭłasnaj biaśpieki pa Mahiloŭskaj vobłaści, niama.
Ihar Vusik kiruje adździełam achovy pravaparadku i prafilaktyki Kryčaŭskaha rajadździełu milicyi. Pad zvarotam da ministra padpisalisia ŭčastkovyja milicyjanty.
Kanflikt u adździele milicyi vyklikaŭ šyroki hramadzki vodhuk u Kryčavie. Pa słovach redaktara hazety «Volny horad» Siarhieja Niaroŭnaha, mnohija spačuvajuć milicyjantam, jakija navažylisia paŭstać suprać načalstva.
«Ličać padpisantaŭ zvarotu, asabliva Vusika, mužnymi ludźmi, — kaža pra nastroi nasielnictva žurnalist. — Jość i inšyja mierkavańni, jakija zvodziacca da prostaj dumki: «Niachaj vaŭki hryzucca i nadalej».
Pavodle Siarhieja Niaroŭnaha, staŭleńnie žurnalistaŭ «Volnaha horadu» da tych, chto napisaŭ ministru pra paradki ŭ miascovaj milicyi, niaprostaje. Mnohija ź ich, kaža jon, udzielničali ŭ pieraśledzie žurnalistaŭ.
«I nam zrazumieła, čamu milicyjanty nie źviarnulisia da nas. My sočym za sytuacyjaj i bačym, što jany pakul zmahajucca nie z systemaj, a z načalnikam rajadździełu milicyi Čuprynym. Chočacca vieryć u toje, što jany razumiejuć, što nasamreč sprava nie ŭ Čuprynu. Bačna, što ŭ nas systema ŭłady takaja, što abaranić svaje pravy nia mohuć navat milicyjanty. Što ž tady kazać pra zvyčajnych hramadzian, apazycyju! Ciapier jany apynulisia ŭ skury pakryŭdžanych i źniavažanych. Kali paličać nieabchodnym źviarnucca da nas, to žurnalisty «Volnaha horadu» hatovyja dapamahčy padpisantam zvarotu da ministra Šunieviča», — kaža Siarhiej Niaroŭny.
Na prośbu Svabody prakamentavać sytuacyju ŭ Kryčaŭskim RAUS namieśnik načalnika presavaj słužby, načalnik adździełu ŭzajemadziejańnia z elektronnymi ŚMI Ministerstva ŭnutranych spraŭ Hieorhi Jaŭčar adkazaŭ: «Sačycie za sajtam MUS».
U načalnika Kryčaŭskaha RAUS Stanisłava Čupryna ŭziać kamentar pakul nie ŭdałosia.
Kamientary