Elektronnyja recepty na leki pakul nie ŭkaranilisia. Raźbirajemsia čamu

U 2015 hodzie ŭ Minsku startavaŭ respublikanski prajekt «Elektronny recept». Tady pacyjentam niekalkich minskich dziaržaŭnych paliklinik pačali vydavać na biazvypłatnaj asnovie śpiecyjalnyja płastykavyja kartki, jakija musili zamianić saboj zvyčajnyja papiarovyja recepty na leki.

Tady ž paviedamlałasia, što Ministerstva achovy zdaroŭja płanuje, što ŭžo ŭ 2017 hodzie pa ŭsioj krainie možna budzie karystacca elektronnymi receptami. Prajšła ŭžo pałova 2017 hoda, a infarmatyzacyja śfiery achovy zdaroŭja ruchajecca vielmi pavolna. Tak, u Minsku ciapier usie palikliniki pačali vydavać elektronnyja recepty. Ale ŭ rehijonach hetaja technałohija pryjšła tolki ŭ 28 ustanovaŭ. Da taho ž, adna sprava — vydavać pacyjentam płastykavyja kartki, a zusim inšaja — zapisvać na ich recepty i zaachvočvać ludziej karystacca imi. Šmat chto kaža, što kartku im vydali, ale recepty vypisvajuć tradycyjnyja, na papiercy.

My zapytalisia ŭ Ministerstva achovy zdaroŭja, čamu ž sistema elektronnych receptaŭ dahetul nie pracuje paŭnavartasna i kali ŭžo papiarovyja recepty kančatkova źniknuć.

U ministerstvie kažuć, što sistema pracuje. U miežach piłotnaje zony ŭžo vypisana pa ŭsioj krainie amal 2 miljony receptaŭ. Adnak nie ŭsie takija recepty siońnia atavarvajucca praź sistemu «Elektronny recept». U bolšaści vypadkaŭ heta źviazany z tym, što kamiercyjnyja apteki pakul nie padklučanyja da sistemy. Ale jany nie suprać, i nijakich śpiecyjalnych damoŭlenaściej dla hetaha nie patrabujecca. Pryvatnyja sietki aptek dapracoŭvajuć ułasnaje prahramnaje zabieśpiačeńnie, i ich padklučeńnie da sistemy płanujecca raspačać z kastryčnika 2017 hoda.

Papiarovyja recepty, značycca ŭ adkazie ministerstva, nie admianiajucca pry ŭkaranieńni elektronnych nidzie ŭ śviecie, navat u samych sučasnych u hetych adnosinach krainach, naprykład, u Estonii, dzie zusim nievialiki adsotak receptaŭ (kala 5%) vypisvajecca na papiery. Inšaja sprava, što pry vypiscy elektronnaha receptu na ruki vydajecca nie ŭłasna recept, a pamiatka pra pryjom preparata.

Hałoŭnaja zadača, jakuju nieabchodna vyrašać z ukaranieńniem technałohii elektronnych receptaŭ, — poŭnaja kampjutaryzacyja pracoŭnych miescaŭ i navučańnie daktaroŭ pracy ź miedycynskimi infarmacyjnymi sistemami. Tamu na pieršych etapach ukaranieńnia novaj technałohii vypiska elektronnych receptaŭ musić adbyvacca adnačasova z vydačaj papiarovych.

Z adkazu ministerstva vynikaje, što nievykanańnie płanavanych terminaŭ ukaranieńnia elektronnych receptaŭ pa ŭsioj Biełarusi źviazana z tym, što infarmatyzacyja pracoŭnych miescaŭ daktaroŭ idzie davoli pavolna, i jany nie paśpiavajuć vyvučyć usie drobiazi pracy ź sistemaj.

Adznačajecca taksama, što recepturnyja błanki, pryznačanyja dla vypiski narkatyčnych srodkaŭ i psichatropnych rečyvaŭ, źjaŭlajucca błankami strohaj spravazdačnaści sa stupieniami abarony i pryznačanyja dla praduchileńnia patrapleńnia hetych lekavych srodkaŭ u nielehalnaje abaračeńnie.

Błank dla vypiski lhotnych receptaŭ taksama źjaŭlajecca błankam strohaje spravazdačnaści i adnačasova finansavym dakumientam, na padstavie jakoha adbyvajecca raźlik pamiž ustanovami achovy zdaroŭja i aptečnymi arhanizacyjami.

Takija ž miery abarony ŭ sistemie elektronnych receptaŭ jašče nie raspracavanyja. I heta jašče adna pryčyna niedaskanałaści jaje pracy.

Dla taho, kab kansiervatyŭnaja doktarka staroha hartu ŭklučyła kampjutar i vypisała elektronny recept, patrebny važki stymuł, jakoha ŭ ministerstvie, napeŭna, tak i nie prydumali. A pakul našmat praściej čyrkanuć na papiercy niekalki słovaŭ.

• 0
• 0
• 0
• 0
• 0
• 0
• 0
• 0