28 červienia ŭ minskim kinateatry «Maskva» projdzie dadatkovy pakaz multfilma «Maleńki Prync» u biełaruskaj ahučcy.
Jon išoŭ 23—25 červienia razam z prezientacyjaj pieršaha ŭ niezaležnaj Biełarusi vydańnia knihi «Maleńki Prync» pa-biełarusku.
«U nas byli poŭnyja anšłahi ŭsie try dni, kinateatr sam zachacieŭ dadatkovych pakazaŭ. Nam navat prapanavali dva dni, a nie adzin, — raskazaŭ NN kaardynatar pakazaŭ Andrej Kim. — Ale my vyrašyli zrabić adzin pakaz, akurat napiaredadni dnia narodzinaŭ Ekziupiery. Pierad pakazam budzie mahčymaść zamović knihu «Maleńki prync» pa-biełarusku, my drukujem dadatkovy nakład, bo pieršyja 500 asobnikaŭ pradalisia mienš čym za try dni».
«Maleńki Prync» — najznakamiciejšy tvor Antuana de Sent-Ekziupiery, załataja kłasika litaratury, samaja pierakładanaja kniha ŭ śviecie paśla Biblii i Karana. Heta hłyboki i mudry tvor, adnačasova cikavy jak dzietkam, tak i dla darosłym.
U 2015 hodzie ŭ Francyi vyjšaŭ adnajmienny multfilm. Jon raspaviadaje historyju dziaŭčynki i jaje niezvyčajnaha siabroŭstva sa śmiešnym starym — tym samym lotčykam z knihi «Maleńki Prync». Samastojny siužet pieraplecieny ŭ multfilmie ź siužetam znakamitaj knihi, tamu jaho budzie cikava hladzieć jak tym, chto jašče nie čytaŭ knihu, tak i tym, chto dobra znajomy z hetym tvoram.
U miežach prajekta «Biełaruskija ŭikendy» hety multfilm byŭ ahučany na biełaruskuju movu kampanijaj «Kinakonh» pry padtrymcy «Atłant Telekam» i velcom. Na movu roli ahučvali: Hanna Chitryk, Siatłana Cimochina, Źmicier Biejnart-Saładucha, Pavał Charłančuk, Siarhiej Žbankoŭ, Uładzimier Hłotaŭ.
Pierad pakazami adbudziecca prezientacyja pieršaha ŭ niezaležnaj Biełarusi vydańnia knihi «Maleńki Prync» u biełaruskim pierakładzie Niny Maciaš. U hety dzień možna budzie nabyć knihu pa admysłovym košcie.
Pakaz adbudziecca 28 červienia ŭ kinateatry «Maskva». Pačatak a 19:00.
Padrabiaznaści na kinakong.by. Kvitki možna nabyć u kasach kinateatra i na bycard.by.
Dadatkovaja infarmacyja pa telefonie +375 29 5543459 (Andrej).
Ciapier čytajuć
Polski dypłamat raskazaŭ, jak pryvoziŭ Kolu multfilmy na dyskach i kim dla siamji Łukašenkaŭ byŭ Makiej4
Kamientary