U rasparadžeńni partału TuzinFM apynuŭsia pratakoł pasiedžańnia mastackaha savieta pry Mienharvykankamie, jaki razhladaŭ zajavu na kancert Alesia Dzianisava.
Kiraŭnik šoŭ-baleta «Fiejeryja», kiraŭniki dziaržaŭnaj ustanovy «Minskkancert» i dziaržaŭnych teatraŭ — estrady i moładzievaha — dy niekalki čynoŭnikaŭ z vykankamu. Z hetych asobaŭ składajecca mastacki saviet pry hałoŭnym upraŭleńni idealahičnaj raboty Mienharvykankamu, jaki za začynienymi dźviaryma vyrašaje kamu dazvalać vystupać u Miensku, a kamu admović. Haradzienskamu muzyku Alesiu Dzianisavu z prezentacyjaj prahramy «Karotkaja historyja Biełarusi» na słovy Alesia Čobata na scenu vychodzić nie dazvolili.
Zajaŭnikam kancertu byŭ kiraŭnik TuzinFM Siarhiej Budkin, jaki paśla admovy paprasiŭ patłumačyć jak adbyvajecca razhlad zajavy, chto ŭvachodzić u skład savietu i zapatrabavaŭ pratakoł pasiedžańnia. Adnak kiraŭnik idealahičnaha adździełu Pavał Skałaban admoviŭ u pradastaŭleńni hetaj infarmacyi. Pratakoł pasiedžańnia atrymałasia znajści ŭ Ekanamičnym sudzie Miensku, dzie Budkin asprečvaŭ hetaje rašeńnie ideolahaŭ.
Miarkujučy z dakumentu pasiedžańnie mastackaha savieta ŭ vykankamie adbyłosia davoli chutka. Čalcy zasłuchali čynoŭnika Alaksandra Šastakova, jaki vynies na razhlad teksty paeta Alesia Čobata, i vyrašyli (adzinahałosna) paraić nie pravodzić hety kancert u suviazi z «nizkim urovniem ispołnienija ispołnitielem».
«Čynoŭniki staviać kodeks «Ab kultury» vyšej za Kanstytucyju i vykarystoŭvajuć jaho ŭ represiŭnych metach, choć u Minkulcie zapeŭnivali, što nijakich złoŭžyvańniaŭ nia budzie. Tut złoŭžyvańnie ŭładaj i cenzura navidavoku. I mnie škada tych padniavolnych ludziej ź dziaržaŭnych ustanovaŭ kultury, jakich vykarystoŭvajuć dla nadańnia lehitymnaści absalutna absurdnym dziejańniam. Tym samym jany mocna psujuć imidž. I nia tolki svoj dy svajoj ustanovy i kalektyvu, ale i ŭsioj krainy», — kaža Siarhiej Budkin.
U Ekanamičny sud padadziena ŭžo apelacyjnaja skarha ŭ spravie biespadstaŭna zabaronienaha kancertu Alesia Dzianisava. Taksama nakiravany zvarot u idealahičnaje ŭpraŭleńnie Mienharvykankamu z patrabavańniem zabiaśpiečyć prysutnaść arhanizataraŭ, pradstaŭnikoŭ vykanaŭcy i žurnalistaŭ na pasiedžańniach mastackaha savietu pry razhladzie zajavaŭ na vydańnie hastrolnaha paśviedčańnia. U dalejšym miarkujecca damahčysia admieny hetaha haniebnaha punktu kodeksa «Ab kultury».
P.S. Hurt Alesia Dzianisava Dzieciuki na hetym tydni byŭ vykreśleny sa śpisu ŭdzielnikaŭ festu «LidBeer», dzie majuć vystupić «Krambambula», «Pietla pristrastija», Lumen i «Okiean Jelzi». Haradziency musili trapić u lik vystupoŭcaŭ praz narodnaje hałasavańnie, dzie lidziravali ź vialikim adryvam ad astatnich, ale arhanizatary źniali ich z dystancyi — niby za nakrutki. U adkaz na zakliki prychilnikaŭ bajkatavać fest, Dzieciuki raspaŭsiudzili zvarot, u jakim zaklikajuć «nie paroć harački»: «Na festyvali LidBeer buduć vystupać dobryja hurty, vartyja taho, kab pajechać! Padtrymajcie Volskaha! Padtrymajcie Vakarčuka! Niachaj vašym dobrym nastrojem i śmiecham padaviacca našyja i vašyja niadobrazyčliŭcy».
Ciapier čytajuć
«Muž syšoŭ ź Sipłym i Małym». Imavierna, pad Kramatorskam ukraincy adnym macham ubajdosili troch biełaruskich najomnikaŭ18
Kamientary