Što aznačaje źjaŭleńnie vychadcaŭ ź Biełarusi ŭ rasijskim śpiecpadraździaleńni dla asabliva važnych apieracyj i tajnych zabojstvaŭ?
Pasady načštaba i kamandzira raźviedki ŭ novym rasijskim supiersakretnym śpiecpadraździaleńni, pryznačanym dla śpiecapieracyj, zajmajuć vychadcy z hrupy «Alfa» KDB Biełarusi. «Naša Niva» vyśvietliła, što rasijskija pašparty jany atrymali jašče ŭ 2019 hodzie. Što jašče viadoma i što z hetaha vynikaje?
Na fota ŭviersie — čempijanat śvietu pa chakiei 2014 hoda, Minsk, spartyŭnaha mužčynu ŭ majcy «Rasija» pryabdymaje inšy treniravany małady čałaviek. Siarhiej Radkievič raniej słužyŭ u biełaruskaj «Alfie», a ciapier kamandzir raźviedupraŭleńnia zvyšsakretnaha rasijskaha «Centra 795».
U «Centry 795» słužyć kala 500 aficeraŭ — pamier jak u śpiecsłužby siaredniaj jeŭrapiejskaj dziaržavy. Stvorany jon byŭ užo paśla napadu na Ukrainu. U jaho sabrali elitnyja siły HRU i FSB. Stvaraŭsia jon jak zvyšsakretnaja i całkam aŭtanomnaja struktura, pryznačanaja dla najbolš važnych apieracyj — pačynajučy ad vajennych va Ukrainie i zakančvajučy palityčnymi zabojstvami dy vykradańniami za miažoj. Patreba ŭ takoj struktury źjaviłasia paśla šerahu pravałaŭ u HRU, kali padčas praviadzieńnia teraktaŭ u roznych krainach jaho supracoŭniki akazalisia zaśviečanyja.
A na hetym fota Siarhiej Radkievič (sprava) — z namieśnikam dziaržsakratara Savieta biaśpieki Rasii Dźmitryjem Miadźviedzievym. Heta 2023 hod, Miadźviedzieŭ naviedvaje pradpryjemstva kancerna «Kałašnikaŭ».
The Insider udałosia identyfikavać usich klučavych kiraŭnikoŭ i sponsaraŭ hetaha Centra 795, vyznačyć jaho dysłakacyju i asnoŭnyja kirunki jaho dziejnaści. Publikacyja źjaviłasia paśla taho, jak adzin z aficeraŭ byŭ aryštavany ŭ Kałumbii pa abvinavačańni ŭ arhanizacyi vykradańnia niekalkich palityčnych praciŭnikaŭ Pucina. Hety aficer pravaliŭsia, tamu što vykarystoŭvaŭ Google Translate dla kamunikacyi sa svaim ahientam.
Bazujecca Centr 795 na bazie struktury rasijskaha kancerna «Kałašnikaŭ».
Na staronkach Siarhieja Radkieviča ŭ sacsietkach znachodzicca fota 2018 hoda, na jakim jon (druhi sprava) užo tusavaŭsia z publikaj «Kałašnikava» na spabornictvach EEO2018 u Čechii.
U telefonnych knihach jon fihuruje jak «Radkievič Sierhiej Aleksandrovič, a taksama Supkin Serge, Sierhiej Radik, «radik» Sierhiej Radkievič, Serge Radd, Serge Ot Ałana Žilety, Biełaruś Alfa Sierhiej, Hłok Sierhiej, Konciern Kałašnikov Sierhiej, Patriot Sierhiej, Radkievič Sierhiej Kałašnikov, Čoo Variah — Radkievič Sierhiej Aleksandrovič, Radkievič Bietsiti».
Jaho zachapleńni typovyja dla rasijskich i prarasijskich siłavikoŭ hetaha pakaleńnia: akramia stralby, heta matacykły.
Dla biełarusaŭ u hetaj historyi istotna, što ŭ «Centry 795», rasijskim śpiecpadraździaleńni, słužać i vychadcy ź biełaruskaj «Alfy». Pryčym nie na nižejšych pasadach. Siarhiej Radkievič tam — načalnik raźviedvalnaha ŭpraŭleńnia. A Dźmitryj Drazdoŭ — navat načalnik štaba.
Pavodle źviestak, jaki maje ŭ svaich bazach «Biełpoł», Dźmitryj Drazdoŭ prynamsi da 2016 hoda słužyŭ u v/č 10091, jakuju źviazvajuć z KDB Biełarusi. Siarhiej Radkievič słužyŭ u toj ža čaści da 2016 hoda. Paśla hetaha niejki čas ličyŭsia biespracoŭnym, a ad 2020 hoda ŭ bazach pačynaje fihuravać jak dyrektar pa śpiecprajektach kancerna «Kałašnikaŭ». Radkievič z 08.04.2017 maje pašpart sieryi PP, jaki jon atrymaŭ jak asoba, što pastajanna pražyvaje za miažoj, i źviestki pra konsulski ŭlik u Rasii.
U internecie adšukvajecca, što ŭ hetych dvuch aficeraŭ ciapier jość rasijskija pašparty.
Dźmitryj Drazdoŭ, uradženiec Minska, atrymaŭ rasijski pašpart 22 studzienia 2019 hoda ŭ Maskvie. A Siarhiej Radkievič — 25 studzienia 2019 hoda taksama ŭ Maskvie (Radkievič, darečy, uradženiec Charkava, jaki ŭžo čatyry hady bambiać jaho paplečniki).
Źviartaje ŭvahu sinchronnaść atrymańnia imi pašpartoŭ — jany adnačasova pryniali rašeńnie ab pierachodzie na słužbu ŭ Rasiju.
Istotny i sam fakt, što jany hramadzianie Rasii. Heta značyć, što havorka nie idzie pra intehravanuju biełaruska-rasijskuju strukturu. Značyć, jany prosta pamianiali dziaržavu na inšuju. Kali była b intehravanaja struktura, to jany, chutčej za ŭsio, zastavalisia b hramadzianami Biełarusi.
Što značyć fakt kamplektacyi rasijskaj topavaj śpiecsłužby vychadcami z KDB Biełarusi? Takoje pytańnie «Naša Niva» zadała padpałkoŭniku Stanisłavu Łupanosavu, jaki da 2020 hoda pracavaŭ u MUS Biełarusi, a paśla dałučyŭsia da «Bajpoła».
«Pieršy raz, kali taki fakt staŭ viadomy, — kaža Stanisłaŭ Łupanosaŭ. — Raniej dla biełarusaŭ tolki Biełaruś była, svaje supracoŭniki tolki dla siabie byli. Vidać, situacyja źmianiłasia. I Rasija stała pryciahvać i našych śpiecyjalistaŭ, tym bolš što našy śpiecyjalisty zaŭsiody canilisia ŭ Rasii».
Što matyvuje vychadcaŭ ź biełaruskich siłavych struktur najmacca ŭ Rasiju?
«Heta hrošy, dobryja zarpłaty, pieramańvajuć, kamiercyjny intares», — miarkuje padpałkoŭnik Łupanosaŭ.
Ci heta sa zhody Łukašenki adbyvałasia?
«Ja dumaju, što zhody nie pytajuć, ale kiraŭnictva nie moža nie być u kursie. Źviartaje ŭvahu, što supracoŭnik «Alfy» 1983 hoda jašče małady, jašče moh by pracavać tut u orhanach. Rasijski pašpart atrymaŭ, kali jamu było 36 hadoŭ», — źviartaje ŭvahu eks-siłavik.
Ci moža takoje padraździaleńnie, raz jaho ŭkamplektavali vychadcami ź Biełarusi, zajmacca taksama palityčnymi praciŭnikami biełaruskaj dyktatury?
«Moža, — miarkuje Stanisłaŭ Łupanosaŭ. — Tamu što abmien infarmacyjaj zaŭsiody byŭ i nikoli nie spyniaŭsia. Samy jarki prykład — zatrymańnie Fiaduty i Ziankoviča ŭ Maskvie».
«Supracoŭniki našych śpiecpadraździaleńniaŭ KDB vučylisia ŭ Akademii FSB», — nahadvaje Stanisłaŭ Łupanosaŭ.
«Apubličvańnie infarmacyi pra «Centr 795» pryviadzie da zhortvańnia jaho dziejnaści, — upeŭnieny Stanisłaŭ Łupanosaŭ. — Kali jaho spalili ŭ ŚMI, z proźviščami, pasadami, heta pravał.
Heta anałahična jak u 2022 hodzie «Bajpoł» rassakreciŭ 9‑y adździeł HRU. Paśla taho tuju strukturu rasfarmiravali».
Jak bačym na prykładach Dźmitryja Drazdova i Siarhieja Radkieviča, niekatoryja ź biełaruskich siłavikoŭ hatovyja najmacca ŭ samyja brudnyja rasijskija struktury — aby atrymlivać rasijskija zarobki.
Ciapier čytajuć
Što aznačaje źjaŭleńnie vychadcaŭ ź Biełarusi ŭ rasijskim śpiecpadraździaleńni dla asabliva važnych apieracyj i tajnych zabojstvaŭ?18
Što aznačaje źjaŭleńnie vychadcaŭ ź Biełarusi ŭ rasijskim śpiecpadraździaleńni dla asabliva važnych apieracyj i tajnych zabojstvaŭ?
Za dva dni na vyratavalny ŭkoł Ksiušy z Mahilova sabrali rekordnyja $300 tysiač. Mama zdała jaje ŭ dzietdom, a čužyja ludzi bjucca za žyćcio dziciaci33
Za dva dni na vyratavalny ŭkoł Ksiušy z Mahilova sabrali rekordnyja $300 tysiač. Mama zdała jaje ŭ dzietdom, a čužyja ludzi bjucca za žyćcio dziciaci3
Vychadcy z «Alfa» KDB Biełarusi zajmajuć kiraŭničyja pasady ŭ novym rasijskim supiersakretnym śpiecpadraździaleńni, pryznačanym dla zabojstvaŭ za miažoju3232
Kamientary
Łukašienko - ich kukła, čieriez kotoruju vypołniajut vsiu hriaź po uničtožieniju biełaruskoho v Biełarusi, čtoby, napriamuju, samim nie pačkaťsia.....
[Zredahavana]