U redakcyju TUT.BY źviarnułasia siamja Rychlonkaŭ z ahraharadka Harany Połackaha rajona. Anatol i Natalla padzialilisia biadoj — 2 žniŭnia ŭ reanimacyjnym adździaleńni Połackaj centralnaj haradskoj balnicy pamierła ich 10-hadovaja dačka Liza. Dziaŭčynka, pa zapeŭnieńni baćkoŭ, praktyčna nikoli nie chvareła. Ale 1 žniŭnia dzicia paskardziłasia na bol u hrudnoj kletcy. Na nastupny dzień u jaje zabaleŭ žyvot. Lizie zrabili kropielnicu, i jana straciła prytomnaść. Zatym — reanimacyja. Nieŭzabavie maci i baćku paviedamili, što ich dačka pamierła.
«Našaj dački nie stała za 2 dni»
— Liza była zdarovym, aktyŭnym dziciem. Jana navat siezonnymi VRVI redka chvareła. Nijakich chraničnych zachvorvańniaŭ u jaje nie było, ci miedrabotniki ich nie vyjavili. My nie možam zrazumieć: jak tak zdaryłasia, što za 2 dni našaha dziciaci nie stała, — haruje mama dziaŭčynki, Natalla Rychlonak.
Liza, jakoj u červieni spoŭniłasia 10 hadoŭ, była małodšaj dačkoj u siamji — starejšaja ŭžo studentka, vučycca ŭ Viciebsku. Natalla i Anatol pracujuć, trymajuć svaju haspadarku, u ich svoj prysiadzibny ŭčastak, pradukty vykarystoŭvajuć u asnoŭnym sa svajho padvorka.
31 lipienia Liza hulała i biehała ź dziećmi, jak zvyčajna. Pachvaliłasia baćkam: «Ja navučyłasia rabić «koła»!». A na nastupny dzień, 1 žniŭnia, dziaŭčynka paskardziłasia na bol u hrudnoj kletcy i młosnaść. U jaje taksama padniałasia tempieratura.
— My źviarnulisia ŭ dziciačuju palikliniku ŭ Połacku. Doktar, jakaja znachodziłasia na pryjomie, ahledzieła dzicia, pasłuchała, pamierała tempieraturu. Pastaviła dyjahnaz «vostry hastryt». Pryznačeńni byli takija: unutraciahlicavyja injekcyi supraćrvotnaha preparata (jaje zrabili ŭ pracedurnym kabiniecie adrazu ž paśla vizitu da doktara), zachavańnie dyjety i pitnoha režymu, pryjom «śmiekty». Nijakich dadatkovych abśledavańniaŭ lekar dačcy nie pryznačyła i adpraviła nas dadomu, — uspaminaje mama.
Na nastupny dzień, 2 žniŭnia, u dziaŭčynki źjavilisia boli ŭ vobłaści žyvata. Baćki zavieźli jaje da doktara ŭ Haranskuju ambułatoryju. Doktar rekamiendavała ahlad chirurha. Lizu znoŭ pryvieźli ŭ dziciačuju palikliniku ŭ Połack.
— Dačku ahledzieli, ale joj stanaviłasia ŭsio horš i horš — jana navat nie mahła samastojna stajać. Nas adpravili na analiz kryvi, — uznaŭlaje padziei Natalla Rychlonak. — Dačka na vačach słabieła, ale jašče trymałasia. Ničoha nie znajšoŭšy, ale bačačy, što stan paharšajecca, z palikliniki nas adpravili ŭ chirurhičnaje adździaleńnie centralnaj haradskoj balnicy. Adrazu dačku ahledzieŭ chirurh. Zrabili renthien, UHD, uziali analizy.
Natalla Rychlonak akcentuje ŭvahu na tym, što miedyki nie spytali ŭ jaje, ci jość u dziciaci alerhija na jakija-niebudź miedykamienty: «Pry hetym u Lizy była schilnaść da alerhii, u pryvatnaści, na amaksicylin, ale tolki nie impartavany, a biełaruskaj vytvorčaści».
«Pad kropielnicaj dačka pasinieła i straciła prytomnaść»
U pałacie chirurhičnaha adździaleńnia dziaŭčyncy pastavili kropielnicu.
— Lekary skazali, što ŭ kropielnicy byŭ papavieryn — kab u dački pierastaŭ baleć žyvocik. Ad nutraviennych ulivańniaŭ jaje stan pahoršyŭsia. Dzieści tracina kropielnicy adkapała — i Liza stała sinieć i raptam straciła prytomnaść. Prosta na nasiłkach u lifcie lekar rabiŭ joj štučnaje dychańnie. Lizu pavieźli ŭ reanimacyju. My z mužam uvieś čas znachodzilisia pobač, la dźviarej. Miarkujučy pa ŭsim, niejkija preparaty dačce kałoli i ŭ reanimacyi. My čuli, jak Liza zusim nienadoŭha pryjšła ŭ prytomnaść, stała razmaŭlać. A potym raptam kryknuła: «Mnie baluča». Znoŭ straciła prytomnaść.
Niahledziačy na strašnaje ŭzrušeńnie, Natalla dobra pamiataje chranałohiju padziej:
— Trapili my ŭ balnicu kala piaci hadzin viečara, hadzin u šeść-pałovie siomaj dziciaci pastavili kropielnicu. A kala vaśmi hadzin viečara my z mužam pačuli apošni kryk svajoj dački pra toje, što joj baluča. Paśla hetaha miedrabotniki nam ničoha nie kazali, choć my šmat razoŭ pytalisia, jak naša dačka. A pieršaj hadzinie nočy nam paviedamili, što Liza pamierła. Pa słovach daktaroŭ, śmierć zafiksavali ŭ 23.25.
Zhodna z papiarednim zaklučeńniem patołahaanatama, pryčynaj śmierci Lizy Rychlonak staŭ mijakardyt nieŭdakładnieny (mijakardyt - zapaleńnie sardečnaj myšcy, mijakarda). Ale kančatkovaje zaklučeńnie baćki nie atrymali: u balnicy im skazali, što vyniki jany zmohuć daviedacca tolki praz paŭtara-dva miesiacy.
- Nam vielmi važna razabracca ŭ tym, što źjaviłasia pryčynaj śmierci našaj dački, - ustupaje ŭ razmovu Anatol Rychlonak, baćka dziaŭčynki. - Vielmi mnohaje ŭ hetaj situacyi zastajecca niezrazumiełym. Dzicia lačyli ad hastrytu — pryznačyli «śmiektu», dyjetu, a pamierła ad sardečnaha zachvorvańnia. U papiarednim zaklučeńni napisana adno: «mijakardyt». A na słovach nam zajavili, što heta naohuł niejki nieviadomy navucy virus, jaki moža chutka źjeści serca. Na našu z žonkaj dumku, Liza pamierła ad anafiłaktyčnaha šoku.
Śledčyja viaduć pravierku
Pa fakcie śmierci dziciaci ŭ Połackaj CHB pravodzić pravierku Śledčy kamitet.
— Pravierku SK pačaŭ 16 žniŭnia, praz dva tydni paśla śmierci Lizy, i padstavaj dla jaje staŭ naš zvarot, - kažuć muž i žonka. - Jašče raniej my pisali elektronny zvarot u Ministerstva achovy zdaroŭja, ale jaho pierasłali na Viciebskaje abłzdaroŭje.
— 2 žniŭnia ŭ Połackaj CHB pamierła dzicia. U mižrajonny adździeł Śledčaha kamiteta pastupiła zajava ad baćkoŭ. Ciapier pravodzicca pravierka - u dačynieńni da daktaroŭ Połackaj CHB, dziciačaj palikliniki, Haranskaj ambułatoryi. Viadziecca zbor dakumientaŭ: jakija preparaty dziciaci ŭvodzili, jakoje lačeńnie akazvali i h.d. Svajo słužbovaje rasśledavańnie pryznačyć Ministerstva achovy zdaroŭja. Užo prachodzić ŭłasnaje słužbovaje rasśledavańnie ŭ CHB, - paviedamiła TUT.BY śledčy Połackaha mižrajonnaha adździeła SK Volha Łysienka.
Ad dalejšych kamientaroŭ jana ŭstrymałasia, adznačyŭšy, što pravierka budzie doŭžycca jašče niekalki miesiacaŭ, i pakul jašče rana kazać pra toje, što stała pryčynaj śmierci dziaŭčynki.
Ciapier čytajuć
Što viadoma pra byłoha palitviaźnia Sakałoŭskaha, jaki pamior u Bierlinie ŭ 47 hadoŭ1
Kamientary