Supracoŭnik banka kraŭ hrošy z rachunku žančyny i rabiŭ staŭki

Supracoŭnik banka spačatku dapamoh piensijaniercy zrabić płaciož praź internet-bankinh, a zatym ckraŭ ź jaje rachunku bolš za 300 rubloŭ. Na skradzienyja hrošy jon rabiŭ staŭki ŭ bukmiekierskaj kantory. Pra heta paviedamlaje pres-słužba Minabłvykankama

 Z zajavaj ab kradziažy hrošaj z bankaŭskaj karty ŭ milicyju źviarnułasia 60-hadovaja žycharka ahraharadka Lasnoj pad Minskam. Pa słovach žančyny, u jaje z kartki prapała bolš za 300 rubloŭ, pry hetym kartku svaju jana nie hublała i nikomu karystacca nie davała. U banku žančynie tolki dali numar rachunku, na jaki byli pieraviedzienyja jaje hrošy. «Tajamničaje» źniknieńnie hrošaj dla piensijanierki było rastłumačana, kali pravaachoŭniki vyśvietlili asobu ŭładalnika hetaha rachunku. Im akazaŭsia 22-hadovy minčanin, rabotnik banka, jaki niadaŭna dapamahaŭ joj zrabić płaciož praź sistemu «internet-bankinh».

Za niekalki dzion da «źniknieńnia» hrošaj, žančyna stajała ŭ čarzie ŭ adnym z adździaleńniaŭ banka, kab zrabić płaciož. Małady čałaviek, jaki pracuje ŭ hetym adździaleńni kansultantam, padyšoŭ da jaje i pacikaviŭsia, ci padklučana ŭ jaje pasłuha «internet-bankinh», pačuŭšy śćviardžalny adkaz, prapanavaŭ skarystacca joju, kab nie stajać u čarzie.

Na ŭsie adhavorki piensijanierki, što jana nie ŭmieje im karystacca, kansultant adkazvaŭ, što heta zusim nie składana, i jon hatovy dapamahčy joj zrabić płaciož. Chłopiec advioŭ žančynu da ŭstanoŭlenaha ŭ pamiaškańni banka kampjutara dla klijentaŭ, pakazaŭ, kudy treba ŭvodzić łahin i parol, a zatym paprasiŭ jaje ŭvieści zapytany sistemaj adzin ź siesijnych klučoŭ sa śpiecyjalnaj karty kodaŭ. Zaviaršyŭšy apieracyju, klijentka padziakavała kansultantu za dapamohu i syšła, a toj na ŭsialaki vypadak zapomniŭ jaje łahin, parol i numar siesijnaha kluča.

«Praź niekatory čas małady čałaviek užo z doma ŭvachodziŭ u sistemu «internet-bankinh» pad dadzienymi piensijanierki i pieravodziŭ hrošy ź jaje rachunku na svoj, a zatym rabiŭ staŭki ŭ adnoj z bukmiekierskich kantor. Supracoŭnikaŭ milicyi małady čałaviek spačatku sprabavaŭ pierakanać, što ni maje nijakaha dačynieńnia da źniknieńnia hrošaj z kartki piensijanierki, a zatym staŭ śćviardžać, što źbiraŭsia viarnuć joj hrošy adrazu ž paśla taho, jak vyjhrajuć jaho staŭki», — raspaviali va UUS Minabłvykankama.

• 0
• 0
• 0
• 0
• 0
• 0
• 0
• 0