Brytanski vuličny mastak Benksi adklikaŭ svaju prapanovu razdać prynty svajho malunka tym, chto prahałasuje na ŭsieahulnych vybarach u Brytanii suprać Kansiervatyŭnaj partyi.
Raniej na sajcie mastaka źjaviłasia abjava, u jakoj žycharam šaści vybarčych akruhaŭ Brystala prapanoŭvałasia atrymać prynt malunka z vyjavaj dziaŭčynki i šaryka z brytanskim ściaham.
Dla atrymańnia malunka vybarščykam było nieabchodna adpravić mastaku fotakopiju svajho vybarčaha biuletenia ŭ jakaści dokazu taho, što jany prahałasavali suprać kansiervataraŭ.
Paźniej na sajcie źjaviłasia paviedamleńnie, u jakim adznačajecca, što mastak atrymaŭ papiaredžańnie ad vybarčaj kamisii i sa škadavańniem paviedamlaje, što vymušany začynić svaju akcyju, tak jak jana była «niepradumanaj i sumnieŭnaj ź jurydyčnaha punktu hledžańnia».
U paniadziełak palicyja hrafstvaŭ Ejvan i Samiersiet zajaviła, što praviaraje skarhi na prapanovu Benksi.
U palicyi nahadali, što atrymańnie vybarščykami padarunkaŭ u abmien na abaviazacielstva hałasavać za peŭnaha kandydata źjaŭlajecca złačynstvam.
«Kožny, chto adhukajecca na prapanovu atrymać padarunak, ryzykuje trapić pad śledstva», - havorycca ŭ paviedamleńni palicyi.
Benksi - adzin z samych viadomych vuličnych mastakoŭ Brytanii. Jaho asoba dahetul zastajecca zahadkaj, sapraŭdnaje imia mastaka nieviadoma.
Daterminovyja vybary ŭ Brytanii projduć 8 červienia.
Ciapier čytajuć
Palčys, Andrejeva, Łojka i inšyja imiony — paśla vizitu amierykanskich dypłamataŭ u Minsk vyzvalili 250 palitviaźniaŭ15
Kamientary