Byłoha načalnika kryminalnaj milicyi Miorskaha RAUS prysudzili da siami hadoŭ pazbaŭleńnia voli

Sud Frunzienskaha rajona Minska dva dni abviaščaŭ prysud 12 fihurantam kryminalnaj spravy. Pa viersii śledstva, jany rabili urezki ŭ trubapravod i vykrali 80 ton dyzielnaha paliva. Abvinavačanych prysudzili da 3,5−11 hadoŭ pazbaŭleńnia voli, paviedamlaje Tut.by

Pavialičyć

Žycharoŭ Viciebskaj vobłaści abvinavacili ŭ tym, što dva hady jany krali dyzielnaje paliva, pryčyniŭšy škodu na sumu ŭ 102 481 rubiel. Amal usie abvinavačanyja svaju vinu admaŭlajuć, u tym liku były milicyjant Siarhiej Kiślak. Z 2004-ha pa 2012 hod jon byŭ pieršym namieśnikam načalnika Miorskaha RAUS, potym syšoŭ na piensiju.

Na abviaščeńnie prysudu ŭ Minsk ź Viciebskaj vobłaści pryjechała kala 50 čałaviek, u zale byŭ anšłah. Za kratami — supracoŭnik Tavarystva ratavańnia na vadzie, ślesar, indyvidualny pradprymalnik, achoŭnik. Prysud sudździa začytvała dva dni, na poŭnym abviaščeńni nastajali advakaty.

Sud Frunzienskaha rajona Minska apraŭdaŭ niekalkich abvinavačanych pa č. 1 st. 309 KK «Naŭmysnaje pryviadzieńnie ŭ nieprydatnaść transpartnaha srodku abo šlachoŭ znosin», ale pryznaŭ usich 12 fihurantaŭ vinavatymi ŭ kradziažy i prysudziŭ da pazbaŭleńnia voli. Były milicyjant Siarhiej Kiślak bližejšyja 7 hadoŭ praviadzie za kratami, arhanizatar Viktar Šylinski — 11. Siamiora atrymali ad 3,5 da 6 hadoŭ. Va ŭsich budzie kanfiskavanaja majomaść. Jašče troje abvinavačanych atrymali adterminoŭku pakarańnia i adpuščanyja pad padpisku ab niavyjeździe.

Nahadajem, sud pačaŭsia ŭ sakaviku. Usie 12 čałaviek abvinavačvalisia pa č. 4 art. 205 KK «Kradziož, ździejśnieny arhanizavanaj hrupaj albo ŭ asabliva bujnym pamiery», sankcyja artykuła praduhledžvaje pazbaŭleńnie voli ad 3 da 12 hadoŭ z kanfiskacyjaj majomaści. Akramia taho, jašče piaciarych taksama abvinavačvali pa č. 1 st. 309 KK «Naŭmysnaje razbureńnie mahistralnaha trubapravodnaha transpartu». A dziejańni achoŭnika liniejnaj vytvorča-dyśpietčarskaj stancyi «Dzisna» Uładzimira Jaromienka kvalifikavali pa č. 3 art. 424 KK «Złoŭžyvańnie ŭładaj abo słužbovymi paŭnamoctvami».

Pa viersii śledstva, były milicyjant Siarhiej Kiślak infarmavaŭ hrupu, telefanavaŭ i papiaredžvaŭ: «Hladzicie akuratna, siońnia ździejśnienaje zabojstva, mohuć być pasty». Dyzielnaje paliva abmiarkoŭvali nie naŭprost, a frazami: «Źbirajem hryby, kolki košykaŭ?». Kiravaŭ hrupaj Viktar Šylinski, jon davaŭ usim rasparadžeńni, kazaŭ, dzie treba zrabić urezki, zabiaśpiečvaŭ biaśpiečnuju pieravozku paliva ŭ anhar.

Advakaty abvinavačanych Aleh Varaksa i Maksim Konan nastojvali: supracoŭniki milicyi nie mahli nazirać za ich klijentami 24 hadziny ŭ sutki, bo miascovaść, dzie ździajśniaŭsia kradziež dyzpaliva, adkrytaja, zastacca niezaŭvažanym niemahčyma. Akramia taho, samaje hałoŭnaje pytańnie: čamu paciarpiełym bokam pryznali UPP «Zachad-Transnaftapradukt». Bo kradziež adbyvałasia z naftapraduktapravoda ŁPDS «Dzisna» (Respublika Biełaruś) — ŁPDS «Iłukście» (Łatvijskaja Respublika), to bok UPP «Zachad-Transnaftapradukt» akazvaŭ tolki pasłuhu pa transparciroŭcy naftapraduktaŭ na padstavie doŭhaterminovaj damovy. Ale heta nie značyć, što pradpryjemstvu pierajšło prava ŭłasnaści na naftapradukty.

— Prysud źjaŭlajecca nieabhruntavanym. Sudovaje śledstva praviedziena adnabakova i niapoŭna, bo sudom nieabhruntavana adchilalisia šmatlikija chadajnictvy abarony, u vyniku hetaha zastalisia niavyśvietlenymi abstaviny, vyśviatleńnie jakich mahło mieć istotnaje značeńnie pry pastanovie prysudu, — ličyć advakat Aleh Varaksa.

Prysud nie ŭstupiŭ u zakonnuju siłu i moža być abskardžany.

• 0
• 0
• 0
• 0
• 0
• 0
• 0
• 0