Barančyk pasolstvu Rasii i Rassupracoŭnictvu: Nie davajcie hrošy Špakoŭskamu i Dziermanu!
Šef-redaktar sajta «Rehnum» Juryj Barančyk vystupiŭ z novym artykułam, dzie ŭ n-ny raz nahadvaje pra pahrozu taho, što ŭ Biełarusi hałavu padymaje nacyjanalizm.
«Čamu «ruski śviet» važniejšy za traktary i kambajny», — stavić pytańnie Barančyk.
Pierš za ŭsio aŭtar pryznaje, što Rasija całkam pravaliłasia va Ukrainie: «Pravał vidavočny i daŭno nie abmiarkoŭvajecca». Maŭlaŭ, ludzi va Ukrainie chočuć być razam z Rasijaj, ale rasijskija palityki na heta nie źviartajuć uvahu. Tamu z naroda «daviałosia źjavicca takim samarodkam, jak Hivi, Mataroła, Zacharčanka».
U Biełarusi, na dumku Barančyka, Rasija nastupaje na tyja ž hrabli, što va Ukrainie. Pryviazvaje Biełaruś da siabie ekanamična, ale nie ideałahična. Barančyk pryvodzić mnostva prykładaŭ, jak biełarusy padtrymlivajuć Ukrainu.
«Ź niadaŭniaha času pradstaŭniki biełaruskaj ułady, a taksama niekatoryja palityki stali kazać pra toje, što niadrenna było b biełaruskaj dziaržavie viarnuć bieł-čyrvona-bieły ściah na toje miesca, jakoje jamu naležyć», — piša Barančyk. U jakaści prykłada jon pryvioŭ niadaŭniaje intervju hałoŭnaha ideołaha Ihara Buzoŭskaha «Našaj Nivie».
«Padtrymać Buzoŭskaha na ciažkaj nivie lehalizacyi bieł-čyrvona-biełaha ściaha saŭdzielnikaŭ fašystaŭ, palicajaŭ i zdradnikaŭ vyrašyła i Libieralna-demakratyčnaja partyja Biełarusi», — nie supakojvajecca Barančyk. Maŭlaŭ, «Sputnik» prapanavaŭ Hajdukieviču admycca ad zajavaŭ pra bieł-čyrvona-bieły ściah, adnak toj nie skarystaŭsia takim šansam.
«I niejak tak akazvajecca, što mienavita hetych ludziej — Hajdukieviča, Špakoŭskaha i inšuju anałahičnuju braciju padtrymlivaje rasijskaja ambasada ŭ Biełarusi, Rassupracoŭnictva, biełaruskaje pradstaŭnictva «Sputnika». Niejak heta ŭsio nahadvaje anałahičnuju situacyju z padtrymkaj nieabanderaŭcaŭ va Ukrainie…» — cikavyja abvinavačvańni z boku redaktara «Rehnuma».
Barančyk źmiaščaje fotazdymak, na jakim Alaksandr Špakoŭski ŭskidvaje ruku «ŭ znajomym dla ŭsich žycharoŭ eks-SSSR vitańni».
«Upeŭniena siabie čałaviek adčuvaje ŭ formie fašysckaj armii, «małajčyna». Cikava, ci praciahnie sp.Špakoŭski svaju tvorčuju dziejnaść u rasijskim infarmacyjnym farpoście ŭ bitvie z supastatam?» — pytajecca šef-redaktar «Rehnuma».
«Bieł-čyrvona-bieły ściah siońnia ŭ Biełarusi ŭžo nieparyŭna źviazany z Bandieram i Šuchievičam. Hetuju źviazku kryvioju zabitych ruskich užo źnitavaŭ «Małady front», «Vajar», «Pahonia» i inšyja bajavyja atrady biełaruskaj apazicyi va Ukrainie», — dobra, što niavinna zabitych niemaŭlat Barančyk nie napisaŭ.
Było b dziŭna, kali b u hetym «nabory džentlmiena» nie abyšłosia biez zhadki Uładzimira Makieja, jakoha Barančyk daŭno abvinavačvaje ŭ padrychtoŭcy Majdana na vulicy Zybickaj.
«Źviazka Makiej-Jakubovič pakazvaje miascovym nacykam, što jany taksama ŭžo svaje, taksama ŭžo pierafarbavanyja i hatovyja zdać Baćku pry pieršym adpaviednym vypadku i tamu kažuć bieł-čyrvona-biełym nacyjanalistam: «My svaje, chłopcy. My ŭžo taksama pierafarbavanyja, jak našy starejšyja i bolš daśviedčanyja tavaryšy»
«Sa Špakoŭskim paśla ŭzłamanaj pierapiski naohuł usio zrazumieła, jak i ź Dziermanam i inšaj pierafarbavanaj (i, pa ich ŭłasnym pryznańni, ludźmi, što šukajuć hrošy ŭ Maskvie i kantaktaŭ z Administracyjaj i MZS) bieł-čyrvona-biełaj šušaraj», — voś jakija charaktarystyki daje Barančyk niekatorym dziejačam.
«Ci razumiejuć pradstaŭniki ambasady Rasii i Rassupracoŭnictva ŭ respublicy, što pakul jany padtrymlivajuć takich «sajuźnikaŭ», ni adzin prystojny i ščyry sajuźnik Rasii i «ruskaha śvietu» ŭ Biełarusi nie padydzie ni da Rassupracoŭnictva, ni da ambasady navat na harmatny streł?» — da takich vysnovaŭ prychodzić Barančyk.
Suprać Barančyka i inšych aŭtaraŭ «Rehnuma» ŭ Biełarusi była zaviedzienaja kryminalnaja sprava pa artykule 130 Kryminalnaha kodeksa «Raspalvańnie rasavaj, nacyjanalnaj alboj relihijnaj varažniečy». Pa hetym artykule byli zatrymany aŭtary sajta Paŭłaviec, Šyptenka i Alimkin. Barančyk paźbieh aryštu praz toje, što znachodzicca za miažoj, u Rasii.
Ciapier čytajuć
«Śvińni zarochkali. Biez vady daŭno nie siadzieli, ja b im adklučyŭ». Azaronak abrynuŭsia na žycharoŭ rajona Lebiadziny28
Kamientary