Rabočym bujnoha biełaruskaha pradpryjemstva ab novaŭviadzieńni paviedamili 29 červienia. U bližejšy čas na NPZ čakajuć zahadu pa vytvorčaści. Pa słovach supracoŭnikaŭ, tym, chto nie pasłuchajecca, pahražaje ŭ lepšym vypadku zastacca biez premii, u horšym — zvalnieńnie abo niepraciahnieńnie kantrakta.
— Učora sabralisia kiraŭniki, usie abmierkavali, a paśla abiedu načalniki cechaŭ u žurnale rasparadžeńniaŭ skazali stavić podpisy. Kažuć, siońnia ŭžo budzie zahad pa zavodzie. Nam patłumačyli, što ŭ Rasii dva zavody spynili pracu z-za niejkaha virusa — virus prajšoŭ pa sistemie i zavod staŭ. Ale rabočyja, ščyra kažučy, u heta słaba vierać. Dumajem, što chutčej za ŭsio heta zroblena dla taho, kab ludzi nie rassłablalisia ŭ pracoŭny čas, — raspavioŭ TUT.BY supracoŭnik pradpryjemstva.
Na terytoryju NPZ mabilnyja telefony pranosić možna, ale tolki da raspranalni. Kali rabotnik idzie ŭ cech, na ŭstanoŭki, tam karystacca mabilnikam užo nielha. Kamunikacyi ŭnutry pradpryjemstva — pa radyjosuviazi abo miascovych telefonach.
Jašče adzin surazmoŭca, jaki pracuje na NPZ, raspavioŭ, što mnohija šakavanyja takim rasparadžeńniem. Kali trapišsia z mabilnikam pieršy raz — pazbaŭlajuć premii, u druhi — mohuć zvolnić abo nie praciahnuć kantrakt.
— Bolšaść, chto pracuje na ustanoŭkach — siamiejnyja. I ŭjavicie — dzicia pajšło ŭ škołu ci zastałosia adno doma. A jak adnamu z baćkoŭ patelefanavać i spytać, dzie i jak jon? Ci ŭsio ŭ paradku? Nijak, bo nielha pad pahrozaj zvalnieńnia.
Aficyjny kamientar ad kiraŭnictva Mazyrskaha NPZ atrymać nie ŭdałosia. Z načalstvam sakratar pryjomnaj złučać kateharyčna admoviłasia pa padobnych pytańniach. Namieśnik hienieralnaha dyrektara pa ideałahičnaj pracy, da jakoha ŭsio ž udałosia datelefanavacca, spasłaŭšysia na «nadzvyčajnuju zaniataść i niedachop času» paprasiŭ pieratelefanavać paśla vychadnych.
Kamientary