3 vieraśnia ŭ Mahilovie prajšło pieršaje ekumieničnaje čytańnie Biblii. Akcyja prymierkavana da 500-hodździa vydańnia Śviatoha Pisańnia na biełaruskaj movie.
Na pieršaj sustrečy sabrałasia kala 150 čałaviek — katoliki, pastar relihijnaj jevanhielska-lutaranskaj hramady Mahilova Ivan Masiura razam ź viernikami, a taksama pravasłaŭnyja. Čytańni ŭznačaliŭ inicyjatar akcyi biskup Alaksandr Jašeŭski SDB, biskupski vikaryj dla Mahilova i Mahiloŭskaj vobłaści.
Pačałasia sustreča z ustupnaj pramovy ijerarcha. Biskup padkreśliŭ, što Francišak Skaryna pierš za ŭsio kłapaciŭsia pra toje, kab pieradać ludziam Božaje słova na zrazumiełaj rodnaj movie, kab, jak kazaŭ pieršadrukar, «ludzi ježu dla dušy i cieła atrymali».
Svaimi ŭražańniami pra «Mahiloŭskija čytańni Biblii» padzialiłasia viernica katedralnaj parafii ŭ Mahilovie Jana Šumskaja: «Ja nie čakała, što źbiarecca poŭnaja zała. Było pryjemna bačyć, što na sustreču pryjšli nie tolki «svaje», katoliki, ale i ludzi, jakich ja bačyła ŭpieršyniu. Sabralisia chryścijanie samaha roznaha ŭzrostu — ad maładoha pakaleńnia da ludziej stałaha ŭzrostu. Kali hladzieła na sabranych, mnie chaciełasia, kab Jezus pramoviŭ da kožnaha. Uraziła, što svaimi dumkami vyrašyli padzialicca i pradstaŭniki inšych chryścijanskich kanfiesij. Adčuvaŭsia duch adzinstva. Ludzi, jakija ŭpieršyniu bačyli adno adnaho, advažna dzialilisia Božym słovam. Tak, adna dziaŭčyna, uzhadvajučy historyju sa Śviatoha Pisańnia pra chvoraha, jakoha prynieśli siabry i razabrali strachu, kab toj trapiŭ da Jezusa, vykazała vialikaje ździŭleńnie i zachapleńnie takim prykładam siabroŭstva».
Jana Šumskaja, spasyłajučysia na tekst pra vyprabavańnie Jezusa ŭ pustyni, padzialiłasia svaimi dumkami pra vybar čałavieka ŭ ciažkija chviliny jaho žyćcia, kali prychodziać spakusy i vyprabavańni: «Kali ŭ čałavieka ničoha nie atrymlivajecca, da jaho moža pryjści dumka pra svaju niavartaść. Ale tak namaŭlaje zły duch, jon vypraboŭvaje i starajecca zapeŭnić nas u našaj nikčemnaści, što čałaviek — niepatrebnaja detal u hetym śviecie. Adnak toje, što Jezus nie paddaŭsia vyprabavańniam złoha, daje i mnie nadzieju, što nie złamajusia».
Viernica katedralnaj parafii ŭ Mahilovie Jana Kozyr, dzielačysia ŭražańniami, nazvała siabie «pa pryrodzie ekumienistam, jaki maryć, kab ludzi pačuli zaklik da adzinstva i adnojčy zrazumieli, što tolki razam my moc i što Boh adzin — lubiačy, žyvy i miłaserny». «Pieršaja sustreča mianie vielmi natchniła. Ja ŭbačyła, što heta mahčyma: być razam i supolna dzialicca Božym słovam, razvažać nad im», — dadała Jana Kozyr.
U miežach ekumieničnych «Mahiloŭskich čytańniaŭ Biblii» čakajucca jašče try sustrečy — 10, 17 i 24 vieraśnia.
Prachodziać sustrečy, na jakija zaprašajucca ŭsie chryścijanie horada, z 19.45 da 20.45 u zale Mahiloŭskaha dziaržaŭnaha kaledža mastactvaŭ pa vuł. Kamsamolskaja, 12.
Kamientary