Dyrektar kanała, jaki šukaje biełaruskamoŭny kantent: «Vyras u SSSR, havaru pa-rusku, ale biełaruskamoŭnaje telebačańnie musić siabie identyfikavać»
Deputatka Alena Anisim zajaviła, što apieratary kabielnaha telebačańnia majuć ideju stvaryć kanał ź biełaruskamoŭnym kantentam — mastackija i dakumientalnyja filmy i multfilmy, navukova-papularnyja pieradačy i inšaje, jak aryhinalna biełaruskaje, tak i ŭ pierakładzie.
«Naša Niva» znajšła prynamsi adnaho zacikaŭlenaha čałavieka — dyrektara kanała «Śvietłaje TB» Siarhieja Bileckaha.
Jon kaža, što Anisim mahła štości nie tak zrazumieć, bo kankretna jahony intares — heta nie asobny kanał, a napaŭnieńnie ŭžo isnaha biełaruskim kantentam.
«Śvietłaje TB» užo ciapier tranślujuć kabielnyja apieratary. Bilecki nie biarecca aceńvać svaju dolu rynka, ale kaža, što kanał dosyć papularny ŭ paraŭnańni z kankurentami: jon biełaruski, pryvatny.
Navošta Bileckamu heta treba?
«Ja budu havaryć pa-rusku, adrazu kažu, bo biełaruskaj movaj nie vałodaju tak, kab havaryć samomu. Ja vyras u SSSR. A naš zvarot da biełaruskamoŭnaha kantentu źviazany z tym, što našaja pazicyja takaja: biełaruskaje telebačańnie maje mieć biełaruskamoŭnuju identyfikacyju. U jaki momant pryjšło ŭśviedamleńnie, ja nie viedaju. U našych płanach u sietcy viaščańnia raźmiaščać pakul 20% biełaruskamoŭnaha kantentu, jaki budzie apracoŭvacca ruskimi subtytrami, kab ruskamoŭny hladač moh usprymać našuju spadčynu taksama. I heta nie supraćpastaŭleńnie ruskaj movie, heta raźvićcio», — skazaŭ jon nam.
Ale dyrektar dadaje, što pakul kankretnych prapanoŭ im nie pastupała — tolki prapanovy supracoŭnictva.
«A kab chtości pryjšoŭ i skazaŭ «voś, razhledźcie naš materyjał dla publikacyi», takoha nie było. My ž šukajem aŭtarskija muzyčnyja tvory, naprykład, było b vielmi cikava ŭbačyć prahramu pra ludziej, jakija zrabili ŭniosak u raźvićcio i stanaŭleńnie našaj krainy: pra ŭčora, pra siońnia. Na publicystyku ŭ nas niama licenzii, my kulturna-aśvietnicki kanał», — skazaŭ Siarhiej Bilecki.
Ci budzie na kanale samacenzura?
«Chto b da nas ni źviarnuŭsia, jość redkalehija pa ŭsich pytańniach: ad źmiestu da huku. Pradukt budzie padvierhnuty samacenzury — našamu bačańniu televizijnaha pracesa».
Pra pamier aŭtarskich hanararaŭ na «Śvietłym» pakul nie kažuć: maŭlaŭ, u kožnym vypadku buduć aceńvać indyvidualna i čakajuć prapanoŭ.
-
Šlacham Cichanoŭskaha: redaktarka rajonki i łukašenkaŭski błohier tak zachapilisia prablemami Barysava, što pryjšli da kramolnych vysnovaŭ
-
Dzie ciapier Kirył Kazakoŭ — były kiraŭnik STB, «chrosny baćka» Azaronka i inšych prapahandystaŭ?
-
Biełaruskamoŭny dziciačy časopis «Matulina soniejka» prypyniŭ svoj vychad
Kamientary