Hłybokapavažanaja Śviatłana Alaksandraŭna!
Kali ŭ 2015 h. Vy atrymali Nobieleŭskuju premiju, ja, prymajučy ŭdzieł u pracy Sinodu Biskupaŭ na temu siamji ŭ Vatykanie, paprasiŭ słova i abjaviŭ ab tym, što Vy stali łaŭreatam samaj prestyžnaj premii pa litaratury — i biskupy ŭsiaho śvietu Vam apładziravali.
Usia Biełaruś taksama radavałasia hetaj znakavaj padziei.
Siońnia, znachodziačysia za miažoj na ŭračystaściach biskupskich paśviačeńniaŭ novaha Mitrapalita Biełastockaha arcybiskupa Tadevuša Vojdy, ja ź vialikim smutkam i tryvohaj uspryniaŭ Vašyja słovy: «Dajcie ŭ Biełaruś tanki, zbroju — i tam kataliki pačnuć zabivać pravasłaŭnych ci kaho zaŭhodna».
Z usioj upeŭnienaściu chaču padkreślić, što heta navat niemahčyma sabie ŭjavić u Biełarusi, dzie histaryčna skłalisia dobryja jak mižkanfiesijnyja, tak i mižrelihijnyja adnosiny, jakija źjaŭlajucca našym nacyjanalnym skarbam i dobrym prykładam dla ŭsiaho śvietu.
Niaŭzbrojenym vokam bačna, što Katalicki Kaścioł, jak i Pravasłaŭnaja Carkva dy inšyja vieravyznańni ŭ Biełarusi robiać usio mahčymaje, kab raźvivać adnosiny pamiž saboj i hramadstvam.
Pavodle Vašych słoŭ, «čałaviek — dastatkova niedaskanałaja istota, jamu ŭ hałavu možna ŭkłaści ŭsio, što zaŭhodna». Tak, sapraŭdy, čałaviečaja pryroda zdefarmavana pieršarodnym hrachom, ale z Božaj dapamohaj jon moža supraćstajać spakusam i vyklikam času i kali budzie prybiahać da jaje, to nikomu nie ŭdasca ŭkłaści ŭ jaho hałavu ŭsio, što zaŭhodna.
Nie chaciełasia b, kab Vašy słovy jak łaŭreata Nobieleŭskaj premii byli ŭspryniaty jak zaklik da mižkanfiesijnaj kanfrantacyi. Naadvarot, jany pavinny ŭnosić mir i kansalidacyju ŭ naša hramadstva.
Spadziajusia, što ŭ Vašych słovach nie było drennaha namieru ŭ adras katolikaŭ našaj Baćkaŭščyny. Adnak varta pamiatać, što zranić i zabić mohuć nie tolki tanki i zbroja, ale i słovy. Budučy asobami publičnymi, nieabchodna pamiatać pra adkaznaść za svaje słovy.
Vykazvaju nadzieju, što niahledziačy na Vašu niecarkoŭnaść, Vy z pavahaj budziecie stavicca da naturalnaha prava čałavieka na relihijnuju svabodu, jakoje jamu taksama harantuje Kanstytucyja Respubliki Biełaruś. Ad usiaho serca žadaju Vam, kab Vašy vysiłki jak łaŭreata Nobieleŭskaj premii spryjali harmaničnamu i mirnamu raźvićciu našaha hramadstva.
| Minsk—Biełastok, 9 červienia 2017 h. Mitrapalit Minska-Mahiloŭski Staršynia Kanfierencyi Katalickich Biskupaŭ u Biełarusi |
Ciapier čytajuć
Biełarus, jaki vajavaŭ za Ukrainu, raspavioŭ, čym jaho začaravała kachanka Ina Kardaš, ahientka KDB31
Biełarus, jaki vajavaŭ za Ukrainu, raspavioŭ, čym jaho začaravała kachanka Ina Kardaš, ahientka KDB
«Ź mianie ničoha nie voźmieš, a ludzi paciarpieli». Para piensijanieraŭ druhi hod nie moža vypisać ź minskaj kvatery šmatdzietnuju siamju emihrantaŭ99
Kamientary